ႁႅင်းၵၢၼ်မိူင်းႁူမ်ႈတုမ် ထုၵ်ႇပွႆးၸႃးၵူၼ်းထႆး လႅၼ်ဢဝ်ငိုၼ်း ဝႃႈ တေႁႃၵၢၼ်ပၼ်

မိူဝ်ႈဝၼ်းထီႉ 21 November 2024 (လိူၼ်သိပ်းသွင်လွင်ႈ 6 ၶမ်ႈ ပီႊတႆး 2118 ၼီႈ) သိုဝ်ႇၶၢဝ်ႇထႆး လၢႆးငၢၼ်းဝႃႈ ႁႅင်းၵၢၼ်ယၢၼ်မိူင်း မိူင်းႁူမ်ႈတုမ် ဢွၼ်ၵၼ်ၵႂႃႇတိူင်ႇ လၢတ်ႈတီႈ ႁူင်းပလိၵ်ႈထႆးၽူးထွၼ်းၶူၵ်ႉၶၢမ် ၸႄႈဝဵင်းသမုတ်ႇသႃၶွၼ်း ၸႄႈတွၼ်ႈသမုတ်ႇသႃၶွၼ်းၼၼ်ႉဝႃႈ ထုၵ်ႇၺႃးၼၢႆးၼႃႈ (ပွႆးၸႃး) ဢၼ်ပဵၼ်ၵူၼ်း ထႆး ပႅတ်ႉလႅၼ်ဝႃႈ ႁႃပၼ်ၵၢၼ်ၸိူဝ်းၶဝ်လႆႈယူႇၼႆသေ ယွၼ်းၵႃႈႁႃၵၢၼ်ၼိုင်ႈ ၵေႃႉလႂ် 3,000−7,000 ဝၢတ်ႇ ၼႆယဝ်ႉ။

လွင်ႈၼႆႉ လႆႈတႄႇမႃးမိူဝ်ႈၼႂ်းၶမ်ႈၶိုၼ်း ဝၼ်းထီႉ 20 November 2024 ယၢမ်းၵၢင်ၶိုၼ်းလိုၵ်း 22:30 မူင်း (ၶၢဝ်းယၢမ်းမိူင်းထႆး) ၼၼ်ႉ ၸဝ်ႈၼႃႈတီႈထႆး လႆႈႁပ်ႉလွင်ႈပွင်ႇလႅင်းဝႃႈ မီးႁႅင်းၵၢၼ်ယၢၼ်မိူင်း ဢွၼ်ၵၼ်ၼႄၵၢင်ၸႂ်တီႈၼႃႈ ၶွမ်ႇပၼီႇ ပွၵ်ႉ 5 သဵၼ်ႈတၢင်းဢဵၵ်ႇၵသျႆး ဢိူင်ႇၶူၵ်ႉၶၢမ် ၸႄႈဝဵင်းသမုတ်ႇသႃ ၶွၼ်း ၸႄႈတွၼ်ႈသမုတ်ႇသႃၶွၼ်း ၼႆလႄႈ ၽူႈမီးပုၼ်ႈၽွၼ်းလၢႆလၢႆၽၢႆႇ ၸဵမ်ပလိၵ်ႈ လႄႈ ၽၢႆႇဢုပ်ႉပိူင်ႇၸႄႈတွၼ်ႈ သမုတ်ႇသႃၶွၼ်း ၸင်ႇလႆႈလူင်းၵူတ်ႇထတ်း ႁႅင်းၵၢၼ်မိူင်းႁူမ်ႈတုမ် 100 ၵေႃႉပၢႆ ၸိူဝ်းဢၼ်ၼႄၵၢင်ၸႂ်ၼႃႈၶွမ်ႇပၼီႇၼၼ်ႉ ဝႃႈၼႆ။

