သိုၵ်းမၢၼ်ႈပွႆႇမၢၵ်ႇသႂ်ႇၵူၼ်းမိူင်းတၢႆထႅင်ႈ 6 ၵေႃႉ

ၸုမ်းသိုၵ်းမၢၼ်ႈ ဢဝ်ႁိူဝ်းမိၼ်ၵႂႃႇပွႆႇမၢၵ်ႇသႂ်ႇ တီႈဝဵင်းမိူင်းပၢႆး လႄႈ ၸႄႈဝဵင်းၽၢႆၶုၼ်ႇ ၸိုင်ႈတႆးပွတ်းၸၢၼ်းသေ မီးၵူၼ်းမိူင်းလႆႈမၢတ်ႇၸဵပ်းတၢႆ တင်းၼမ်ၼႆယဝ်ႉ။

ၽူႈမီးပုၼ်ႈၽွၼ်းၸုမ်း PDF လၢတ်ႈတီႈသိုဝ်ႇၶၢဝ်ႇဝႃႈ မိူဝ်ႈဝၼ်းထီႉ 27 November 2024 (လိူၼ်သိပ်းသွင်လွင်ႈ 12 ၶမ်ႈ ပီႊတႆး 2118 ၼီႈ) ယၢမ်းဝၢႆးဝၼ်းမွၵ်ႈ 15:00 မူင်းၼၼ်ႉ ၸုမ်းသိုၵ်းမၢၼ်ႈဢဝ်ႁိူဝ်းမိၼ်ပွႆႇမၢၵ်ႇသႂ်ႇ တီႈဝၢၼ်ႈၵူင်ႇပေႃႇ  ၸႄႈဝဵင်းၽၢႆၶုၼ်ႇ လႄႈ ၸၢၵ်ႇမၢၵ်ႇတိူဝ်ႉၸပ်းၺႃးၵူၼ်းမိူင်းၼႂ်းၼႃႈႁိူၼ်းလင်ၼိုင်ႈ လႆႈလူႉတၢႆထင်တီႈၵႂႃႇ 3 ၵေႃႉ၊ ဝၼ်းထီႉ 28 November 2024 ၸုမ်းသိုၵ်းမၢၼ်ႈ သိုပ်ႇဢဝ်ႁိူၼ်းမိၼ်ပွႆႇမၢၵ်ႇသႂ်ႇ တီႈဝဵင်းမိူင်းပၢႆး လႄႈ မီးၵူၼ်းမိူင်း လႆႈလူႉတၢႆထႅင်ႈ 3 ၵေႃႉ မၢတ်ႇၸဵပ်း 4 ၵေႃႉ ဝႃႈၼႆ။

ၸွမ်းၼင်ႇၵူၼ်းမိူင်းလၢတ်ႈတီႈသိုဝ်ႇၶၢဝ်ႇ RFA တႄႉ တီႈဝဵင်းၽၢႆၶုၼ်ႇၼၼ်ႉ ၸုမ်းသိုၵ်းမၢၼ်ႈတိုၵ်းလိုပ်ႈပႅတ်ႈၸုမ်း PDF လႄႈ မိူဝ်ႈလဵဝ်ၽၢႆႇသိုၵ်းမၢၼ်ႈ ၵုမ်းၵမ်လႆႈၼႂ်းဝဵင်းၽၢႆၶုၼ်ႇယဝ်ႉသေ သိုပ်ႇထူဝ်းသိုၵ်းထႅင်ႈတီႈ မိူင်းပၢႆး ဝႃႈၼႆ။

မိူဝ်ႈလဵဝ်ၸွမ်းပိုၼ်ႉတီႈမိူင်းပၢႆးၼၼ်ႉ ၸုမ်းသိုၵ်းမၢၼ်ႈတင်းၸုမ်း PDF တိုၵ်ႉသိုပ်ႇၶဵင်ႈၶႅင်ၵၢၼ်သိုၵ်းၵၼ်ဝႆႉယူႇ ၼႆယဝ်ႉ။

တႆးလွတ်ႈလႅဝ်း