ဢၵျၢင်ႉတၢင်းယၢမ်ႈ 6 မဵဝ်း ဢၼ်ႁဵတ်းႁႂ်ႈပီး

မၢင်ၸိူဝ်း​​တေထၢင်ႇထိူမ်ဝႃႈ ယွၼ်ႉသင်လႄႈ ​​တေလႆႈၵုမ်းထိင်းလွင်ႈၵိၼ် ဢမ်ႇၼၼ် ဢွၵ်ႇဢဵၼ်ႁႅင်းယဝ်ႉ ၵူၺ်းၵႃႈ တိုၵ်ႉႁၼ်ဝႃႈ ၼမ်ႉၼၵ်းၸဝ်ႈၵဝ်ႇဢမ်ႇယွမ်းလူင်း ဢမ်ႇၼၼ် ႁၢင်ႈၾၢင်ၸဝ်ႈၵဝ်ႇ ဢမ်ႇလႅၵ်ႈလၢႆႈ ၸွမ်းၼင်ႇမုင်ႈမွင်းဝႆႉ တီႈတႄႉဢၵျၢင်ႉတၢင်းယၢမ်ႈ လွင်ႈၸႂ်ႉၸၢတ်ႈပၢၼ်ႁဝ်း ၵူႈဝၼ်းၼၼ်ႉ ၸၢင်ႈပဵၼ်ငဝ်ႈႁၢၵ်ႈ ဢၼ်ႁဵတ်းႁႂ်ႈ ၼမ်ႉၼၵ်းတူဝ်ႁဝ်းၶိုၼ်ႈမႃး လူၺ်ႈဢမ်ႇႁူႉတူဝ် ၼၼ်ႉယဝ်ႉ ဢမ်ႇဝႃႈပဵၼ်လွင်ႈၵိၼ်ၸိၵ်းꧦ ၸွၵ်း ꧦ   လွင်ႈဢၼ်ၵဵဝ်ႉတၢင်းၵိၼ်ဝႆး ဢမ်ႇၼၼ် ၶၢၼ်တႃၼွၼ်း ဢၵျၢင်ႉၸိူဝ်းၼႆႉမီးၽွၼ်းၸႃႉ​​တေႃႇပၢႆးယူႇလီ လႄႈ ၼမ်ႉၼၵ်းတူဝ်ၸဝ်ႈၵဝ်ႇ တင်းသဵင်ႈယဝ်ႉ၊ ဢၵျၢင်ႉၸိူဝ်းၼၼ်ႉ ပဵၼ်(6) ပိူင်ၼင်ႇၽၢႆႇတႂ်ႈၼႆႉ −

1. ၵိၼ်ဝႆးႁႅင်းပူၼ်ႉ

လွင်ႈၵိၼ်တၢင်းၵိၼ်ဝႆးႁႅင်းပူၼ်ႉတီႈ ႁဵတ်းႁႂ်ႈႁဝ်းဢမ်ႇတၼ်းႁူႉတူဝ်ဝႃႈ တူဝ်ၶိင်းလႆႈႁပ်ႉသၢၼ်ဢႁႃႇရ တဵမ်ထူၼ်ႈ လႄႈ လွင်ႈၼႆႉ ၸၢင်ႈႁဵတ်းႁႂ်ႈႁဝ်း ၵိၼ်ၼမ်ပူၼ်ႉလိူဝ် ဢၼ်ႁဝ်းထုၵ်ႇလီၵိၼ် လၢႆးၵႄႈလိတ်ႈမၼ်းတႄႉ ႁႂ်ႈၵဵဝ်ႉတၢင်းၵိၼ်ဢွၼ်ႇ ꧦ ၵိၼ်လွႆးꧦၼိုင်ႈဢူမ်ႉၼႆႉ ႁႂ်ႈၵဵဝ်ႉမွၵ်ႈ 20-30 ပွၵ်ႈ/ၵမ်း ၼင်ႇႁိုဝ် ႁူင်းၶဝ်ႈ​​တေႁဵတ်းၵၢၼ်လႆႈလီ လႄႈ ၸွႆႈႁႂ်ႈဢွၵ်း​​ဢေႃၸဵဝ်းဢိမ်ႇ ၼႆယူႇယဝ်ႉ ။

