ၶၢဝ်းတၢင်း 3 ပီႊပၢႆ ၼၢင်းယိင်းလႆႈတၢႆယွၼ်ႉသိုၵ်းမၢၼ်ႈ 1,270 ၵေႃႉ

ဝၢႆးသေသိုၵ်းမၢၼ်ႈယိုတ်းဢၢမ်းၼၢတ်ႈၸိုင်ႈမိူင်းမႃး မိူဝ်ႈဝၼ်းထီႉ 1 February 2021 ထိုင် ပီႊ 2024 ၶၢဝ်းတၢင်း 3 ပီႊပၢႆ ၸုမ်းသိုၵ်းမၢၼ်ႈၶႃႈႁႅမ်တၢႆပႅတ်ႈၼၢင်းယိင်း ၼႂ်းမိူင်းႁူမ်ႈတုမ် မီးၸမ်ၵႂႃႇ 1,270 ၵေႃႉ ၼႆယဝ်ႉ။

ၸွမ်းၼင်ႇၸုမ်းလူလွမ်ၸွႆႈထႅမ် ၵူၼ်းတူၵ်းၶွၵ်ႈၵၢၼ်မိူင်း (AAPP) ပိုၼ်ၽၢဝ်ႇၵႂႃႇဝႃႈ ၼႂ်းပီႊ 2021 ၼၼ်ႉ ၼၢင်းယိင်းထုၵ်ႇသိုၵ်းမၢၼ်ႈႁႅမ်တၢႆ မီး 95 ၵေႃႉ၊ ပီႊ 2022 ထုၵ်ႇႁႅမ်တၢႆ 213 ၵေႃႉ၊ ပီႊ 2023 ထုၵ်ႇႁႅမ်တၢႆ 402 ၵေႃႉ၊ ပီႊ 2024 ၼႆႉသမ်ႉ တင်ႈတႄႇဝၼ်းထီႉ 1 January – 12 November ထုၵ်ႇႁႅမ်တၢႆၵႂႃႇ 560 ၵေႃႉ ႁူမ်ႈတၢင်းမူတ်းပဵၼ် 1,270 ၵေႃႉယူႇယဝ်ႉ၊ ပိုၼ်ႉတီႈဢၼ် ၼၢင်းယိင်းထုၵ်ႇ ႁႅမ်တၢႆၼမ်လိူဝ်ပိူၼ်ႈသုတ်းၼၼ်ႉ ပဵၼ်ပိုၼ်ႉတီႈ ၼႂ်းတိူင်းၸႄႈၵႅင်း (မီး 463 ၵေႃႉ) ၼႆယဝ်ႉ။

ၵွပ်ႈပိူဝ်ႈသၢႆသိုၵ်းမၢၼ်ႈ ထူဝ်းသိုၵ်းၶဝ်ႈၵႂႃႇၸွမ်းၼႂ်းဝၢၼ်ႈ/ဝဵင်းသေ ႁၼ်ၽႂ်ၵေႃႈႁႅမ်တၢႆပႅတ်ႈ ၼင်ႇမိူၵ်ႈမိူၵ်ႈလိူင်းလိူင်း လူၺ်ႈဢမ်ႇလိူၵ်ႈၼႃႈ လႄႈ ၼၢင်းယိင်းမၢင်ၸိူဝ်း ထုၵ်ႇၺႃးၵၼ်ႉၸၼ်လူလၢႆ ႁႅမ်တၢႆပႅတ်ႈၵေႃႈမီး ႁိူၼ်းၵူၼ်းမိူင်းၵေႃႈ ၺႃးၸုတ်ႇၽဝ်ၼမ်တႄႉၼမ်ဝႃႈ၊ ထႅင်ႈလွင်ႈၼိုင်ႈၵေႃႈ မၢင်ပိုၼ်ႉတီႈ ဢမ်ႇမီးပၢင်တိုၵ်းသိုၵ်းသိူဝ်သင်သေတႃႉ ၸုမ်းသိုၵ်းမၢၼ်ႈ တင်ႈၸႂ်ပွႆႇမၢၵ်ႇသႂ်ႇ ၼႂ်းဝၢၼ်ႈလႄႈ ႁဵတ်းႁႂ်ႈၵူၼ်းမိူင်း လႆႈမၢတ်ႇၸဵပ်း တၢႆတင်းၼမ်ၵေႃႈမီး ဢၼ်လႆႈပၢႆႈၽေးၵေႃႈမီးမႃးတင်းၼမ် ယူႇယဝ်ႉ။

ၼၢင်းယိင်းၵမ်ႈၽွင်ႈ ၸိူဝ်းဢမ်ႇမီးတၢင်းၽိတ်းသင်ၼၼ်ႉ ထုၵ်ႇၺႃးၸုမ်းယိပ်း ၵွင်ႈၵၢင်ႇလုၵ်ႉၽိုၼ်ႉ ထၢင်ႇၽိတ်းထၢင်ႇပိူင်ႈလႄႈ ၺႃးယိုဝ်းတၢႆပႅတ်ႈၵေႃႈ ယၢမ်ႈမီးမႃးမိူၼ်ၵၼ် ယူႇယဝ်ႉ။

တႆးလွတ်ႈလႅဝ်း