သိုၵ်း ဝ UWSA ပၼ်တၢမ်ႇတၢႆ ၸၢႆးၵျေႃႇထုၼ်း ဢႃႇယု 16 ပီႊ

မိူဝ်ႈၼႆႉဝၼ်းထီႉ 30 October 2024 (လိူၼ်သိပ်းဢဵတ်းလွင်ႈ 13 ၶမ်ႈ ပီႊတႆး 2118 ၼီႈ) ယၢမ်းၵၢင်ၼႂ်ၼၼ်ႉ ၸုမ်းသိုၵ်း ဝ UWSA တႅပ်းတတ်းတြႃး ၵူၼ်းမီးတၢင်းၽိတ်း 7 ၵေႃႉ (ဢႃႇယုဢမ်ႇပႆႇထိုင် 20 ပီႊသေၵေႃႉ) တီႈဝဵင်းႁူဝ်ပၢင်ႇ လႄႈ ၼႂ်းၼၼ်ႉ ၵေႃႉပဵၼ်ၸၢႆးၵျေႃႇထုၼ်း လႆႈထုၵ်ႇပၼ်တၢမ်ႇတၢႆ ယူႇယဝ်ႉ။

ၸွမ်းၼင်ႇၽၢႆႇ သိုၵ်း ဝ UWSA တႅပ်းတတ်းတြႃးသေ ပိုၼ်ၽၢဝ်ႇတေႃႇၼႃႈ ၵူၼ်းတၢင်းၼမ်ဝႃႈ လွင်ႈလႆႈပၼ်တၢမ်ႇတၢႆ ၸၢႆးၵျေႃႇထုၼ်း ဢႃႇယု 16 ပီႊၼႆႉ ယွၼ်ႉမိူဝ်ႈပူၼ်ႉမႃး ဝၼ်းထီႉ 3 August 2024 ယၢမ်းၵၢင်ၼႂ်မွၵ်ႈ 01:00 မူင်းၼၼ်ႉ မၼ်းၸၢႆးၶဝ်ႈၸူၼ် တီႈၼႂ်းဝဵင်းႁူဝ်ပၢင်ႇတီႈၼိုင်ႈသေ ႁႅမ်တၢႆလုၵ်ႈဢွၼ်ႇဢႃႇယု 10 ၶူပ်ႇ ၵေႃႉၼိုင်ႈသေဢမ်ႇၵႃး  ႁဵတ်းႁၢႆႉပႃးၵူၼ်းၼႂ်းႁိူၼ်းထႅင်ႈ 3 ၵေႃႉထိုင်တီႈလႆႈမၢတ်ႇၸဵပ်း၊ ၵွပ်ႈပိူဝ်ႈမၼ်းၸၢႆးမီးတၢင်းၽိတ်းယႂ်ႇလူင် လႄႈ ၸင်ႇလႆႈပၼ်တၢမ်ႇတၢႆ ဝႃႈၼႆ။

ၵူၼ်းမီးတၢင်းၽိတ်းထႅင်ႈ 6 ၵေႃႉၼၼ်ႉသမ်ႉ ၵွပ်ႈပိူဝ်ႈမဝ်းလဝ်ႈသေ တဵၵ်းၵၼ်ႉၸၼ်လူလၢႆၼၢင်းယိင်းဢွၼ်ႇ လႄႈ ၵေႃႉဢွၼ်ႁူဝ်ႁဵတ်းသၢင်ႈၼၼ်ႉ လႆႈထုၵ်ႇတူၵ်းၶွၵ်ႈတေႃႇၸူဝ်ႈဢသၢၵ်ႈ၊ ထႅင်ႈ 5 ၵေႃႉၼၼ်ႉသမ်ႉ လႆႈတူၵ်းၶွၵ်ႈ ၼိုင်ႈၵေႃႉလႂ် 15 ပီႊ ဝႃႈၼႆ။

ၸၢႆးၵျေႃႇထုၼ်း ဢႃႇယု 16 ပီႊၼၼ်ႉ ပဵၼ်ၵူၼ်းမိူင်း ၼႂ်းပွၵ်ႉ 4 ဝဵင်းလႃႈသဵဝ်ႈ လႄႈ ၵႂႃႇႁႃႁဵတ်းၵၢၼ် တီႈဝဵင်းႁူဝ်ပၢင်ႇ ၼႂ်းၼႃႈလိၼ်ၵုမ်းၵမ် သိုၵ်း ဝ UWSA ၼႆယဝ်ႉ။

တႆးလွတ်ႈလႅဝ်း

Photo-Irrawaddy