လွၵ်းလၢႆး 5 မဵဝ်း သင်ၶႂ်ႈပဵၼ်ၵူၼ်းမီးတၢင်းႁူႉႁွပ်ႈတူဝ် လႄႈ ပဵၼ်ၵူၼ်းလဵပ်ႈႁဵၼ်းယူႇတႃႇသေႇ

ၵူၼ်းမီးတၢင်းႁူႉႁွပ်ႈတူဝ်ၼႆၼၼ်ႉ ဢမ်ႇၸႂ်ႈၵူၼ်းႁဵၼ်းလိၵ်ႈသုင်သုင် ၼၼ်ႉၵူၺ်း ၽႂ် မီးၸႂ်ၶႂ်ႈလဵပ်ႈႁဵၼ်းတၢင်းႁူႉၵူႈပိူင်ပိူင် လႄႈ သူၸႂ်ၵဵပ်းဢဝ်တၢင်းႁူႉႁွပ်ႈတူဝ်ၸဝ်ႈၵဝ်ႇ ယူႇတႃႇသေႇ ၼၼ်ႉယဝ်ႉ ၸင်ႇႁွင်ႉဝႃႈ ၵူၼ်းမီးတၢင်းႁူႉႁွပ်ႈတူဝ် မိူၼ်ၼင်ႇ လွင်ႈတူင်ႇဝူင်းႁိမ်းႁွမ်း၊ လွင်ႈၾိင်ႈငႄႈၾိင်ႈထုင်း၊ လွင်ႈသႃႇသၼႃႇ၊ လွင်ႈၶူဝ်းၼုင်ႈတၢင်းဝႆ၊ လွင်ႈပၢႆးမွၼ်း ၊ ပၢႆးယူႇလီ ၊ သိင်ႇဝႅတ်ႉလွမ်ႉ ၸဵမ်ၸိူဝ်းၼႆႉ ပဵၼ်လွင်ႈဢၼ်ၵူၼ်းႁဝ်းဢမ်ႇလွတ်ႈလႆႈလႄႈ လဵပ်ႈႁဵၼ်းဢဝ်ပဵၼ်တၢင်းႁူႉၵႅမ်တူဝ်ဝႆႉ ၵေႃႈတိုၼ်းဢမ်ႇၽိတ်း တူဝ်ယၢင်ႇဢၼ်ငၢႆႈငၢႆႈ တႆးၵေႃႉႁဝ်းၵေႃႉၼိုင်ႈ ဢမ်ႇဝႃႈပိူၼ်ႈတေဢုပ်ႇလွင်ႈတူင်ႇဝူင်းၵူၼ်းႁႃႉ ဢမ်ႇၼၼ် လွင်ႈပၢႆးမွၼ်း ႁႃႉ ၼႆ‌ၸိုင် လၢတ်ႈလွင်ႈသင်ၵေႃႈ ႁႂ်ႈပေႃးၸၢင်ႈဢုပ်ႇၸၢင်ႈၶႆႈၸွမ်း လွင်ႈတၢင်းဢၼ်ပိူၼ်ႈဢုပ်ႇၵၼ်ယူႇၵူႈလွင်ႈလွင်ႈၼၼ်ႉ ၶႂ်ႈမၢႆထိုင်ဝႃႈ မၼ်း ၵေႃႉၼၼ်ႉမီးတၢင်းႁူႉႁွပ်ႈတူဝ်လႄႈ မီးၵၢၼ်လဵပ်ႈႁဵၼ်းယူႇတႃႇသေႇၼၼ်ႉယဝ်ႉ။ တၢင်းႁူႉႁွပ်ႈတူဝ်ၼႆႉ မီးၽွၼ်းလီၼမ်ၼႃႇ ၵၢၼ်ငၢၼ်းၸဝ်ႈၵဝ်ႇ တေၶိုၼ်ႈယႂ်ႇ၊ ၵၢၼ်ဢွၼ်ႁူဝ်ၼႃႈႁိူၼ်း၊ တႆးၵေႃႉတႆးသေႈတေၼမ် တေႇၵႂႃႇၸိူဝ်းၼႆႉ ဢၼ်လၢတ်ႈမႃးၼႆႉပဵၼ်တူဝ်ယၢင်ႇဢၼ်ႁၼ်ငၢႆႈငၢႆႈၵူၺ်းတီႈတႄႉ ၽွၼ်းလီမၼ်းမီးတင်းၼမ် လႄႈသင်ဝႃႈၸဝ်ႈၵဝ်ႇၶႂ်ႈၽိုၵ်းလဵပ်ႈႁဵၼ်းတႃႇ ပဵၼ်ၵူၼ်းမီးတၢင်းႁူႉႁွပ်ႈတူဝ်ၼမ်ၼမ် တေလႆႈႁဵတ်းၸိူင်ႉႁိုဝ်ၽွင်ႈ ၼႆၼၼ်ႉ တေမီးယူႇလၢႆလၢႆ ၶေႃႈမိူၼ်ၼင်ႇ-

