ၶႄႇ သူင်ႇႁိူဝ်းတိုၵ်း ဢိူမ်ႈၸမ်ၵုၼ်ႇထႆႇဝၼ်ႇႁၢဝ်ႈႁႅင်း

မိူဝ်ႈဝၼ်းထီႉ 10 December 2024 (လိူၼ်ၸဵင်မႂ်ႇ 10 ၶမ်ႈ ပီႊတႆး 2119 ၼီႈ) ၼၼ်ႉ ယူႇတီႈၽူႈတၢင်လၢတ်ႈ ႁွင်ႈၵၢင်လူင်ၽၢႆႇၵႅတ်ႇၶႄထႆႇဝၼ်ႇ ဢွၵ်ႇမႃးလၢတ်ႈဝႃႈ ၼႂ်းပိုၼ်ႉတီႈ ၵုၼ်ၵျႃႇပၢၼ်ႇပွတ်းၸၢၼ်း တေႃႇပေႃးထိုင် ပၢင်ႇလၢႆႇၶႄႇပွတ်းၸၢၼ်း ၼၼ်ႉ မီးတပ်ႉၼမ်ႉၶႄႇၶဝ်ႈတူင်ႉၼိုင်တင်းၼမ် လႄႈ တေလႆႈဝႃႈ ပဵၼ်လွင်ႈပူၼ်ႉ ပႅၼ်တေႃႇထႆႇဝၼ်ႇ ပႅၵ်ႉသမ်ႉဝႃႈ ၶႄႇဢမ်ႇလႆႈပိုၼ်ၽၢဝ်ႇၽိုၵ်းၽွၼ်ႉသိုၵ်းၵေႃႈ ယဝ်ႉ ဝႃႈၼႆ။

ၵဵဝ်ႇလူၺ်ႈလွင်ႈၼႆႉ ၽၢႆႇတပ်ႉသိုၵ်းၶႄႇ ယင်းပႆႇဢွၵ်ႇမႃးလၢတ်ႈပၼ်တၢင်းႁၼ်ထိုင် သင်ၸွမ်းလႄႈ ဢမ်ႇလႆႈယိုၼ်ယၼ်ဝႃႈ ၸွင်ႇတေမီးၵၢၼ်ၽိုၵ်းၽွၼ်ႉသိုၵ်းယူႇႁိုဝ် ၼႆၼင်ႇၵဝ်ႇ။

ႁိူဝ်းတိုၵ်း လႄႈ ႁိူဝ်းလဵပ်ႈယၢမ်းၸွမ်းၽင်ႇပၢင်ႇလၢႆႇၶွင် ၶႄႇ ဢၼ်တူင်ႉၼိုင်ယူႇ ၼႂ်းပွတ်းတွၼ်ႈၼႆႉ တေမီးယူႇမွၵ်ႈ 90 လမ်း ၸိူဝ်းၼႆႉသေ ပဵၼ်ဢၼ်လီမႆႈၸႂ်ႁႅင်းဝႆႉ ဢိၵ်ႇတင်း လိူဝ်သေထႆႇဝၼ်ႇယဝ်ႉ ၶႄႇယင်းယိူင်းပဝ်ႉမၢႆၵႂႃႇတီႈ တၢင်ႇၸိုင်ႈမိူင်း ၼႂ်းပွတ်းတွၼ်ႈၼႆႉပႃးထႅင်ႈၼႆ လႅင်ႇၶၢဝ်ႇၽၢႆႇလွင်ႈမၼ်ႈၼိမ်သဝ်းထႆႇဝၼ်ႇ လၢတ်ႈၼင်ႇၼႆ။

မိူဝ်ႈၼႂ်းဝၼ်းထီႉ 10 December 2024 ၼၼ်ႉ ထႆႇဝၼ်ႇ ၵူတ်ႇထတ်းႁၼ် ႁိူဝ်းမိၼ်တိုၵ်းၶႄႇ 47 လမ်း၊ ႁိူဝ်းမွၵ်ႈ 20 လမ်း ပၼ်ႇလဵပ်ႈၸွမ်းၵုၼ်ထႆႇဝၼ်ႇ ၼႆယဝ်ႉ။

ၽၢႆႇတၢင်းၽူႈလူင်ႉလႅၼ်ႇၶဝ်လၢတ်ႈဝႃႈ ၶႄႇ တေၸၢင်ႈတႄႇၽိုၵ်းၽွၼ်ႉသိုၵ်း ထႅင်ႈ တႃႇၼႄဢွၵ်ႇ လွင်ႈဢမ်ႇပဵင်းပေႃးႁၢၼ်ႉၸႂ် ဢၼ်ၸွမ်ၸိုင်ႈထႆႇဝၼ်ႇ လႆႉ ၶျိင်းတိူဝ် ဢွၵ်ႇၶၢဝ်းတၢင်းၵႂႃႇတီႈၸိုင်ႈမိူင်း ၼႂ်းၵုၼ်ပႄႇသိၾိၵ်ႇ လႄႈ ဢၼ်တေၵႂႃႇဝႄႉ ပႃးတီႈမိူင်းဢမေႇရိၵၢၼ်ႇၼၼ်ႉ ဝႃႈၼႆ။

တႆးလွတ်ႈလႅဝ်း