သိုၵ်းၶူဝ်းၶဵဝ် SSPP တိုၵ်ႉသိုပ်ႇတီႉၺွပ်းၵူၼ်းမိူင်း လႄႈ ပေႉၵိၼ်ၵူၼ်းမိူင်းတႆး

မိူဝ်ႈၼႆႉဝၼ်းထီႉ 6 December 2024 (လိူၼ်ၸဵင်မႂ်ႇ 6 ၶမ်ႈ ပီႊတႆး 2119 ၼီႈ) ၸုမ်းသိုၵ်း SSPP လေႃးပႃးသိုၵ်းတၢင်ႇၸုမ်းၼၼ်ႉ ၵႂႃႇတဵၵ်းၺွပ်းဢဝ် ၵူၼ်းဝၢၼ်ႈၵူၼ်းမိူင်း တီႈဝၢၼ်ႈၼမ်ႉၶူၵ်ႉ လႄႈ ဝၢၼ်ႈၼႃးပုင်ႇ ဢိူင်ႇၼႃးပုင်ႇ ၸႄႈဝဵင်းႁူဝ်ပူင်း ၸိုင်ႈတႆးပွတ်းၸၢၼ်း။

ၵဵဝ်ႇၵပ်းလူၺ်ႈလွင်ႈၼႆႉ ၸုမ်းသိုၵ်း SSPP ဢဝ်ႁႅင်းသိုၵ်းၵႂႃႇတီႉၺွပ်းဢဝ် ၵူၼ်းမိူင်း ဝၢၼ်ႈၼႃးပုင်ႇ 10 ၵေႃႉ၊  တီႉၺွပ်းပႃး ပႃႈယူင်ႇ တီႈဝၢၼ်ႈၼမ်ႉၶူၵ်ႉ လႄႈ ၽူႈၸၢႆးၼႂ်းဝၢၼ်ႈတႄႉ ၺႃးၺွပ်းၵႂႃႇလၢႆၵေႃႉၼႆၼၼ်ႉ ဢမ်ႇပႆႇလႆႈႁူႉၸွမ်း၊ ယွၼ်ႉလွင်ႈတၢင်းသင်သေ ၸုမ်းသိုၵ်း SSPP ၵႂႃႇတဵၵ်းၺွပ်းဢဝ်ၵူၼ်းမိူင်း ၼၼ်ႉၵေႃႈ ဢမ်ႇပႆႇလႆႈႁူႉၸွမ်းမိူၼ်ၵၼ်။

ၽွင်းၸုမ်းသိုၵ်းၶူဝ်းၶဵဝ် ၵႂႃႇတီႉၺွပ်းၵူၼ်းဝၢၼ်ႈၼႃးပုင်ႇၼၼ်ႉ လႆႈလၢတ်ႈဢွၵ်ႇ သူပ်းၵႂႃႇဝႃႈ “လွင်ႈလုင်းႁဵင်ၸၢမ်ႇဢွင်ႇ ၺႃးယိုဝ်းတၢႆၼၼ်ႉ ပဵၼ်ၵွပ်ႈၵူၼ်းဝၢၼ်ႈ 2 ဝၢၼ်ႈၼႆႉယဝ်ႉ သင်ႁူႉၽႂ်ပဵၼ်ၸႂ် RCSS လဵင်ႉၶဝ်ႈ RCSS ၵေႃႈ တေယိုဝ်းတၢႆပႅတ်ႈၵမ်းလဵဝ်” ဝႃႈၼႆပၼ်တီႈၵူၼ်းမိူင်း ဢိူင်ႇၼႃးပုင်ႇ။

မိူဝ်ႈဝၼ်းထီႉ 26 November 2024 ၸုမ်းသိုၵ်းၶူဝ်းၶဵဝ် SSPP ၵႂႃႇမၢပ်ႇၼႄးဝႃႈ လုင်းႁဵင်ၼၼ်ႇတီႇ+ပႃႈၸၢမ်ႇ ဝၢၼ်ႈလၢင်းလူင် ဢိူင်ႇမိူင်းလၢင်း ၸႄႈဝဵင်းႁူဝ်ပူင်း ပဵၼ်ၸႂ်သိုၵ်း RCSS လဵင်ႉၶဝ်ႈ RCSS ၼႆလႄႈ တဵၵ်းသိမ်းဢဝ်လၢႆပႅတ်ႈ ႁိူၼ်း၊ သူၼ်ႁႆႈ (ၶဝ်ႈၵၢပ်ႇပႆႇလႆႈၵၢၼ်ႉ)၊ တူင်ႈၼႃး (ၶဝ်ႈပႆႇလႆႈပၢတ်ႇ)၊ ၵႃးၸၢၵ်ႈထႆ 1 လမ်း၊ ၶူဝ်းၶွင်ၼႂ်းႁိူၼ်း (တူၵ်းမႅၼ်ႈမွၵ်ႈသၢင်ႉငိုၼ်း 200 သႅၼ်ပျႃး) မိူဝ်ႈလဵဝ် လုင်းႁဵင်ၶဝ်တင်းႁိူၼ်း လႆႈႁူပ်ႉၺႃးလွင်ႈတုၵ်ႉၶ ယွၼ်ႉသိုၵ်း SSPP ဝႆႉယူႇယဝ်ႉ။