2. ၵိၼ်တၢင်းၵိၼ်ယွႆႈယႅမ်းၶွပ်ႉၶႅပ်ႉ

မီးဢၵျၢင်ႉတၢင်းယၢမ်ႈ ၵျိူၵ်ႈၵိၼ်ၶဝ်ႈမုၼ်း ဢမ်ႇၼၼ် တၢင်းၵိၼ်ၶွပ်ႉꧦ ၶႅပ်ႉꧦတၢင်းၵိၼ်ယွႆႈယႅမ်း လႄႈ  ၸၢင်ႈႁဵတ်းႁႂ်ႈႁဝ်းၵႆႉ ꧦ ၵိၼ် ထိုင်တီႈႁႅင်းၼႂ်းတူဝ်ၼမ်ပူၼ်ႉတီႈ လၢႆးဢၼ်လီတီႈသုတ်းၼၼ်ႉ ထုၵ်ႇလီ ယႃႇသိုဝ်ႉၶဝ်ႈမုၼ်းဝႆႉတီႈႁိူၼ်း ဢမ်ႇၼၼ် တီႈႁဵတ်းၵၢၼ် သင်ဝႃႈၶႂ်ႈၵိၼ်ၸိုင် ထုၵ်ႇလီၵိၼ်ပၼ် မၢၵ်ႇမႆႉ ၊ ထူဝ်ႇဢၼ်မီးၽွၼ်းလီၸိူဝ်းၼၼ်ႉ တႅၼ်းတၢင်ဢဝ်ၼႆယဝ်ႉ။

3. ၵိၼ်ၸွမ်းၸႂ်

မၢင်ၸိူဝ်း မီးလွင်ႈၶမ်ၸႂ်သုၵ်ႉၸႂ် ၊ မီးလွင်ႈ သိူဝ်းၸႂ် ၊ မိူဝ်းလွင်ႈတူၵ်းသုမ်း ၊မီးလွင်ႈဢွင်ႇမၢၼ် ငဝ်းလၢႆးလႂ်သေဢမ်ႇဝႃႈ တေဢဝ်တၢင်းၵိၼ်ၼႆႉပဵၼ်တီႈယႃၸႂ် ပဵၼ်တီႈမူၼ်ႈၸႂ်လႄႈ တေၵိၼ်ပူၼ်ႉ ၵိၼ်လူၼ်ႉလိူဝ်ဢၼ်တူဝ်ၶိင်းလူဝ်ႇၵႂႃႇပႅတ်ႈ ၵွပ်ႈၼၼ် ၽိူဝ်ႇတႃႉတေဢဝ်လွင်ႈၵိၼ်ယႅမ်ႉ ႁဵတ်းပဵၼ်လၢႆးတၢင်း တႃႇပွႆႇၽႃႈပႅတ်ႈ လွင်ႈၶမ်ၸႂ် ပိူင်လူင်မၼ်း မိူဝ်ႈမီးလွင်ႈၶီၸႂ် ၸႂ်သုၵ်ႉသၵ်ႉ ဢမ်ႇၼၼ် ဢိမ်ႇၸၢၼ်ႈ ၽိူဝ်ႇတႃႉတေၵိၼ်မိူဝ်ႈၸႂ်ဢမ်ႇလီၼၼ်ႉ ႁဝ်းထုၵ်ႇလီ ပႆတၢင်းလဵၼ်ႈ ၊ ဢၢၼ်ႇလိၵ်ႈ ဢမ်ႇၼၼ် ထွမ်ႇၵႂၢမ်း တွၼ်ႈတႃႇ​​တေလိုမ်းပႅတ်ႈလွင်ႈၵိၼ်တၢင်းၵိၼ် လၢႆးၼႆႉ ငိုၼ်းၵေႃႈဢမ်ႇသဵင်ႈၼမ် ပၢႆးယူႇလီၵေႃႈဢမ်ႇတုမ်ႉတိူဝ်ႉ သမ်ႉပၢႆလႆႈတၢင်းႁုၸွမ်းထႅင်ႈလူးၵွၼ်ႇယဝ်ႉ။

