ၶၢဝ်းတၢင်း 1 လိူၼ် ၵူၼ်းမိူင်းၸိူဝ်းယူႇၼႂ်းၼႃႈလိၼ် TNLA လႆႈတၢႆ 34 ၵေႃႉ

ဝၢႆးသေၸုမ်းသိုၵ်း TNLA ၵုမ်းထိင်းလႆႈဝဵင်းလၢႆလၢႆတီႈ ၼႂ်းၸိုင်ႈတႆးပွတ်းႁွင်ႇ ယဝ်ႉၼၼ်ႉ ၸုမ်းသိုၵ်းမၢၼ်ႈ ဢဝ်ႁိူဝ်းမိၼ်ပွႆႇမၢၵ်ႇသႂ်ႇ ဢမ်ႇထၢတ်ႇဢမ်ႇဝၢႆး လႄႈ ႁဵတ်းႁႂ်ႈၵူၼ်းမိူင်းၸိူဝ်းဢမ်ႇမီးတၢင်းၽိတ်းသင် လႆႈမၢတ်ႇၸဵပ်းလူႉတၢႆတင်းၼမ် ၼႆယဝ်ႉ။

ၸုမ်းသိုၵ်း TNLA ပိုၼ်ၽၢဝ်ႇၵႂႃႇဝႃႈ ၼႂ်းလိူၼ် October 2024 ၶၢဝ်းတၢင်း 1 လိူၼ် ၸုမ်းသိုၵ်းမၢၼ်ႈ ဢဝ်ႁိူဝ်းမိၼ်ပွႆႇမၢၵ်ႇသႂ်ႇ ၼႂ်းပိုၼ်ႉတီႈဝဵင်း ၼွင်ၶဵဝ်၊ ၵူတ်ႉၶၢႆ၊ ၼမ်ႉသၼ်ႇ၊ သီႇပေႃႉ  ဢၼ်ပဵၼ်ၼႃႈလိၼ်ၵုမ်းၵမ်ၶွင် TNLA သေ မၢၵ်ႇတူၵ်းတႅၵ်ႇ တိူဝ်ႉၸပ်းသႂ်ႇ ၵူၼ်းမိူင်းလႆႈတၢႆၵႂႃႇ 34 ၵေႃႉ မၢတ်ႇၸဵပ်း 87 ၵေႃႉ လႄႈ ဢၼ်လူႉတၢႆ ဢၼ်မၢတ်ႇၸဵပ်းၼမ်သေပိူၼ်ႈသမ်ႉ ပဵၼ်ၵူၼ်းမိူင်းၼွင်ၶဵဝ်၊ ယွၼ်ႉၸၢၵ်ႇမၢၵ်ႇသေ ႁိူၼ်းယေးၸိူဝ်းၼႆႉၵေႃႈ လႆႈလူႉၵွႆတင်းၼမ်မိူၼ်ၵၼ် ၼႆယဝ်ႉ။

မိူဝ်ႈဝၼ်းထီႉ 2 November 2024 ယၢမ်းၵၢင်ၶမ်ႈမွၵ်ႈ 20:00 မူင်းၼႆႉၵေႃႈ ၸုမ်းသိုၵ်းမၢၼ်ႈ ဢဝ်ႁိူဝ်းမိၼ် ပွႆႇမၢၵ်ႇသႂ်ႇ တီႈၼႂ်းပွၵ်ႉပူႇတႃႇ ဝဵင်းၼွင်ၶဵဝ် 2 လုၵ်ႈ လႄႈ ၵၢမ်ႇလီသေၸၢၵ်ႇမၢၵ်ႇဢမ်ႇတိူဝ်ႉၸပ်းၵူၼ်းမိူင်း ၼႆယဝ်ႉ။

တၢင်းၽၢႆႇၸုမ်းသိုၵ်း MNDAA ဢၼ်ပဵၼ်ၸုမ်းဢူၺ်းလီၵၼ်တင်း သိုၵ်း TNLA ၼၼ်ႉၵေႃႈ ပိုၼ်ၽၢဝ်ႇဝႆႉဝႃႈ တင်ႈတႄႇလိူၼ် July ထိုင် October 2024 ၶၢဝ်းတၢင်း 4 လိူၼ်ၼႆႉ ၸုမ်းသိုၵ်းမၢၼ်ႈဢဝ်ႁိူဝ်းမိၼ်ပွႆႇမၢၵ်ႇသႂ်ႇ ၼႂ်းၼႃႈလိၼ်ၵုမ်းၵမ်ၶွင် MNDAA လႄႈ မီးၵူၼ်းမိူင်းလႆႈတၢႆၵႂႃႇ 38 ၵေႃႉ မၢတ်ႇၸဵပ်း 128 ၵေႃႉ ၼႆယူႇယဝ်ႉ။

တႆးလွတ်ႈလႅဝ်း