RCSS/SSA ၸတ်းႁဵတ်းပၢင်ၵႅဝ်ႈ ပွႆးပီႊမႂ်ႇတႆး 2119 ၼီႈ ၼႂ်းၸႄႈဝဵင်းမိူင်းပၼ်ႇ

မိူဝ်ႈၼႆႉ ဝၼ်းထီႉ 01 December 2024 (လိူၼ်ၸဵင်မႂ်ႇ 1 ဝၼ်း ပီႊတႆး 2119 ၼီႈ) မုၵ်ႉၸုမ်းၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး ဢွၼ်ႁူဝ်​​ပေႃႈမႄႈၵူၼ်းမိူင်း​​သေ ၸတ်းႁဵတ်းပၢင်ၵႅဝ်ႈ ပွႆးပီႊမႂ်ႇတႆး ဢွင်ႈတီႈၼႃးသႃ​​လေး ၸႄႈဝဵင်းမိူင်းပၼ်ႇ ၸိုင်ႈတႆးပွတ်းၸၢၼ်း​​သေ မီးႁူဝ်ပဝ်ႈလူင်ၶွင်ႇသီႇဢဝ်ၶိုၼ်းၸိုင်ႈတႆး (RCSS/SSA) ၸွမ်သိုၵ်းလူင် ယွတ်ႈသိုၵ်း လႄႈ ၽူႈယႂ်ႇၵူၼ်းလူင်လၢႆလၢႆၸဝ်ႈ ဢိၵ်ႇပႃးပီႈၼွင်ႉၶႅၵ်ႇတၢင်ႇမူႇတၢင်ႇၸုမ်း ​​ပေႃႈမႄႈၵူၼ်းမိူင်း ၵူၼ်းသိုၵ်း ၶိုၼ်ႈႁွတ်ႈ 3,229 ​​ၵေႃႉ ၼႆယဝ်ႉ။

ပၢင်ၵႅဝ်ႈဝၼ်းပီႊမႂ်ႇတႆး 2119 ၼီႈ လႆႈတႄႇၵႂႃႇၼႂ်းၶၢဝ်းယၢမ်း 09:00 မူင်း ၵၢင်ၼႂ်​​သေ ႁူဝ်ပဝ်ႈလူင် ၸွမ်သိုၵ်းလူင် ယွတ်ႈသိုၵ်း လိူၵ်ႈတၢင်ႇၽူႈၼင်ႈၸိုင်ႈ 3 ၸဝ်ႈ ၸၢဝ်းၶိူဝ်းတႆး ၸၢဝ်းၶိူဝ်းပဢူဝ်း ၸၢဝ်းၶိူဝ်းလီႇသူးယဝ်ႉ၊ ၽူႈၶိုၼ်ႈႁွတ်ႈတင်းသဵင်ႈ ဢွၼ်တၵ်ႉယမ်ၸွမ်ပိဝ်သေလႄႈ ဝၢႆးၼၼ်ႉၽူႈၼင်ႈၸိုင်ႈၸဝ်ႈၼိုင်ႈ မွၵ်ႇလၢတ်ႈ​​ၶေႃႈၵႂၢမ်းပိုတ်ႇပၢင်ၵႅဝ်ႈၵႂႃႇယူႇယဝ်ႉ။

သိုပ်ႇသေၼၼ်ႉ ၸွမ်သိုၵ်းလူင် ယွတ်ႈသိုၵ်း လႆႈမွၵ်ႇလၢတ်ႈ​​ၶေႃႈၵႂၢမ်း မီးယူႇႁူဝ်​​ၶေႃႈ ယႂ်ႇ 7 ႁူဝ်​​ၶေႃႈ​​သေ၊ သင်ႇၶႃႇၸဝ်ႈတူၼ်ၼိုင်ႈ ပၼ်​​ဢေႃးဝႃႇတၵႂႃႇ​​ လႄႈ ၽူႈယႂ်ႇၵူၼ်းလူင်ၼႂ်းမုၵ်ႉၸုမ်းထႅင်ႈလၢႆလၢႆၸဝ်ႈ လႄႈၽူႈတၢင်တူဝ်ၵူၼ်းမိူင်း လႆႈမွၵ်ႇလၢတ်ႈ​​ၶေႃႈၵႂၢမ်းၵႂႃႇမိူၼ်ၵၼ်သေယဝ်ႉ။ ၽူႈၼိုင်ႈၸိုင်ႈထႅင်ႈၸဝ်ႈၼိုင်ႈ လႆႈၶိုၼ်းမွၵ်ႇလၢတ်ႈ​​ၶေႃႈၵႂၢမ်း ပိၵ်ႉပၢင်ၵႅဝ်ႈ ပီႊမႂ်ႇတႆး 2119 ၼီႈ လႄႈၽူႈယႂ်ႇၵူၼ်းလူင် ထႆႇၶႅပ်းႁၢင်ႈပဵၼ်တီႈမၢႆတွင်း​​သေ ပၢင်ၵႅဝ်ႈယဝ်ႉတူဝ်ႈၵႂႃႇယူႇယဝ်ႉ။

မိူဝ်ႈဝႃးၼႂ်းဝၼ်းထီႉ 30 November 2024 ၼႆႉ တူၵ်းမႅၼ်ႈဝၼ်းပီႊၵဝ်ႇ 2118 ၼီႈ သဵင်ႈသုတ်းၵႂႃႇလႄႈ ယၢင်ႈၶဝ်ပီႊမႂ်ႇတႆး 2119 ၼီႈၼၼ်ႉ​​ၵေႃႈ ယူႇတီႈ မုၵ်ႉၸုမ်း ၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး (RCSS/SSA) ဢွၼ်ၸတ်းႁဵတ်းပၢင်ပွႆးပီႊမႂ်ႇတႆး ၵိၼ်ၶဝ်ႈႁူမ်ႈမူႇၵၼ်​​​​သေ မီးပၢင်မူၼ်ႈသိူဝ်း တၢင်းၵႃႈၾိင်ႈငႄႈၾိင်ႈထုင်းလႄႈ ႁွင်ႉၵႂၢမ်းပၢၼ်မႂ်ႇ ​​တေႃႇထိုင်ယၢမ်းတဵင်ႈၶိုၼ်း​ သူင်ႇသင်ႇပီႊၵဝ်ႇ ႁပ်ႉၸဵင်ပီႊမႂ်ႇၵႂႃႇၼႆယဝ်ႉ။

တႆးလွတ်ႈလႅဝ်း