ၵူၼ်းမိူင်းလႆႈတၢႆ 38 ၵေႃႉ ၼႂ်းၼႃႈလိၼ်သိုၵ်းၵူဝ်းၵၢင်ႉ

မိူဝ်ႈဝႃးဝၼ်းထီႉ 1 November 2024 (လိူၼ်သိပ်းသွင်မႂ်ႇ 1 ၶမ်ႈ ပီႊတႆး 2118 ၼီႈ) ၸုမ်းသိုၵ်းၵူဝ်းၵၢင်ႉပိုၼ်ၽၢဝ်ႇၵႂႃႇဝႃႈ တင်ႈတႄႇလိူၼ် July ထိုင် October  ၶၢဝ်းတၢင်း 4 လိူၼ်ၼႆႉ မီးၵူၼ်းမိူင်း ၼႂ်းၼႃႈတီႈၵုမ်းၵမ်ၶွင် MNDAA လႆႈတၢႆယွၼ်ႉႁိူဝ်းမိၼ် သိုၵ်းမၢၼ်ႈ မီး 38 ၵေႃႉ လႄႈ မၢတ်ႇၸဵပ်း 128 ၵေႃႉ ယူႇယဝ်ႉ။

ဝၢႆးသေသိုၵ်းမၢၼ်ႈတူၵ်းသုမ်းၵႂႃႇ ငဝ်ႈငုၼ်းတိူင်းသိုၵ်းၸဵင်ႇႁွင်ႇဝၼ်းဢွၵ်ႇ ယမၶ ဝဵင်းလႃႈသဵဝ်ႈယဝ်ႉၼၼ်ႉ ၸုမ်းသိုၵ်းမၢၼ်ႈ တင်ႈၸႂ်ဢဝ်ႁိူဝ်းမိၼ်ပွႆႇမၢၵ်ႇသႂ်ႇ ဢွင်ႈတီႈၵူၼ်းမိူင်းယူႇသဝ်း ဢမ်ႇထၢတ်ႇဢမ်ႇဝၢႆးလႄႈ ႁဵတ်းႁႂ်ႈၵူၼ်းမိူင်း လႆႈမၢတ်ႇၸဵပ်းလူႉတၢႆတင်းၼမ်သေ ဢမ်ႇၵႃး ႁိူၼ်းယေး၊ ႁူင်းယႃ၊ ႁူင်းႁဵၼ်း၊ ဢွင်ႈတီႈၵိူဝ်းယမ်သႃႇသၼႃႇၸိူဝ်းၼႆႉ လႆႈလူႉၵွႆတင်းၼမ်ယူႇယဝ်ႉ။

ဝဵင်းဢၼ်ၸုမ်းသိုၵ်းၵူဝ်းၵၢင်ႉ MNDAA ၵုမ်းၵမ်ဝႆႉသေ ထုၵ်ႇၺႃးႁိူဝ်းမိၼ်သိုၵ်းမၢၼ်ႈ ပွႆႇမၢၵ်ႇသႂ်ႇ ဢမ်ႇထၢတ်ႇဢမ်ႇဝၢႆးၼၼ်ႉ ပဵၼ်တီႈဝဵင်းလႃႈသဵဝ်ႈ ဝႃႈၼႆ။

တႆးလွတ်ႈလႅဝ်း