ၵဵဝ်ႇလူၺ်ႈလွင်ႈၼႆႉသေလႆႈႁူႉဝႃႈ မိူဝ်ႈပူၼ်ႉမႃး 2−3 ဝၼ်းၼႆႉ  မီးႁႅင်းၵၢၼ် မိူင်းႁူမ်ႈတုမ် ၸိူဝ်းဢမ်ႇမီးၵၢၼ်ႁဵတ်း လႆႈၵႂႃႇတွင်ႈထၢမ်တီႈ ၵူၼ်းပႂ်ႉယၢမ်း ဢၼ်ပႂ်ႉ ယူႇတီႈၽၵ်းတူၼႃႈၶွမ်ႇပၼီႇဝႃႈ ၸွင်ႇၶွမ်ႇပၼီႇၶဝ် တိုၵ်ႉပိုတ်ႇႁပ်ႉ ၵူၼ်းႁဵတ်းၵၢၼ် ထႅင်ႈယူႇႁိုဝ်၊ ဝၢႆးၼၼ်ႉ ၵူၼ်းပႂ်ႉယၢမ်းၵေႃႉၼၼ်ႉ သိုပ်ႇၾူၼ်းႁွင်ႉ ၽူႈယိင်းသွင်ၵေႃႉ မႃးႁႃတီႈၼႃႈၶွမ်ႇပၼီႇသေ ဢၢင်ႈဝႃႈပဵၼ်ၼၢႆးၼႃႈႁႃၵၢၼ် လႄႈ ၶွမ်ႇပၼီႇၵေႃႈ ယင်းတိုၵ်ႉႁပ်ႉၵူၼ်းႁဵတ်းၵၢၼ်ယူႇၼႆသေ လႆႈယွၼ်းၵႃႈႁႃ ၵၢၼ်ၼိုင်ႈၵေႃႉလႂ် 3,000−7,000 ဝၢတ်ႇ မၢင်ၸိူဝ်းၸၢႆႇပဵၼ်တူဝ်ငိုၼ်း၊ မၢင်ၸိူဝ်းသမ်ႉ သူင်ႇၽၢၼ်ႇတၢင်းယေးငိုၼ်း လႄႈမီးဝႂ်သလိပ်ႉဢူၼ်းငိုၼ်းပဵၼ်သၢၵ်ႈသေႇ ၼႄလႆႈ ၼႆယဝ်ႉ။

ၼၢႆးၼႃႈၵေႃႉၼၼ်ႉ ႁႂ်ႈၸိူဝ်းၶဝ် ၶဝ်ႈတႄႇႁဵတ်းၵၢၼ် ၼႂ်းဝၼ်းထီႉ 20 November 2024 လႄႈ ႁႅင်းၵၢၼ်ဢၼ်လူင်းၸိုဝ်ႈယဝ်ႉၼၼ်ႉ ၸင်ႇလႆႈၸူဝ်းတႆးၵေႃႉတႆးသေႈ ဢၼ်သူၼ်ၸႂ် ႁႂ်ႈၵႂႃႇလူင်းၸိုဝ်ႈတီႈၼၢႆးၼႃႈၵေႃႉၼၼ်ႉထႅင်ႈ ၼပ်ႉပဵၼ် ႁူဝ်ပၢၵ်ႇၵေႃႉသေ မုင်ႈမွင်းဝႃႈ တေမီးၵၢၼ်ႁဵတ်းတႄႉတႄႉယဝ်ႉ ၵူၺ်းၵႃႈ ၽိူဝ်ႇထိုင် ဝၼ်းထီႉ 20 November 2024 ႁႅင်းၵၢၼ်ၸိူဝ်းလူင်းၸိုဝ်ႈၼၼ်ႉ လႆႈဢွၼ်ၵၼ် ၵႂႃႇတီႈၼႃႈၶွမ်ႇပၼီႇ လႄႈ လႆႈထူပ်းၸွမ်း ၽူႈယိင်းၵေႃႉဢၼ်ဢၢင်ႈဝႃႈ ပဵၼ်ၼၢႆးၼႃႈ ၵူၺ်းမၼ်းၼၢင်း ဢမ်ႇပၼ်ႁႅင်းၵၢၼ်ၸိူဝ်းၼၼ်ႉၶဝ်ႈႁဵတ်းၵၢၼ်သေ ဢၢင်ႈဝႃႈ ၵၢၼ်ဢၼ်ၸိူဝ်းသူၶဝ် လူင်းဝႆႉၼၼ်ႉ တေလႆႈႁဵတ်းယၢမ်းၵၢင်ၶိုၼ်း ဝႃႈၼႆ။

