ပၢင်တိုၵ်းတီႈပၢင်လွင်း ၵူၼ်းပၢႆႈၽေးၵမ်ႉၼမ်ပဵၼ်ၸၢဝ်းၶိူဝ်းတႆးလႄႈၵယၢၼ်း

ၸုမ်းသိုၵ်းမၢၼ်ႈတင်းၸုမ်း PDF ပဵၼ်ပၢင်တိုၵ်းၵၼ်ၼႂ်းပိုၼ်ႉတီႈ ၸႄႈဝဵင်းပၢင်လွင်း လႄႈ ႁိူၼ်းၵူၼ်းမိူင်းထုၵ်ႇၽဝ်ၵူႈဝၼ်းသေ ၵူၼ်းပၢႆႈၽေးပၢင်တိုၵ်းၵေႃႈ ၵမ်ႉၼမ်ပဵၼ် ၸၢဝ်းၶိူဝ်းတႆး လႄႈ ၸၢဝ်းၶိူဝ်းၵယၢၼ်း ၼႆယဝ်ႉ။

မိူဝ်ႈဝႃးဝၼ်းထီႉ 6 November 2024 (လိူၼ်သိပ်းသွင်မႂ်ႇ 7 ၶမ်ႈ ပီႊတႆး 2118 ၼီႈ) ၵူၼ်းမိူင်းလၢတ်ႈတီႈသိုဝ်ႇၶၢဝ်ႇ DVB ဝႃႈ ၸုမ်းယိပ်းၵွင်ႈၵၢင်ႇၶဝ်ပိုတ်းယိုဝ်းၵၼ် ၸွမ်းၸိူဝ်းဝၢၼ်ႈ ပၢၼ်းမွၵ်ႇ၊ သွင်လၢၼ်ႇ၊ လွႆၸျၢႆး၊ ၼမ်ႉၽႃမူ မီးၶၢဝ်းတၢင်းလိူၼ်ပၢႆ ယဝ်ႉလႄႈ ၵူၼ်းမိူင်းၵေႃႈလႆႈပၢႆႈၽေးၼပ်ႉႁဵင်မၼ်းယဝ်ႉ၊ ႁိူၼ်းၵူၼ်းမိူင်းဢၼ်ၺႃး သိုၵ်းမၢၼ်ႈၸုတ်ႇၽဝ်ၼၼ်ႉ ပဵၼ်တီႈဝၢၼ်ႈ လွႆၸျၢႆႇ၊ ႁူဝ်ၽၢႆ၊ ၶူဝ်လမ်၊ ၼမ်ႉၽႃမူ၊ ႁူဝ်ဝူဝ်း၊ လွႆၸၢင်ႉ ၸိူဝ်းၼႆႉ၊ မိူဝ်ႈတႄႇၸႃႉမၼ်းတႄႉ ၸုမ်းသိုၵ်း PDF ၶဝ်ႈၵႂႃႇသိုဝ်ႉၶွင်ၵိၼ်ယႅမ်ႉၸွမ်းၼႂ်းဝၢၼ်ႈယဝ်ႉသေ ၶိုၼ်းဢွၵ်ႇဝၢၼ်ႈၵႂႃႇလႄႈ ၵမ်းၼႆႉသိုၵ်းမၢၼ်ႈၶိုၼ်းဝႃႈပဵၼ်ၵူၼ်းၵမ်ႉထႅမ်  PDF ၼႆလႄႈ ဢဝ်ၾႆးၸုတ်ႇၽဝ် ႁိူၼ်းၵူၼ်းမိူင်း ၵူႈဝၼ်း၊ ပႃးၵႂႃႇႁိူၼ်းၽႂ်လၢႆလၢႆလႄႈ ၸုတ်ႇၵႂႃႇလၢႆလင်တႄႉ ဢမ်ႇပႆႇႁူႉ၊ ၼိုင်ႈဝၼ်းၼႆႉၶဝ်တေၸုတ်ႇႁိူၼ်းမွၵ်ႈ 4−5 လင်  ၸုတ်ႇၵူႈဝၼ်း လႄႈ ယူႇတီႈၵႆသေ မုင်ႈတူၺ်းႁၼ်ၵွၼ်းၾႆး လုၵ်ႉၶိုၼ်ႈမႃးၼႂ်းဝၢၼ်ႈယူႇဝႃႈၼႆ။

ၵူၼ်းမိူင်းဢၼ်ယူႇသၢင်ႈၵိၼ်သဝ်း တီႈဝၢၼ်ႈလွႆၸျၢႆး၊ လင်ၶၢၼ်၊ ႁူဝ်ဝူဝ်း လႄႈ ၼမ်ႉၽႃမူၼၼ်ႉ ပဵၼ်ဝၢၼ်ႈယႂ်ႇဝၢၼ်ႈလူင် မီးလင်ႁိူၼ်းတမ်းၼမ် မီးႁူဝ်ၵူၼ်းၼမ်သေ ယဝ်ႉၵေႃႈမီး ပီႈၼွင်ႉတႆး လႄႈ ပီႈၼွင်ႉၵယၢၼ်း ယူႇသၢင်ႈၵိၼ်သဝ်းၼမ်ဝႆႉ၊ မိူဝ်ႈလဵဝ်ထိုင်ၶၢဝ်းပၢတ်ႇၶဝ်ႈယဝ်ႉ လႄႈ လႆႈမႆႈၸႂ်ပႃးလွင်ႈၼႆႉသေ ၵမ်းၼႆႉသမ်ႉမီးၶၢဝ်ႇလိုဝ်းၵၼ်ဝႃႈ ၸုမ်းသိုၵ်းမၢၼ်ႈ ဢဝ်ၵႃးၸၢၵ်ႈ ၵႂႃႇပၢတ်ႇၶဝ်ႈၵူၼ်းမိူင်း လႄႈ တေႃႉတၢင်ႇၵႂႃႇတၢင်း ဝဵင်းပၢင်လွင်း ဝႃႈၼႆ။

ၵူၼ်းမိူင်းၸိူဝ်းပၢႆႈၽေးပၢင်တိုၵ်းၼပ်ႉႁဵင်ၼၼ်ႉ ဢွၼ်ၵၼ်ပၢႆႈႁႃတီႈလွတ်ႈၽေး ႁင်းၽႂ်ႁင်းမၼ်း လႄႈ မၢင်ၸိူဝ်းယူႇၸွမ်းၼႂ်းသူၼ်/ႁႆႈ၊ မၢင်ၸိူဝ်းယူႇၸွမ်းပီႈၼွင်ႉ ၸွမ်းတၢင်ႇဝၢၼ်ႈ တၢင်ႇဝဵင်းဝႆႉၼႆ လႆႈႁူႉၸွမ်းၶၢဝ်ႇမီးၼင်ႇၼႆ။

တႆးလွတ်ႈလႅဝ်း