သိုၵ်းမၢၼ်ႈဢွၵ်ႇပၵ်းပိူင် လွင်ႈၵူၼ်းမိူင်းတေသိုဝ်ႉၶူဝ်းၶွင်ၼႂ်းမိူင်းၶႄႇ

တင်ႈတႄႇဢဝ်ဝၼ်းထီႉ 1 December 2024 (လိူၼ်ၸဵင်မႂ်ႇ 1 ၶမ်ႈ ပီႊတႆး 2119 ၼီႈ) ၸုမ်းသိုၵ်းမၢၼ်ႈဢွၵ်ႇပၵ်းပိူင်ဝႆႉ တွၼ်ႈတႃႇၵူၼ်းမိူင်း ၸိူဝ်းတေၶၢမ်ႇ လၢၼ်ႇၵူတ်ႇထတ်း (သိၼ်ႇၽိဝ်ႉၵဵၵ်ႉ) ဝဵင်းမူႇၸေႊ ၸိုင်ႈတႆးပွတ်းႁွင်ႇသေ ၵႂႃႇသိုဝ်ႉၶူဝ်းၶွင် ၼႂ်းမိူင်းၶႄႇၼၼ်ႉ ႁႂ်ႈလႆႈႁဵတ်းၸွမ်းၼင်ႇ ပၵ်းပိူင်ဢၼ်တၢမ်းဝၢင်းဝႆႉ ၼႆယဝ်ႉ။

ၼႂ်းပၵ်းပိူင်ၼၼ်ႉမီးဝႆႉဝႃႈ လူတ်ႉ/ၵႃး သင်ဝႃႈဢမ်ႇမီးဝႂ်ႁပ်ႉႁွင်းၽၢႆႇၵဵဝ်ႇၶွင်ႈၼႆ တိုၼ်းဢမ်ႇပၼ်ၽၢၼ်ႇပူၼ်ႉလၢၼ်ႇ၊ ၶူဝ်းၶွင်ဢၼ်တေတေႃႉၶဝ်ႈမႃးလႆႈၼၼ်ႉ ပဵၼ်ၶူဝ်းၶွင်ၵိၼ်ယႅမ်ႉ မိူၼ်ၼင်ႇ မၢၵ်ႇမႆႉမၢၵ်ႇတွၵ်ႇ၊ ၽၵ်းယိူဝ်ႈၼင်းၶဵဝ်၊ ၼိူဝ်ႉ/ပႃ ၵူၺ်းလႄႈ ၼွၵ်ႈလိူဝ်ၼၼ်ႉဢမ်ႇပၼ်ၶႂၢင်ႉ၊ လွင်ႈၶူဝ်းၶွင် ၵိၼ်ယႅမ်ႉၼၼ်ႉ တေႃႉတၢင်ႇၼမ်ၼႃႇၵေႃႈဢမ်ႇလႆႈ ပေႃးပဵၼ်လူတ်ႉၶိူင်ႈၼႆ တေလႆႈဝႆႉ တၢင်းၼႃႈၼိုင်ႈထူင် တၢင်းလင်ၼိုင်ႈထူင် လႄႈ ၵူၼ်းမိူင်းတေသိုဝ်ႉၶူဝ်းၶွင်သင်ၵေႃႈ ႁႂ်ႈႁဵတ်းသၢႆမၢႆဝႆႉ ႁင်းၽႂ်ႁင်းမၼ်း၊ ပေႃးဢဝ်လေႃႉ၊ လူတ်ႉထိပ်ႇ (လႅင်)၊ ၵႃး (မဵဝ်းဢမ်ႇၸႂ်ႈတႃႇတၢင်ႇၵုၼ်ႇ) ၼၼ်ႉတိုၼ်းဢမ်ႇပၼ်ၶႂၢင်ႉတေႃႉၶူဝ်းၶွင် လႄႈ သင်ထတ်းႁူႉႁၼ်တေထုၵ်ႇၺႃးဢဝ်တၢင်းၽိတ်း ဝႃႈၼႆ။

ထႅင်ႈလွင်ႈၼိုင်ႈၵေႃႈ တွၼ်ႈတႃႇတေၶၢမ်ႈလၢၼ်ႇ ၵူတ်ႇထတ်းသေ ၵႂႃႇသိုဝ်ႉၶူဝ်းၶွင် ၼႂ်းမိူင်းၶႄႇလႆႈၼၼ်ႉ  ၵူၼ်းမိူင်းတေလႆႈတၢင်ႇ မၢႆၾၢင်ပိုၼ်းတူဝ်လႄႈ မၢႆလူတ်ႉၶိူင်ႈ/ၵႃး တီႈႁွင်ႈၵၢၼ်ၽၢႆႇတေႃႉသူင်ႇတၢင်းလိၼ်ယဝ်ႉ ယူႇတီႈႁွင်ႈၵၢၼ် ၽၢႆႇတေႃႉသူင်ႇတၢင်းလိၼ် ၸင်ႇတေဢွၵ်ႇပၼ်ဝႂ်ၶႂၢင်ႉၶၢမ်ႈလၢၼ်ႇ ဝႃႈၼႆ၊ မၢႆလူတ်ႉၶိူင်ႈ/ၵႃး ဢၼ်ပဵၼ်ၶွင်မိူင်းၶႄႇ လႄႈ လူတ်ႉၶိူင်ႈ/ၵႃး ဢၼ်ဢမ်ႇလႆႈတၢင်ႇသၢႆမၢႆ တီႈၽၢႆႇၵဵဝ်ႇၶွင်ႈၶဝ်ၼၼ်ႉ တိုၼ်းဢမ်ႇပၼ်ၶႂၢင်ႉ တေႃႉတၢင်ႇၶူဝ်းၶွင် ၶဝ်ႈဢွၵ်ႇလၢၼ်ႇ ၼႆယဝ်ႉ။

တီႈဝဵင်းမူႇၸေႊၼႆႉ တိုၵ်ႉမီးသိုၵ်းမၢၼ်ႈပၵ်းသဝ်းဝႆႉယူႇ လႄႈ  ဝၢင်းၽႅၼ်တမ်းပႃး ၵၢၼ်ဢုပ်ႉပိူင်ႇထႅင်ႈသေ ၵူတ်ႇထတ်းလၢၼ်ႇၶဝ်ႈဢွၵ်ႇမိူင်းႁၢဝ်ႈႁႅင်းဝႆႉ ယူႇယဝ်ႉ။

တႆးလွတ်ႈလႅဝ်း