SSPP ယိုဝ်းတၢႆၽူႈယွမ်းသိုၵ်း RCSS လႄႈ ၵူၼ်းမိူင်း

မိူဝ်ႈဝၼ်းထီႉ 26 November 2024 (လိူၼ်သိပ်းသွင်လွင်ႈ 11 ၶမ်ႈ ပီႊတႆး 2118 ၼီႈ) ၸုမ်းသိုၵ်းၶူဝ်းၶဵဝ် SSPP ႁူမ်ႈပႃးသိုၵ်းတၢင်ႇၸုမ်း ယိုဝ်းတၢႆပႅတ်ႈၽူႈယွမ်းသိုၵ်း ၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး RCSS/SSA လႄႈ ယိုဝ်းတၢႆပႃးၵူၼ်းမိူင်း ဢၼ်ဢမ်ႇမီးတၢင်းၽိတ်းသင် တီႈဝၢၼ်ႈၵျွၵ်ႉငၢၵ်ႈ ဢိူင်ႇမိူင်းပဵင်း ၸႄႈဝဵင်းႁူဝ်ပူင်း ၸိုင်ႈတႆးပွတ်းၸၢၼ်း။

ၸွမ်းၼင်ႇလႅင်ႇၶၢဝ်ႇၼႂ်းပိုၼ်ႉတီႈပွင်ႇမႃးဝႃႈ မိူဝ်ႈယၢမ်းၵၢင်ၼႂ်ၸဝ်ႉ ဢမ်ႇပႆႇထိုင် 01:00 မူင်းၼၼ်ႉ ၸုမ်းသိုၵ်း SSPP ဢၼ်မီးဝႆႉႁႅင်းၵူၼ်း 80 ပၢႆ သွၵ်ႈတဝ်လိုပ်ႈလမ်း ၵေႃႉသိုၵ်းၵေႃႉႁၢၼ် RCSS တီႈၵျွၵ်ႉငၢၵ်ႈ လႄႈ ၵမ်းၼၼ်ႉသိုၵ်းႁၢၼ် RCSS 2 ၵေႃႉ ၸိုဝ်ႈ ၸၢႆးသိူဝ်ၶမ်း၊ ၸၢႆးဢွင်ႇတူႇ  ထုၵ်ႇၺႃးဝႅတ်ႉယဝ်ႉသေ ထၢင်ႇဝႃႈ တေဢမ်ႇႁဵတ်းၵၼ်ထိုင်တၢႆၼႆ လႄႈ လႆႈယွမ်းသိုၵ်း ပၼ်တီႉၺွပ်းၵႂႃႇလီလီ ယူႇယဝ်ႉ။

ၵူၺ်းၼႃႇဢမ်ႇပဵၼ်မႃးၸွမ်းၼင်ႇ သိုၵ်းႁၢၼ် RCSS ထၢင်ႇဝႆႉၼၼ်ႉလႄႈ လႆႈၶၢမ်ႇတၢင်းၸုမ်းသိုၵ်း SSPP တဵၵ်းၸႂ်ႉၵႂႃႇၼႄတပ်ႉပၢင်သဝ်း RCSS ယဝ်ႉသေ ၶိုၼ်းယိုဝ်းၶႃသွင်ၵေႃႉတၢႆပႅတ်ႈ ၼႂ်းဝၼ်းၼၼ်ႉၵမ်းလဵဝ်၊ ဝၢႆးသေ ၸုမ်းသိုၵ်း SSPP ႁူႉတီႈယူႇ RCSS ယဝ်ႉၵေႃႈ သဵင်ၵွင်ႈလႆႈတႅၵ်ႇ တီႈၽၢႆႇၸၢၼ်း ဝၢၼ်ႈၵျွၵ်ႉငၢၵ်ႈ၊ ထိုင်ၵၢင်ၼႂ်မႃး ၸုမ်းသိုၵ်း SSPP ၶိုၼ်းၶဝ်ႈၵႂႃႇတီႈၼႂ်းဝၢၼ်ႈၵျွၵ်ႉငၢၵ်ႈ ႁွင်ႉဢဝ်ၵူၼ်းမိူင်းၵႂႃႇၸူႉတုမ်ၵၼ်သေ ၶိုၼ်းသွၵ်ႈယႃႉၵဝ်းႁိူၼ်းၵူၼ်းမိူင်း ဢဝ်လၢႆၶူဝ်းၶွင်ၵူၼ်းမိူင်း၊ ၵမ်းၼၼ်ႉ ၶိုၼ်းၵႂႃႇၼႄး လုင်းၸဵင်ႇလုၼ်ႇ ဝႃႈၵဵဝ်ႇၶွင်ႈ ၸုမ်းသိုၵ်း RCSS လႄႈ မတ်ႉဢဝ်တူဝ်မၼ်းၵႂႃႇယိုဝ်းတၢႆတီႈၼွၵ်ႈဝၢၼ်ႈ ယူႇယဝ်ႉ။

