သိုၵ်းမၢၼ်ႈပွႆႇမၢၵ်ႇသႂ်ႇ လုမ်းတႅပ်းတတ်းတြႃး

မိူဝ်ႈဝႃးဝၼ်းထီႉ 13 November 2024 (လိူၼ်သိပ်းသွင်မႂ်ႇ 13 ၶမ်ႈ ပီႊတႆး 2118 ၼီႈ) ယၢမ်းႁူဝ်ၶမ်ႈ 18:00 မူင်းပၢႆၼၼ်ႉ ၸုမ်းသိုၵ်းမၢၼ်ႈဢဝ်ႁိူဝ်းမိၼ် ပွႆႇမၢၵ်ႇသႂ်ႇတီႈ လုမ်းတႅပ်းတတ်းတြႃး ဝဵင်းၼွင်ၶဵဝ် လႄႈ ႁိူၼ်းၵူၼ်းမိူင်းလူႉၵွႆၸွမ်း ၵမ်ႈၽွင်ႈ ဝႃႈၼႆ။

ၵူၼ်းမိူင်းၼႂ်းပိုၼ်ႉတီႈလၢတ်ႈၼႄဝႃႈ မၢၵ်ႇဢၼ်သိုၵ်းမၢၼ်ႈပွႆႇတူၵ်းမႃးၼၼ်ႉ တူၵ်းတိူဝ်ႉၸပ်းလုမ်းတႅပ်းတတ်းတြႃး လႄႈ ၸၢၵ်ႇမၢၵ်ႇၽူင်ႉသႂ်ႇပႃး ႁူင်းပလိၵ်ႈ၊ ႁိူၼ်းၵူၼ်းမိူင်း 3 လင် လႆႈလူႉၵွႆႁႅင်းဝႆႉၶႃႈဢေႃႈ၊ ၵူၼ်းမိူင်းတႄႉ ဢမ်ႇမီးလွင်ႈမၢတ်ႇၸဵပ်းသင် ငိၼ်းဝႃႈတႄႉ မီးၵူၼ်းၶွၵ်ႈၵေႃႉၼိုင်ႈ ဢၼ်ၸုမ်းသိုၵ်း TNLA ၶဝ်ၵုမ်းၶင်ဝႆႉၼၼ်ႉ လႆႈတိူဝ်ႉၸၢၵ်ႇမၢၵ်ႇလႄႈမီးလွင်ႈမၢတ်ႇၸဵပ်းဝႆႉ ဝႃႈၼႆ။

မိူဝ်ႈဝၼ်းထီႉ 12 November 2024 ယၢမ်းဝၢႆးဝၼ်း 14:00 မူင်းပၢႆၼၼ်ႉ ၸုမ်းသိုၵ်းမၢၼ်ႈဢဝ်ႁိူဝ်းမိၼ်ပွႆႇမၢၵ်ႇသႂ်ႇ တီႈပွၵ်ႉၵၢတ်ႇလႄႈ မၢၵ်ႇၵႂႃႇတူၵ်းသႂ်ႇ တီႈလၢၼ်ႉၼမ်ႉၼဵင်ႈၸဵမ်းသေ မီးၵူၼ်းမိူင်းလႆႈတၢႆ 11 ၵေႃႉမၢတ်ႇၸဵပ်း 11 ၵေႃႉ ယူႇယဝ်ႉ။

ၼႃႈလိၼ်ဢၼ်ၸုမ်းသိုၵ်းမၢၼ်ႈ တူၵ်းသုမ်းၵႂႃႇၼႂ်းမိုဝ်း ၸုမ်းယိပ်းၵွင်ႈၵၢင်ႇၸၢဝ်းၶိူဝ်း တီႈၼႂ်းၸိုင်ႈတႆးပွတ်းႁွင်ႇၼၼ်ႉ လႆႈႁၼ်ၽၢႆႇသိုၵ်းမၢၼ်ႈ ဢမ်ႇသူၼ်ၸႂ်ၵူၼ်းမိူင်း လႄႈ ဢဝ်ႁိူဝ်းမိၼ်ပွႆႇမၢၵ်ႇသႂ်ႇ ဢွင်ႈတီႈဢၼ် ၵူၼ်းမိူင်းယူႇသဝ်းဝႆႉၼၼ်ႉ ဢမ်ႇထၢတ်ႇဢမ်ႇဝၢႆး ယူႇယဝ်ႉ။

တႆးလွတ်ႈလႅဝ်း