4. ၼွၼ်းလိုၵ်း / ၵိၼ်လိုၵ်း

ဝၼ်လႂ်ဢၼ်ႁဝ်း ဢမ်ႇလႆႈၼွၼ်းလပ်းတဵမ်ထူၼ်ႈပဵင်း​​ပေႃး ဢမ်ႇၼၼ် ၼွၼ်းလိုၵ်းၼၼ်ႉၵေႃႈ ဝၼ်းၼၼ်ႉ ၾၢင်ႉတူၺ်းလႃႈ ​​တူဝ်ၶိင်းႁဝ်းတေ ၶႂ်ႈၵိၼ်ၶႂ်ႈယႅမ်ႉသေ ႁဝ်းၵိၼ်တၢင်းၵိၼ်ၼမ်လိူဝ်ၵူႈဝၼ်း  ၵွပ်ႈၼၼ် ထုၵ်ႇလီၼွၼ်း တီႈဢေႇသုတ်း 8 ၸူဝ်ႈမူင်း​​တေႃႇၶိုၼ်း ၼင်ႇႁိုဝ် တေၸွႆႈႁႂ်ႈ ႁေႃႇမူၼ်း ၵုမ်းထိင်းလႆႈ လႄႈ ႁဵတ်းႁႂ်ႈၸႂ်ၶႂ်ႈၵိၼ်ယွမ်းလူင်း။

5. ဢမ်ႇၵိၼ်ၶဝ်ႈၼႂ်

ၶဝ်ႈၼႂ်ၼႆႉ လမ်ႇလွင်ႈတႃႇတူဝ်ၶိင်း ဢွၵ်းဢေႃၵူၼ်းႁဝ်းၼႃႇ သင်ဢမ်ႇၵိၼ်ၶဝ်ႈၼႂ်ၼႆ​​ထၢတ်ႈၵိူဝ်ဝၢၼ်ၼႂ်းလိူတ်ႈတေတူၵ်း လႄႈ ႁဵတ်းႁႂ်ႈႁဝ်းၵိၼ်ၼမ်ႁႅင်းပူၼ်ႉမိူဝ်ႈ​​ၵိၼ်ၵိၼ်ၶဝ်ႈဝၼ်း  ယွၼ်ႉၼၼ် ထုၵ်ႇလီၵိၼ်ၶဝ်ႈၼႂ်ႁႂ်ႈၵုမ်ႇထူၼ်ႈလႄႈ ၵိၼ်ႁႂ်ႈပႃးထၢတ်ႈဢႁႃႇရတၢင်းၵိၼ် 5 မဵဝ်း တႃႇႁႂ်ႈလႆႈႁပ်ႉႁႅင်းၶၢမ်ႇတူဝ် လႄႈ ၸွႆႈၵုမ်းထိင်းပၼ် ၼမ်ႉၼၵ်းတူဝ်။

6. ၵိၼ်ၼမ်ႁႅင်းပူၼ်ႉ

လွင်ႈၵိၼ်ၼမ်ႁႅင်းပူၼ်ႉၼႆႉ ပဵၼ်ငဝ်ႈႁၢၵ်ႈလမ်ႇလွင်ႈ ဢၼ်ႁဵတ်းႁႂ်ႈၼမ်ႉၼၵ်းတူဝ်ႁဝ်းၶိုၼ်ႈ ၵွပ်ႈၼၼ် ႁဝ်းလူဝ်ႇၽိုၵ်းၵိၼ်ႁႂ်ႈပဵင်း​​ပေႃးၵူၺ်း  ဢမ်ႇထုၵ်ႇလီၵိၼ်လူၼ်ႉ ၵိၼ်လိူဝ် ဢိၵ်ႇတင်း ၼင်ႇႁိုဝ် ၶူင်ႉသၢင်ႈၶိုတ်ႈယိူဝ်ႇႁဝ်း တေႁဵတ်းၵၢၼ်လႆႈလီ ဢိၵ်ႇတင်း ၸွႆႈလူတ်းယွမ်းပၼ် ဢမ်ႇႁႂ်ႈၶႆမၼ်းၼႂ်းတူဝ် ၶေႃႇၼမ်ႁႅင်းပူၼ်ႉလိူဝ်ဢၼ်တူဝ်ၶိင်းလူဝ်ႇၼႆယဝ်ႉ။

ပိၼ်ႇတႅမ်ႈ -လၢဝ်ၽွင်း

တႆးလွတ်ႈလႅဝ်း

ဢၢင်ႈဢိင် – bpksamutprakan