ၵူၼ်းမိူင်းၺႃးယိုဝ်းတၢႆၼႂ်းႁိူၼ်း

မိူဝ်ႈဝၼ်းထီႉ 25 November 2024 (လိူၼ်သိပ်းသွင်လွင်ႈ 9 ၶမ်ႈ ပီႊတႆး 2118 ၼီႈ) ယၢမ်းၵၢင်ၼႂ် 06:00 မူင်းပၢႆ မီးၵူၼ်းႁၢႆႉၵေႃႉၼိုင်ႈ ဢမ်ႇႁူႉၸိုဝ်ႈ ဢဝ်ၵွင်ႈပွတ်းၵႂႃႇယိုဝ်း ၵူၼ်းမိူင်းထိုင်တီႈၼႂ်းႁိူၼ်း ပွၵ်ႉ 9 ဝဵင်းတၢင်ႉယၢၼ်း လႄႈ မိူဝ်ႈလဵဝ်ၵူၼ်းႁၢႆႉပၢႆႈလွတ်ႈဝႆႉ ဝႃႈၼႆ။

ၵူၼ်းမိူင်းၼႂ်းပိုၼ်ႉတီႈလၢတ်ႈၼႄဝႃႈ ၽွင်းဢႃးသူင်း ဢႃႇယု 43 ပီႊ ယူႇႁိူၼ်းဝႆႉယူႇၼၼ်ႉ မီးၵူၼ်းႁၢႆႉၵေႃႉၼိုင်ႈ လုၵ်ႉတီႈလႂ်ၵႂႃႇဢမ်ႇႁူႉ ဢဝ်ၵွင်ႈပွတ်း ၵႂႃႇယိုဝ်းမၼ်းၸၢႆး 6 ၵမ်းၶႃႈဢေႃႈ၊ ဢႃးသူင်းၼၼ်ႉ ၵွပ်ႈလႆႈတၢင်းၸဵပ်း မၢတ်ႇႁႅင်းၼႃႇ လႄႈ လႆႈလူႉသဵင်ႈၵႂႃႇၽွင်းၵူၼ်းမိူင်း ၼႂ်းပိုၼ်ႉတီႈ ၸွႆႈဢဝ်တူဝ်မၼ်းသူင်ႇတီႈႁူင်းယႃ ဝႃႈၼႆ။

ၵူၼ်းႁၢႆႉၵေႃႉဢဝ်ၵွင်ႈယိုဝ်း ဢႃးသူင်း တၢႆၼၼ်ႉ ပဵၼ်ၽႂ်ယူႇတီႈလႂ် ယွၼ်ႉသင်လႄႈ လႆႈယိုဝ်းၵၼ်တၢႆၼႆၼၼ်ႉ ဢမ်ႇပႆႇမီးၽႂ်ႁူႉလႄႈ မိူဝ်ႈလဵဝ်ၵူၼ်းႁၢႆႉၵေႃႈ ပၢႆႈလွတ်ႈဝႆႉသေ တီႈဝဵင်းတၢင်ႉယၢၼ်းၵေႃႈ မီးၸုမ်းယိပ်းၵွင်ႈၵၢင်ႇ တူင်ႉၼိုင်ၼမ်ဝႆႉ ယူႇယဝ်ႉ။

တႆးလွတ်ႈလႅဝ်း