1 ဢၢၼ်ႇလႄႈထွမ်ႇ ႁႂ်ႈၼမ်ၼမ်
လိၵ်ႈၼႆႉလမ်ႇလွင်ႈၼႃႇတႃႇတေၽိူမ်ႉၼမ်ႉၵတ်ႉ လႄႈ လႆႈတၢင်းႁူႉမႃးလိူဝ်ၵဝ်ႇ ၵွပ်ႈၼၼ် လူဝ်ႇႁႃလိၵ်ႈဢၢၼ်ႇၼမ်ၼမ် ဢမ်ႇဝႃႈပဵၼ်လိၵ်ႈၼႂ်း website ၊ ပပ်ႉၵႃႇတုၼ်း ၊ ၼႂ်းသိုဝ်ႇၵူႈပိူင် ၼႂ်းပပ်ႉၵူႈဢၼ် ၼင်ႇႁႃလႆႈ လိၵ်ႈၼႆႉဢၢၼ်ႇမဵဝ်းႁိုဝ်ၼႆၵေႃႈ မၼ်းတိုၼ်းလႆႈတၢင်းႁူႉ ဢမ်ႇလွင်ႈၼိုင်ႈၵေႃႈလွင်ႈၼိုင်ႈယဝ်ႉ ယွၼ့်တၢင်းႁူႉဢၼ်ဝႃႈၼႆႉတေမီးလၢႆလၢႆမဵဝ်း သင်ဝႃႈၸိူဝ်းၸႃႉဢၼ်ဢမ်ႇၶႂ်ႈဢၢၼ်ႇပပ်ႉလိၵ်ႈ ၼႆၵေႃႈ ထွမ်ႇသဵင်ဢဝ်ၵေႃႈလႆႈ မိူၼ်ၼင်ႇထွမ်ႇ ၼႂ်း YouTubeၵေႃႈလႆႈ ။

2 ဢုပ်ႇလၢတ်ႈ လႄႈ တင်ႈၶေႃႈထၢမ်ၼမ်ၼမ်။
ဢၼ်ႁဝ်းၵႂႃႇထူပ်းၵူၼ်းတင်းၼမ် ဢမ်ႇဝႃႈပဵၼ် တႆးၵေႃႉ ပီႈၼွင်ႉၸိူဝ်းၼႆႉ တေႁဵတ်းႁႂ်ႈလႆႈပိၼ်ႇပၢႆႇလႅၵ်ႈလၢႆႈပၢႆးဝူၼ်ႉၸွမ်းၵူၼ်းတၢင်ႇၵေႃႉလႄႈ ဢၼ်ဢမ်ႇပွင်ႇၸႂ် ဢၼ်ၶႂ်ႈႁူႉၶေႃႈမုၼ်းလိုၵ်ႉလိုၵ်ႉၼၼ်ႉ သင်ၵႆႉၵႆႉတင်ႈၶေႃႈထၢမ်သေထၢမ်ပိူၼ်ႈ ဢမ်ႇၵူဝ်ဢမ်ႇဢၢႆ ၼႆၸိုင် ၸင်ႇတေလႆႈႁပ်ႉတၢင်းႁူႉဢၼ်မႂ်ႇမႂ်ႇ ဢၼ်ဢမ်ႇယၢမ်ႈႁူႉၵေႃႈတေလႆႈႁူႉ ဢၼ်ႁူႉယဝ်ႉၵေႃႈတေလႆႈႁူႉမႃးလိူဝ်သေၵဝ်ႇ ယွၼ်ႉၼၼ်လႄႈၵၢၼ်ထၢမ်ဢၼ်ဝႃႈၼႆႉၵေႃႈ လမ်ႇလွင်ႈလႄႈမီးၽွၼ်းလီတႃႇၵၢၼ်ၽိူမ်ႉၼမ်ႉၵတ်ႉႁဝ်းတႄႉတႄႉၼၼ်ႉယဝ်ႉ။