ထႅင်ႈလွင်ႈၼိုင်ႈၵေႃႈ ဝၢႆးသေ ၸၢႆးၸၢမ်ႇဢွင်ႇ ၵေႃႉပဵၼ်လုင်းႁဵင် ဢိူင်ႇၼႃးပုင်ႇ ၸႄႈဝဵင်းႁူဝ်ပူင်း ၺႃးယိုဝ်းတၢႆယဝ်ႉၼၼ်ႉ ၸုမ်းသိုၵ်း SSPP ၶိုၼ်းပိုၼ်ၽၢဝ်ႇၵႂႃႇဝႃႈ မိူဝ်ႈဝၼ်းထီႉ 30 November 2024 တူၵ်းမႅၼ်ႈဝၼ်း လိူၼ်သိပ်းသွင်လပ်း   ၶၢဝ်းယၢမ်း ၵၢင်ၶမ်ႈ 19:30 မူင်း မႅၼ်ႈၽွင်းပေႃႈမႄႈၵူၼ်းမိူင်း ၼႂ်းဢိူင်ႇၼႃးပုင်ႇ ၶွၼ်ႈၵၼ်တီႈဝတ်ႉၵျွင်းၼႃးပုင်ႇ ႁႆႇၵွင် ႁႆႇမွင်း ႁဵတ်းပွႆးပႂ်ႉႁပ်ႉၸဵင် ယူႇၼၼ်ႉ ၽူႈၵွၼ်းဢိူင်ႇၼႃးပုင်ႇ လုၵ်ႉတီႈပွႆးႁပ်ႉၸဵင်သေ ဢွၵ်ႇမိူဝ်းလႄႇပူႇၵၢင်ႉ ဝၢၼ်ႈၼႃးပုင်ႇယဝ်ႉမိူဝ်ႈၶိုၼ်း လုၵ်ႉႁိူၼ်းပူႇၵၢင်ႉဝၢၼ်ႈၼႃးပုင်ႇ ၶီႇလူတ်ႉၶိူင်ႈ ပွၵ်ႈမိူဝ်းတီႈႁိူၼ်း မိူဝ်ႈႁွတ်ႈၽႅဝ် တီႈၽၢႆႇတူၵ်းၸဝ်ႈမိူင်းဝၢၼ်ႈၼႃးပုင်ႇ ၶၢဝ်းယၢမ်း ၵၢင်ၶမ်ႈ  10:30 မူင်းၼၼ်ႉ ၸုမ်းသိုၵ်း RCSS ပႂ်ႉမူၵ်းယိုဝ်း လႄႈ ထိုင်တီႈလႆႈလူႉတၢႆထင်တီႈ ႁိမ်းၽၢႆႇလင်ၸဝ်ႈမိူင်း ဝၢၼ်ႈၼႃးပုင်ႇ ၊ သိုပ်ႇၵႂႃႇတီႉၺွပ်း ၸၢႆးပၼ်ႇတိ ဢႃႇယု 31 ပီႊ ၵေႃႉပဵၼ်ၽူႈမၢႆဢိူင်ႇ ဝႃႈၼႆ။

ၵဵဝ်ႇၵပ်းလူၺ်ႈလွင်ႈၸိူဝ်းၼႆႉသေ တၢင်းၽၢႆႇ RCSS ဢမ်ႇလႆႈႁူႉၸွမ်းလွင်ႈပိူင်ပဵၼ်တႄႉတႄႉ လႄႈ လွင်ႈၵၢၼ်ၵႂႃႇၵၢၼ်မႃး ၶၢဝ်းယၢမ်း ၸၢႆးၸၢမ်ႇဢွင်ႇ ၺႃးယိုဝ်း၊ ဢွင်ႈတီႈပဵၼ်ၸိူဝ်းၼၼ်ႉၵေႃႈ တၢင်းၽၢႆႇ RCSS ဢမ်ႇလႆႈႁပ်ႉႁူႉတႅတ်ႈတေႃး မိူၼ်ၼင်ႇ SSPP ပိုၼ်ၽၢဝ်ႇဝႆႉၼၼ်ႉ လႄႈ တိုၵ်ႉၸင်ႇမႃးႁပ်ႉႁူႉဝၢႆးသေ မီးၶၢဝ်ႇလိုဝ်းၵၼ်ၼႆႉၵူၺ်းယူႇယဝ်ႉ။

တႆးလွတ်ႈလႅဝ်း