ၸုမ်း SSPP ၾႆးၸုတ်ႇႁိူၼ်းၵူၼ်းမိူင်း လႄႈ မိူဝ်ႈၼႆႉပဵၼ်ဝၼ်းလိုၼ်းသုတ်း တႃႇၵူၼ်းမိူင်းတေလႆႈပၢႆႈ

ၵူၼ်းမိူင်းၸိုင်ႈတႆးပွတ်းႁွင်ႇ တူၵ်းတၢင်းယၢပ်ႇၽိုတ်ႇ ထိုင်တီႈတုၵ်ႉၶ ပဵၼ်ၼမ်ႉႁူႉၼမ်ႉတႃ လူဝ်ႇတၢင်းၸွႆႈထႅမ် တႃႇမီးႁူမ်ႇလူမ်ႈယူႇၼၼ်ႉ တၢင်းၽၢႆႇၸုမ်းသိုၵ်းၶူဝ်းၶဵဝ် SSPP သမ်ႉႁူမ်ႈတင်းသိုၵ်းတၢင်ႇၸုမ်းသေ လိုပ်ႈႁေႃႈၵူၼ်းမိူင်း မတ်ႉၵူၼ်းမိူင်း ႁႅမ်တၢႆၵူၼ်းမိူင်း တီႈၼႂ်းၸိုင်ႈတႆးပွတ်းၸၢၼ်း။

မိူဝ်ႈဝၼ်းထီႉ 5 December 2024  (လိူၼ်ၸဵင်မႂ်ႇ 5 ၶမ်ႈ ပီႊတႆး 2119 ၼီႈ) ယၢမ်းၵၢင်ၶမ်ႈ 19:00 မူင်း ၸၢႆးၼေႃႇသႅင်မိူင်း ၸဝ်ႈၸႄႈဝဵင်း 35 SSPP ၸီႉသင်ႇႁႂ်ႈ ၸၢႆးၸၢႆး ဢွၼ်ဢဝ်ႁႅင်းသိုၵ်းသေ ၵႂႃႇၸုတ်ႇၽဝ်ပႅတ်ႈႁိူၼ်း လုင်းႁဵင်ၼၼ်ႇတီႇ+ပႃႈၸၢမ်ႇ တီႈဝၢၼ်ႈလၢင်းလူင် ဢိူင်ႇမိူင်းလၢင်း ၸႄႈဝဵင်းႁူဝ်ပူင်း လႄႈ ၵၢဝ်ႇၼႄးဝႃႈ ယွၼ်ႉမီးၸႂ်ပဵၼ်ၽၢႆႇ RCSS ဝႃႈၼႆ၊ ၽွင်းမိူဝ်ႈ ၸၢႆးၸၢႆး ၸုတ်ႇၽဝ်ႁိူၼ်းၼၼ်ႉၵေႃႈ လၢတ်ႈတေႃႇၼႃႈ ၵူၼ်းတင်းၼမ်ဝႃႈ “သူၶဝ်တူၺ်းဝႆႉလီလီ ပေႃးၽႂ်ပဵၼ်ၸႂ် RCSS တေၺႃးၸုတ်ႇၽဝ်မိူၼ်ၼႆ” ဝႃႈၼႆယူႇယဝ်ႉ။

လုင်းႁဵင်ၼၼ်ႇတီႇ ဢိူင်ႇမိူင်းလၢင်းၼႆႉ ၸုမ်းသိုၵ်းၶူဝ်းၶဵဝ် SSPP ယၢမ်ႈတီႉမတ်ႉပေႃႉထုပ်ႉ ဢဝ်ၵႂႃႇသႂ်ႇၶွၵ်ႈ တီႈဝၢၼ်ႈၵၢတ်ႇၽုၺ်း ၸႄႈဝဵင်းမိူင်းၵိုင် မိူဝ်ႈလိူၼ် February 2023 လႄႈ ၸင်ႇလႆႈလွတ်ႈဢွၵ်ႇၶွၵ်ႈမႃးၶိုၼ်း မိူဝ်ႈၼႂ်းလိူၼ် June 2023 ယူႇယဝ်ႉ၊ ထိုင်ဝၼ်းထီႉ  26 November 2024  ၸၢႆးၼေႃႇသႅင်မိူင်း ၸဝ်ႈၸႄႈဝဵင်း 35  SSPP ၵႂႃႇယိုတ်းဢဝ်ပႅတ်ႈ ႁိူၼ်း လုင်းၼၼ်ႇတီႇ+ပႃႈၸၢမ်ႇ သိမ်းပႅတ်ႈၸၢၵ်ႈထႆ၊ ၶူဝ်းၶွင်ၼႂ်းႁိူၼ်း ပႃးၸဵမ်တီႈလိၼ်ၽုၵ်ႇသွမ်ႈ သူၼ်ႁႆႈၼႃး  (ၶဝ်ႈပႆႇလႆႈပၢတ်ႇ/ၶဝ်ႈၵၢပ်ႇပႆႇလႆႈဢဝ်) ဢၼ်ယၢမ်ႈလႆႈငိုၼ်းၼိုင်ႈပီႊ တႃႇသၢင်ႉငိုၼ်း 900 သႅၼ်ပျႃး ထိုင် 1,000 သႅၼ်ပျႃး ၼၼ်ႉယူႇယဝ်ႉ။

