သိုၵ်းမၢၼ်ႈပွႆႇမၢၵ်ႇသႂ်ႇၵူၼ်းမိူင်း ၽွင်းၵၢတ်ႉၶဝ်ႈၵၢပ်ႇ

မိူဝ်ႈဝၼ်းထီႉ 2 December 2024 (လိူၼ်ၸဵင်မႂ်ႇ 2 ၶမ်ႈ ပီႊတႆး 2119 ၼီႈ) ယၢမ်းၵၢင်ၼႂ် မွၵ်ႈ 10:00 မူင်း ၸုမ်းသိုၵ်းမၢၼ်ႈ ဢဝ်တရူၼ်းသေ ၵႂႃႇပွႆႇမၢၵ်ႇသႂ်ႇ ၵူၼ်းမိူင်း ဢၼ်တိုၵ်ႉၵၢၼ်ႉၶဝ်ႈၵၢပ်ႇတီႈဝၢၼ်ႈၼွင်ယိၼ်း ၸႄႈဝဵင်းသီႇသႅင်ႇ ဝႃႈၼႆ။

ၵဵဝ်ႇၵပ်းလူၺ်ႈလွင်ႈၼႆႉသေ ၸုမ်းသိုၵ်းပဢူဝ်း PNLA ပိုၼ်ၽၢဝ်ၵႂႃႇဝႃႈ ၽွင်းၵူၼ်းမိူင်းၼႃႈႁိူၼ်းလင်ၼိုင်ႈ တိုၵ်ႉဢဝ်ၶဝ်ႈၵၢပ်ႇတီႈၼႂ်းသူၼ်ယူႇၼၼ်ႉ ၸုမ်းသိုၵ်းမၢၼ်ႈ ဢဝ်တရူၼ်းၵႂႃႇပွႆႇမၢၵ်ႇသႂ်ႇလႄႈ ႁဵတ်းႁႂ်ႈသွင်ၵေႃႉမႄႈလုၵ်ႈ လူႉတၢႆထင်တီႈ ၵေႃႉပဵၼ်ပေႃႈလုၵ်ႈဢွၼ်ႇၼၼ်ႉ လႆႈတိူဝ်ႉၸပ်း ၸၢၵ်ႇမၢၵ်ႇၸွမ်းၸိူဝ်းတူဝ် လႄႈ မၢတ်ႇၸဵပ်းႁၢဝ်ႈႁႅင်းဝႆႉ ဝႃႈၼႆ။

မိူဝ်ႈဝၼ်းထီႉ 1 December 2024 ၼၼ်ႉၵေႃႈ သင်ႇၶၸဝ်ႈ ၶီႇၵႃးသေ ႁွတ်ႈၽႅဝ်ၵႂႃႇတီႈသဵၼ်ႈတၢင်းလူင် ၵႄႈၵၢင်သီႇသႅင်ႇ−လွႆၵေႃႇၼၼ်ႉ မီးၸုမ်းယိပ်းၵွင်ႈၵၢင်ႇ ဢဝ်ၵွင်ႈယိုဝ်းလႄႈ ႁဵတ်းႁႂ်ႈသင်ႇၶၸဝ်ႈ လႆႈလွၼ်ႇၵႂႃႇပႃးၼိုင်ႈ၊ မၢတ်ႇၸဵပ်းႁၢဝ်ႈႁႅင်း 2 ပႃး၊ ၵဵဝ်ႇၵပ်းလူၺ်ႈလွင်ႈၼႆႉ ၸုမ်းသိုၵ်းမၢၼ်ႈတင်းၸုမ်းလုၵ်ႉၽိုၼ်ႉ ၵုမ်ႇဢဝ်တၢင်းၽိတ်းၼႄးသႂ်ႇၵၼ် ၵႂႃႇၵႂႃႇမႃးမႃးလႄႈ ဢမ်ႇမီးၸုမ်းလႂ်ႁပ်ႉဢဝ်ပုၼ်ႈၽွၼ်း ၼႆယဝ်ႉ။

တင်ႈတႄႇၼႂ်းႁၢင်လိူၼ် November 2024 မႃးၼႆႉ ၸုမ်းသိုၵ်းမၢၼ်ႈ လႄႈ ၸုမ်းသိုၵ်းပဢူဝ်း PNLA မီးလွင်ႈၶဵင်ႈၶႅင်ၵၢၼ်သိုၵ်းၶိုၼ်း ၸွမ်းပိုၼ်ႉတီႈသီႇသႅင်ႇ၊ မွၵ်ႇမႆႇၸိူဝ်းၼႆႉယူႇယဝ်ႉ။

တႆးလွတ်ႈလႅဝ်း