ဝၢႆးသေ ၵူၼ်းမိူင်း၊ ၽူႈယွမ်းသိုၵ်း RCSS 2 ၵေႃႉ ထုၵ်ႇယိုဝ်းတၢႆယဝ်ႉၼၼ်ႉ ၵူၼ်းဝၢၼ်ႈ ဢမ်ႇမီးလွင်ႈလွတ်ႈၽေးယဝ်ႉလႄႈ ၶိုၼ်းဢွၼ်ၵၼ် ၶၢႆႉပၢႆႈၵႂႃႇၵေႃႉတီႈၵေႃႉတၢင်းသေ မိူဝ်ႈလဵဝ် ဝၢၼ်ႈၵျွၵ်ႉငၢၵ်ႈ ႁၢမ်းဝႆႉယူႇယဝ်ႉ။

မိူဝ်ႈပူၼ်ႉမႃးၸိူဝ်းၼၼ်ႉ တၢင်းၽၢႆႇ RCSS ယၢမ်ႈတီႉၺွပ်းလႆႈ ၵူၼ်းသိုၵ်း SSPP လၢႆပွၵ်ႈလၢႆၵမ်း ၸွမ်းၸိူဝ်းၼႂ်းၸႄႈဝဵင်းႁူဝ်ပူင်း လႄႈ ၵွပ်ႈပိူဝ်ႈ ပဵၼ်တႆးၼင်ႇၵၼ်ၵေႃႈပိူင်ၼိုင်ႈ ယိူင်းၸူးၵၢၼ်ၽွမ်ႉႁူမ်ႈၵေႃႈပိူင်ၼိုင်ႈလႄႈ လႆႈႁွင်ႉဢဝ်ၵူၼ်းဝၢၼ်ႈၵူၼ်းမိူင်း မႃးႁူႉႁၼ်ပဵၼ်သၢၵ်ႈသေႇလၵ်းထၢၼ်သေယဝ်ႉ ပွႆႇပၼ်ၶိုၼ်းၵေႃႈမီးတင်းၼမ်၊ ၵူၼ်းသိုၵ်း SSPP ၸိူဝ်းလၵ်ႉပၢႆႈဢွၵ်ႇတပ်ႉသေ ၵႂႃႇၸူး RCSS ၼၼ်ႉၵေႃႈ ယူႇတီႈၽူႈမီးပုၼ်ႈၽွၼ်း RCSS လႆႈတူၺ်းထိုင်လုမ်းလႃးပၼ်လီလီ လႄႈ ႁဵတ်းပၼ်ပႃးၸွမ်းၼင်ႇၵၢင်ၸႂ်ၶဝ် ၶႂ်ႈလႆႈၶႂ်ႈပဵၼ်ၼၼ်ႉယူႇယဝ်ႉ။

တင်ႈတႄႇၼႂ်းလိူၼ် October 2024 မႃးၼႆႉ ၸုမ်းသိုၵ်း SSPP ႁူမ်ႈပႃးသိုၵ်းတၢင်ႇၸုမ်း ၸွပ်ႇသွၵ်ႈတပ်ႉပၢင်သဝ်း တပ်ႉသိုၵ်းၸိုင်ႈတႆး RCSS/SSA ၸွမ်းၸိူဝ်း ၼႂ်းၸႄႈဝဵင်းလွၵ်ႉၸွၵ်ႇ၊ ၸႄႈဝဵင်းႁူဝ်ပူင်း ဢမ်ႇၵိုတ်းဢမ်ႇလိုဝ်ႈ လႄႈ ၵူၼ်းမိူင်းဢွၼ်ၵၼ်မႆႈၸႂ် ၵူဝ်သိုၵ်း 2 ၸုမ်း သိုပ်ႇပဵၼ်ပၢင်တိုၵ်းၵၼ်ႁၢဝ်ႈႁႅင်း ၼႂ်းၽွင်းငဝ်းလၢႆးၵူၼ်းမိူင်း လူဝ်ႇဢဝ်ၶဝ်ႈၼမ်ႉတင်းၵိၼ် ၼႆယဝ်ႉ။

တႆးလွတ်ႈလႅဝ်း