သိုၵ်းမၢၼ်ႈဢဝ်ႁိူဝ်းမိၼ်ပွႆႇမၢၵ်ႇသႂ်ႇ တီႈဝဵင်းၵူတ်ႉၶၢႆ

မိူဝ်ႈၼႆႉဝၼ်းထီႉ 1 November 2024 (လိူၼ်သိပ်းသွင်မႂ်ႇ1 ၶမ်ႈ ပီႊတႆး 2118 ၼီႈ) ၸုမ်းသိုၵ်းမၢၼ်ႈ ဢဝ်ႁိူဝ်းမိၼ်ၵႂႃႇပွႆႇမၢၵ်ႇသႂ်ႇ တီႈၼႂ်းဝဵင်းၵူတ်ႉၶၢႆ လႄႈ မီးၵူၼ်းလူႉတၢႆၸွမ်းၵေႃႉၼိုင်ႈ။

ၵူၼ်းမိူင်းၼႂ်းပိုၼ်ႉတီႈလၢတ်ႈၼႄဝႃႈ မိူဝ်ႈယၢမ်းၵၢင်ၼႂ်ၸဝ်ႉ 3:30 မူင်း ၽွင်းၵူၼ်းမိူင်းၼွၼ်းလပ်းလီယူႇၼၼ်ႉ ၸုမ်းသိုၵ်းမၢၼ်ႈ ဢဝ်မၢၵ်ႇပွႆႇသႂ်ႇတီႈ ဝဵင်းၵူတ်ႉၶၢႆ မွၵ်ႈ 10 ပၢႆၼႆႉသေ မၢၵ်ႇၵႂႃႇတူၵ်းတီႈလုမ်း (ၼတလ)၊ ႁိမ်းတူဝ်းၵဵၵ်ႉ လႄႈ လုမ်းၽၢႆႇၵဵပ်းၶွၼ်ႇ ၼႆၶႃႈ တီႈလုမ်းၽၢႆႇၵဵပ်းၶွၼ်ႇၼၼ်ႉငိၼ်းဝႃႈ မီးၵူၼ်းတိူဝ်ႉၸပ်းၸၢၵ်ႇမၢၵ်ႇသေ လႆႈလူႉတၢႆၵႂႃႇၵေႃႉၼိုင်ႈ ၵမ်ႈၽွင်ႈတႄႉဝႃႈ ပဵၼ်ၵူၼ်းသိုၵ်း TNLA ဝႃႈၼႆ၊ ႁိူၼ်းယေးၵူၼ်းမိူင်းၸိူဝ်းၼႆႉၵေႃႈ လူႉၵွႆယွၼ်ႉၸၢၵ်ႇမၢၵ်ႇမိူၼ်ၵၼ် ၼႆယဝ်ႉ။

ဝဵင်းၵူတ်ႉၶၢႆၼႆႉ ဝၢႆးသေၸုမ်းသိုၵ်း TNLA တိုၵ်းသိမ်းဝဵင်းလႆႈယဝ်ႉၼၼ်ႉ ထုၵ်ႇၺႃးၸုမ်းသိုၵ်းမၢၼ်ႈ ဢဝ်ႁိူဝ်းမိၼ်ၵႂႃႇပွႆႇမၢၵ်ႇသႂ်ႇ မီးၵႂႃႇ 3 ပွၵ်ႈ လႄႈ ၵူၼ်းမိူင်းၼႂ်းပိုၼ်ႉတီႈလႆႈလူႉတၢႆ 7 ၵေႃႉသေ ႁိူၼ်းယေး/လၢၼ်ႉတၢင်းၶၢႆ ၶွင်ၵူၼ်းမိူင်း လႆႈလူႉၵွႆၵႂႃႇ 400 ပၢႆယူႇယဝ်ႉ။

တႆးလွတ်ႈလႅဝ်း