မိူဝ်ႈဝၼ်းထီႉ 5 February 2024 ၸဝ်ႈႁၢၼ်သေႃး ၽူႈၵွၼ်းတပ်ႉၸုမ်း 798 လႄႈ ၸဝ်ႈသူႉ ၵႅမ်တပ်ႉၸုမ်း ဢိၵ်ႇပႃး ၽူႈဢွၼ်ႁူဝ်သိုၵ်းတၢင်ႇၸုမ်း ဢွၼ်ႁႅင်းၵူၼ်းသေ ၶဝ်ႈၵႂႃႇတီႈဝၢၼ်ႈၼႃးပုင်ႇ လႄႈ ၵႂႃႇမတ်ႉဢဝ် လုင်းၵၢင်ႉဢႃႇလေႃးၵႃႉ၊ ၸၢႆးသူႉလၢဝ် ၵႅမ်လုင်းၵၢင်ႉ၊ ၸၢႆးသႅင်၊ ၸၢႆးပဵတ်း၊ ၸၢႆးဢႃႇလီႉယႃႉ၊ ၸၢႆးၶၼ် ၶဝ်ၸိူဝ်းၼႆႉလႄႈ ပေႃႉႁႅမ်လုင်းၵၢင်ႉႁၢဝ်ႈႁႅင်း သေယႃႇပေႁႂ်ႈၸွႆႈထႅမ် RCSS ဝႃႈၼႆ၊ ၶိုၼ်းသိုပ်ႇၵႂႃႇတီႈ ဝၢၼ်ႈၼမ်ႉၶူၵ်ႉ လႄႈ ၺွပ်းပႃးပူႇၵၢင်ႉဝၢၼ်ႈ၊ သမ်ႉလိုပ်ႈပႅတ်ႈထႅင်ႈၵူၼ်းမိူင်း (မွၵ်ႈ 10 လင်ပၢႆ) ဢၼ်ၸုမ်း SSPP ဢမ်ႇၵဵၵ်ႈၼၼ်ႉ ႁႂ်ႈၶၢႆႉပၢႆႈဢွၵ်ႇဝၢၼ်ႈ ဝၼ်းထီႉ 10 December 2024 ပဵၼ်ဝၼ်းၵမ်းလိုၼ်းသုတ်း သင်ဢမ်ႇၶၢႆႉဢွၵ်ႇ တေယိုဝ်းတၢႆပႅတ်ႈၵမ်းလဵဝ် ဝႃႈၼႆ။

ၵူၼ်းမိူင်းဝၢၼ်ႈၼမ်ႉၶူၵ်ႉ ၸိူဝ်းဢမ်ႇမီးတၢင်းၽိတ်းသင်ၼၼ်ႉ ယွၼ်ႉဢမ်ႇၽွင်းလိူဝ်လႆႈ ဢႃႇၼႃႇဢၢမ်းၼၢတ်ႈၶွင် SSPP လႄႈ ဢွၼ်ၵၼ်သိမ်းၶူဝ်းလဵင်း ပႅတ်ႈသူၼ်ႁႆႈၼႃးသေ ၶၢႆႉပၢႆႈဢွၵ်ႇဝၢၼ်ႈဢမ်ႇယွမ်းမွၵ်ႈ 10 ႁိူၼ်းၼႆႉယဝ်ႉ။

မိူဝ်ႈဝၼ်းထီႉ 26 November 2024 ၸုမ်းသိုၵ်း SSPP ယိုဝ်းတၢႆပႅတ်ႈသိုၵ်းႁၢၼ်  RCSS 2 ၵေႃႉ ဢၼ်ယွမ်းသိုၵ်းတေႃႇ SSPP လႄႈ သမ်ႉႁႅမ်တၢႆပႃးထႅင်ႈ လုင်းၸဵင်ႇလုၼ်ႇ တီႈဝၢၼ်ႈၵျွၵ်ႉငၢၵ်ႈ ဢိူင်ႇမိူင်းပဵင်း ၸႄႈဝဵင်းႁူဝ်ပူင်း ၸိုင်ႈတႆးပွတ်းၸၢၼ်း။

တႆးလွတ်ႈလႅဝ်း