သိုၵ်းမၢၼ်ႈပွႆႇမၢၵ်ႇသႂ်ႇၵူၼ်းမိူင်း မၢတ်ႇၸဵပ်းလူႉတၢႆ

မိူဝ်ႈဝၼ်းထီႉ 10  December 2024 (လိူၼ်ၸဵင်မႂ်ႇ 10 ၶမ်ႈ ပီႊတႆး 2119 ၼီႈ) ၸုမ်းသိုၵ်းမၢၼ်ႈ ယိုဝ်းမၢၵ်ႇလူင်ၶဝ်ႈၵႂႃႇတီႈၼႂ်းပွၵ်ႉ 1 ဝဵင်းၼွင်ၶဵဝ် လႄႈ ၸၢၵ်ႇမၢၵ်ႇတႅၵ်ႇတိူဝ်ႉၸပ်း ၵူၼ်းမိူင်းတၢႆ 1 ၵေႃႉ။

ၵူၼ်းမိူင်းၼႂ်းပိုၼ်ႉတီႈလၢတ်ႈၼႄဝႃႈ မိူဝ်ႈယၢမ်းၵၢင်ဝၼ်း 11:00 မူင်း ၸုမ်းသိုၵ်းမၢၼ်ႈ ၸိူဝ်းမီးတီႈတပ်ႉပၢင်သဝ်းၶဝ် (ပၢၼ်ႇပူၺ်း) ၼၼ်ႉ ယိုဝ်းမၢၵ်ႇလူင်သေ ၵႂႃႇတူၵ်းတီႈၼႂ်းပွၵ်ႉ 1 လႄႈ တိူဝ်ႉၸပ်းၺႃး ဢူးၽူဝ်းသျုၵ်ႉ ဢႃႇယု 52 ပီႊ လႆႈလူႉတၢႆထင်တီႈၵႂႃႇၵမ်းလဵဝ် ဝႃႈၼႆ။

မိူဝ်ႈဝၼ်းထီႉ 9 December 2024 ၼၼ်ႉၵေႃႈ ၸုမ်းသိုၵ်းမၢၼ်ႈ ယိုဝ်းမၢၵ်ႇလူင်ၶဝ်ႈၵႂႃႇ တီႈၼႂ်းဝၢၼ်ႈသၢမ်ႇမႃႇသႄႇ ဢိူင်ႇသၢမ်ႇမႃႇသႄႇ ၸႄႈဝဵင်းၼွင်ၶဵဝ် လႄႈ မၢၵ်ႇၵႂႃႇတူၵ်းတႅၵ်ႇတီႈႁိမ်း ႁူင်းႁဵတ်းၵိူဝ်ဝၢၼ် မၢႆ−1 သေ မီးၵူၼ်းႁဵတ်းၵၢၼ် လႆႈမၢတ်ႇၸဵပ်း 3 ၵေႃႉ ၼႆယဝ်ႉ။

တီႈၼႂ်းၸႄႈဝဵင်းၼွင်ၶဵဝ်ၼႆႉ ၸုမ်းသိုၵ်းမၢၼ်ႈလႄႈၸုမ်းသိုၵ်း TNLA တိုၵ်ႉသိုပ်ႇၶဵင်ႈၶႅင်ၵၢၼ်သိုၵ်းၵၼ်သေ တၢင်းၽၢႆႇၸုမ်းသိုၵ်း TNLA ယိုၼ်ႈမိုဝ်းတႃႇဢုပ်ႇ လွင်ႈငမ်းယဵၼ်ၵၼ်တင်း သိုၵ်းမၢၼ်ႈသေတႃႉ ၽၢႆႇသိုၵ်းမၢၼ်ႈ ဢမ်ႇပႆႇတွပ်ႇသင်သေၶေႃႈ ