ၵူဝ်းရီးယႃးၸၢၼ်း ပိုၼ်ၽၢဝ်ႇ ၸႂ်ႉတိုဝ်းပိူင်မႃႇသျႄႇလေႃးၸွတ်ႇတူဝ်ႈၸိုင်ႈမိူင်း

မိူဝ်ႈဝၼ်းထီႉ 3 December 2024 (လိူၼ်ၸဵင်မႂ်ႇ 3 ၶမ်ႈ ပီႊတႆး 2119 ၼီႈ) ၼၼ်ႉ ၸွမ်ၸိုင်ႈၵူဝ်းရီးယႃးၸၢၼ်း Yoon Seok-yeol ပိုၼ်ၽၢဝ်ႇၸႂ်ႉတိုဝ်းပိူင်မႃႇသျႄႇလေႃး (Martial Law) ၸွတ်ႇတူဝ်ႈမိူင်းၵူဝ်းရီးယႃးၸၢၼ်း ပိူဝ်ႈတႃႇၵႅတ်ႇၶႄႁႄႉၵင်ႈ လွင်ႈပူၼ်ႉပႅၼ်ၵူဝ်းရီးယႃးႁွင်ႇ လႄႈ ၸုမ်းသၢၼ်ၶတ်းလူင်ပွင်ၸိုင်ႈ ဢၼ်တေၵႅတ်ႇပႅတ်ႈ လွင်ႈလွတ်ႈလႅဝ်း ဢိၵ်ႇတင်း လွင်ႈယူႇသႃႇမူၼ်ႈၸႂ်ၶွင် ၵူၼ်းမိူင်းၵူဝ်းရီးယႃးၸၢၼ်း ၼႆယဝ်ႉ။

ၵဵဝ်ႇလူၺ်ႈလွင်ႈၼႆႉ ယူႇတီႈပႃႇတီႇၵၢၼ်မိူင်း Democratic Party ဢၼ်ဢမ်ႇၸႂ်ႈပႃႇ တီႇၽၢႆႇလူင်ပွင်ၸိုင်ႈ (ၽၢႆႇၶၢၼ်ႉ) ၼၼ်ႉ ဢွၵ်ႇမႃးလၢတ်ႈဝႃႈ လွင်ႈပိုၼ်ၽၢဝ်ႇၼႆႉ မၼ်းၽိတ်းပၵ်းပိူင် လႄႈ ပဵၼ်ၵၢၼ်ႁဵတ်းသၢင်ႈဢၼ်ပူၼ်ႉပႅၼ် ပိူင်ၶွတ်ႇၽွတ်ႈ ပိူင်ငဝ်ႈပိုင်းမိူင်း ဢိၵ်ႇတင်း မၢႆမီႈတၢင်ႇၸိူဝ်းထႅင်ႈသေ တေလႆႈဝႃႈ ပဵၼ်ၵၢၼ်ယိုတ်း ဢၢမ်းၼၢတ်ႈၼင်ႇၸႅင်ႈလႅင်း ဝႃႈၼႆ။

ဝၢႆးသေၸွမ်ၸိုင်ႈၵူဝ်းရီးယႃးၸၢၼ်း ပိုၼ်ၽၢဝ်ႇၸႂ်ႉတိုဝ်းပိူင်မႃႇသျႄႇလေႃးယဝ်ႉ ဢမ်ႇႁိုင်သင် မီးၵူၼ်းမိူင်းဢွၵ်ႇမႃးၼႄၵၢင်ၸႂ်သၢၼ်ၶတ်း ႁႂ်ႈပူတ်းထွၼ်ပႅတ်ႈ ပိူင်မႃႇသျႄႇလေႃး လႄႈ ၵမ်ႈၽွင်ႈႁွင်ႉသႅၼ်ႇ ႁႂ်ႈတီႉၺွပ်းၸွမ်ၸိုင်ႈၵူဝ်းရီးယႃး ၸၢၼ်း Yoon Seok-yeol ထႅင်ႈ ၼႆယဝ်ႉ။

ၼွၵ်ႈလိူဝ်သေၼႆႉ မိူဝ်ႈမီးၶေႃႈသင်ႇၸႂ်ႉတိုဝ်းပိူင်မႃႇသျႄႇလေႃးယဝ်ႉ တပ်ႉသိုၵ်း ၵူဝ်းရီးယႃးၸၢၼ်း ဢွၵ်ႇၶေႃႈၸီႉသင်ႇ ႁၢမ်ႈႁႂ်ႈၼႂ်းသၽႃး လႄႈ ပႃႇတီႇၵၢၼ်မိူင်း ဢွၵ်ႇတူင်ႉၼိုင်သေ ဢၼ်ပဵၼ်သိုဝ်ႇၶၢဝ်ႇၸိူဝ်းၼႆႉၵေႃႈ တေလႆႈယူႇၽၢႆႇတႂ်ႈလွင်ႈ ၵုမ်းၵမ် ပိူင်မႃႇသျႄႇလေႃး ဝႃႈၼႆ။

ၸိူင်ႉႁိုဝ်ၵေႃႈလီ ၸွမ်းၼင်ႇပိူင်ငဝ်ႈပိုင်းမိူင်း မိူင်းၵူဝ်းရီးယႃးၸၢၼ်း မီးဝႆႉၼၼ်ႉ သင်ၸိူဝ်ႉ ၽူႈၶဝ်ႈၸုမ်းသၽႃး ဢွၵ်ႇသဵင်ၵၢင်ၸႂ် ဢမ်ႇႁၼ်လီ ၼမ်လိူဝ်သေ ဢၼ်ႁၼ်လီၸွမ်းၼႆၸိုင် ဢၼ်ပဵၼ်ၸွမ်ၸိုင်ႈၵေႃႈ တေလႆႈဢွၵ်ႇၶေႃႈသင်ႇ ပူတ်းထွၼ်ပႅတ်ႈၶိုၼ်း ၼႆယဝ်ႉ။

ထိုင်မႃးမိူဝ်ႈၼႆႉဝၼ်းထီႉ 4 December 2024 ယၢမ်းၵၢင်ၼႂ်ၸဝ်ႉ 4:30 မူင်း ၸွမ်းၼင်ႇ ၶၢဝ်းယၢမ်းၼႂ်းပိုၼ်ႉတီႈၼၼ်ႉ ၸွမ်ၸိုင်ႈၵူဝ်းရီးယႃးၸၢၼ်း ၶိုၼ်းလႆႈပိုၼ်ၽၢဝ်ႇ ပူတ်းထွၼ်ပႅတ်ႈၶိုၼ်း ပိူင်မႃႇသျႄႇလေႃး ဝၢႆးသေ မီးသဵင်ၵၢင်ၸႂ်ၼႂ်းသၽႃး 190 သဵင် ဢမ်ႇႁၼ်လီၸွမ်း ဝႃႈၼႆ။

လွင်ႈပိုၼ်ၽၢဝ်ႇၸႂ်ႉတိုဝ်းပိူင်မႃႇသျႄႇလေႃးပွၵ်ႈၵမ်းၼႆႉ တေလႆႈဝႃႈ ပဵၼ်ပွၵ်ႈဢွၼ် တၢင်းသုတ်း တႄႇၸဵမ်မိူဝ်ႈပီႊ 1980 မႃးၼၼ်ႉ ၼႆယဝ်ႉ။

ၽူႈၼမ်းၽၢႆႇဢမ်ႇၸႂ်ႈလူင်ပွင်ၸိုင်ႈ (ၽၢႆႇၶၢၼ်ႉ) လၢတ်ႈပၼ်ၾၢင်ႉဝႃႈ လွင်ႈၼႆႉ မၼ်းဢမ်ႇပႆႇယဝ်ႉ လႄႈ ပိုၼ်ၽၢဝ်ႇတေႁူမ်ႈမိုဝ်းၸွမ်းပႃႇတီႇတၢင်ႇဢၼ်သေ ပူတ်း Yoon Seok-yeol ဢွၵ်ႇပႅတ်ႈၼႂ်းတၼ်းႁဵင်ၸွမ်ၸိုင်ႈ ဝႃႈၼႆ။

တႆးလွတ်ႈလႅဝ်း