ဝၢႆးၼၼ်ႉ ၸင်ႇႁဵတ်းႁႂ်ႈႁႅင်းၵၢၼ်မိူင်းႁူမ်ႈတုမ် ႁူႉတူဝ်ဝႃႈ ထုၵ်ႇယွၵ်ႇလႅၼ်ယဝ်ႉသေ ၸင်ႇဢွၼ်ၵၼ် ယွၼ်းငိုၼ်းတီႈၼၢႆးၼႃႈၶိုၼ်း လႄႈ ဢၼ်ပဵၼ်ၼၢႆးၼႃႈၼၼ်ႉၵေႃႈ တူၵ်းလူင်းတေပၼ်ၶိုၼ်းယဝ်ႉၼႆသေတႃႉ သမ်ႉပၢႆႈႁၢႆလၢႆၵႂႃႇပႅတ်ႈသေ ႁႅင်းၵၢၼ်မိူင်းႁူမ်ႈတုမ်ၸင်ႇ ဢမ်ႇပဵင်းပေႃးႁၢၼ်ႉၸႂ် လႄႈ ဢွၼ်ၵၼ် ၼႄၵၢင်ၸႂ်တီႈၼႃႈၶွမ်ႇပၼီႇၼၼ်ႉ ၼႆယဝ်ႉ။

ၽၢႆႇတၢင်းၶွမ်ႇပၼီႇ လႆႈဢွၵ်ႇမႃးလၢတ်ႈဝႃႈ ဢမ်ႇလႆႈပိုတ်ႇႁပ်ႉၵူၼ်းႁဵတ်းၵၢၼ်မႂ်ႇ ယွၼ်ႉႁူင်းၵၢၼ်ၼႆႉ ဢမ်ႇလႆႈဢိတ်ႇဢွၵ်ႇၶူဝ်းၵုၼ်ႇယဝ်ႉ လႄႈ ၵူၺ်းမီးၵူၼ်းႁဵတ်း ၵၢၼ် 10 ၵေႃႉသေ ၽၢႆႇတၢင်းၼႂ်းၶွမ်ႇပၼီႇၼၼ်ႉၵေႃႈ ၶွမ်ႇပၼီႇၶၢႆၶူဝ်း ဢွၼ်ႇလၢႆးၶဝ် မႃးၶၢတ်ႇၸႂ်ႉတိုဝ်းဝႆႉတင်းမူတ်းယဝ်ႉ ဢိၵ်ႇတင်း ၽူႈၸတ်းၵၢၼ် ၶွမ်ႇပၼီႇ ယင်းလႆႈလၢတ်ႈဝႃႈ ဢမ်ႇယၢမ်းႁူႉၸၵ်း ၽူႈယိင်းၵေႃႉဢၼ် ဢၢင်ႈပဵၼ်ၼၢႆးၼႃႈၼၼ်ႉသေပွၵ်ႈ လႄႈ  ယိုၼ်ယၼ်ဝႃႈ ဢမ်ႇၸႂ်ႈၵူၼ်းႁဵတ်းၵၢၼ် တီႈၼႂ်းၶွမ်ႇပၼီႇ ဝႃႈၼႆ။

တႃႇဢမ်ႇမီးၽႂ် တေႁတ်းယွၵ်ႇလႅၼ်ပိူၼ်ႈထႅင်ႈၼၼ်ႉ တေဢဝ်ႁဵတ်းပဵၼ် ဢမူႉတူဝ်ယၢင်ႇၼႆလႄႈ တေဢွၵ်ႇမၢႆတီႉၺွပ်း ၵူၼ်းမီးတၢင်းၽိတ်း 3 ၵေႃႉ ဢၼ်ဢၢင်ႈဝႃႈပဵၼ်ၼၢႆးၼႃႈသေ ႁူမ်ႈၵၼ်လွၵ်ႇလႅၼ်ၵိၼ်လၢႆပိူၼ်ႈ ၽၢႆႇပလိၵ်ႈၶဝ် တိုၼ်းတေတီႉၺွပ်းဢဝ်မႃး ပၼ်တၢမ်ႇတၢင်းၽိတ်းၵႂႃႇ ၸွမ်းၼင်ႇမၢႆမီႈၸိုင်ႈမိူင်းမီး ၼၼ်ႉႁႂ်ႈလႆႈ ၼႆယဝ်ႉ။

တႆးလွတ်ႈလႅဝ်း