3 ၵႆႉၵႆႉၵႂႃႇၶဝ်ႈႁူမ်ႈပၢင်ပၼ်ၵႂၢမ်းႁူႉ။
သင်လႆႈၶဝ်ႈႁူမ်ႈထွမ်ႇ ပၢင်ပၼ်ၵႂၢမ်းႁူႉ ဢမ်ႇၼၼ် ပၢင်တၢၼ်ႈၶႆႈ လႆႈထွမ်ႇလွင်ႈဢၼ် ၽူႈလူင်ႉလႅၼ်ႇ ၽူႈမီးတူဝ်ထူပ်းၼမ်ၶဝ် ၶႆႈလၢတ်ႈၼႄၼႆၸိုင် လိူင်ႈသင်ၵေႃႈယဝ်ႉ ဢၼ်ပိူၼ်ႈလၢတ်ႈၼၼ်ႉ ႁဝ်းတေပွင်ႇၸႂ်လွင်ႈတၢင်းၼႂ်းလိူင်ႈၼၼ်ႉလီလိူဝ်သေ ဢၼ်ႁဝ်းဢၢၼ်ႇႁူႉၼႂ်းလိၵ်ႈဢဝ်ၵူၺ်း လိူဝ်သေၼၼ်ႉ ႁဝ်းတေလႆႈႁူႉၸၵ်းမိုတ်ႈၵိုဝ်းလႄႈ လႆႈၶဝ်ႈတူင်ႇဝူင်းမႂ်ႇမႂ်ႇ လႆႈလူင်းမိုဝ်းႁဵတ်းတူဝ်ထူပ်းၸွမ်းၵၼ်တင်းတၢင်ႇၵေႃႉသေ တၢင်းႁူႉၼၼ်ႉတေၾင်လိုၵ်ႉဝႆႉၼႂ်းဢွၵ်းဢေႃႁဝ်း ႁဵတ်းႁႂ်ႈႁဝ်းတွင်းၵိုမ်း ဢမ်ႇလိုမ်းငၢႆႈငၢႆႈ။

4 လဵၼ်ႈၵဵမ်းဢၼ်ၸၢမ်းတူၺ်းၼမ်ႉၵတ်ႉၸဝ်ႈၵဝ်ႇ။
ၵဵမ်းၼႆႉ သင်မေႃလိူၵ်ႈဢဝ်မႃးၸႂ်ႉတိုဝ်းလဵၼ်ႈႁႂ်ႈပဵၼ်ၽွၼ်းလီၵေႃႈ တိုၼ်းလႆႈၼမ်ႉၵတ်ႉ လႆႈလပ်ႉပၢႆးဝူၼ်ႉႁဝ်းၵူၺ်းဢမ်ႇၵႃး ယင်းလဵပ်ႈႁဵၼ်းၵဵပ်းႁွမ်ဢဝ်တၢင်းႁူႉမႂ်ႇမႂ်ႇတီႈမၼ်းလႆႈပႃးထႅင်ႈတင်းၼမ်ယူႇ မိူၼ်ၼင်ႇ ၵဵမ်းထၢမ်ၵႂၢမ်းထၢမ် ၵဵဝ်ႇလူၺ်ႈလွင်ႈတၢင်းႁူႉႁွပ်ႈတူဝ်ႁဝ်း ဢမ်ႇဝႃႈပဵၼ်ၵဵမ်းထၢမ် လွင်ႈပိုၼ်း ၊လွင်ႈတူင်ႇဝူင်းၵူၼ်း၊ ငဝ်းလၢႆးပိူင်ပဵၼ်ယူႇယၢမ်းလဵဝ် တေႇၸဵမ်ၸိူဝ်း ၼႆႉ တေႁဵတ်းႁႂ်ႈႁဝ်းလႆႈလပ်ႉပၢႆးဝူၼ်ႉ လႆႈထူၵ်းဢဝ်တၢင်းႁူႉဢၼ် ႁဝ်းႁူႉႁဝ်းတွင်းၼၼ်ႉဢွၵ်ႇမႃးလၢတ်ႈၼႄ ဢွၵ်ႇမႃးၼပ်ႉသၢင်ႈလႄႈ တေႁဵတ်းႁႂ်ႈၸဝ်ႈၵဝ်ႇတွင်းလိူဝ်သေၵဝ်ႇ လူင်ႉလႅၼ်ႇမႃးလိူဝ်ၵဝ်ႇၼၼ်ႉယဝ်ႉ ။

5 ဢမ်ႇၵိုတ်းလိုဝ်ႈလွင်ႈလဵပ်ႈႁဵၼ်းၸဝ်ႈၵဝ်ႇ။
လွင်ႈလဵပ်ႈႁဵၼ်းဢၼ်ဝႃႈၼႆႉဢမ်ႇမီးတီႈသုတ်းသဵင်ႈ ယွၼ်ႉၼၼ် ယူႇတီႈလႂ်ၵေႃႈလဵပ်ႈ ႁဵၼ်းလႆႈ တေႃႈလဵဝ်ၶႅၼ်းၶိုတ်းၵၢပ်ႈဢမ်ႇဝႃႈ ၼႂ်းၾူင်း ၸွမ်းႁိမ်းႁွမ်းၸဝ်ႈၵဝ်ႇယူႇသဝ်းၸိူဝ်းၼႆႉၵေႃႈ လဵပ်ႈႁဵၼ်းဢဝ်လႆႈယူႇၵူႈၶၢဝ်းယၢမ်း ႁၼ်မူတ်ႉတေႃႉမဵတ်ႉၶဝ်ႈ ႁၼ်ၼူၵ်ႉႁဵတ်းႁၢင်း ႁၼ်ၵႆႇၶေႇႁႃၵိၼ် ငိၼ်းသဵင်သင်သေပိူင်ပိူင် လႆႈယူႇၼႂ်းငဝ်းလၢႆးဢၼ်လႂ်သေဢမ်ႇဝႃႈ သင်မီးၸႂ်ၶႂ်ႈလဵပ်ႈႁဵၼ်း လႄႈ မေႃလဵပ်ႈႁဵၼ်း မေႃၼပ်ႉသၢင်ႈ မေႃဝူၼ်ႉၸွမ်းမၼ်းၸိုင် ၵူႈပိူင် ပဵၼ်တၢင်းႁူႉႁွပ်ႈတူဝ်လႆႈၵူႈဢၼ်ယဝ်ႉ ၵၢၼ်လဵပ်ႈႁဵၼ်းၼႆႉဢမ်ႇမီးဝၼ်းထဝ်ႈ ၽႂ်မီးတၢင်းႁူႉႁွပ်ႈတူဝ်ၼမ်ၵေႃႈ ၵေႃႉၼၼ်ႉ တိုၼ်းၶိုၼ်ႈယႂ်ႇဢမ်ႇတူၵ်းတႅမ်ႇ ၵွပ်ႈၼၼ် ယႃႇၵိုတ်းလိုဝ်ႈလွင်ႈလဵပ်ႈႁဵၼ်းၼႃႈ။

ပိၼ်ႇတႅမ်ႈ – ယိင်းမွၼ်းလႅင်း

တႆးလွတ်ႈလႅဝ်း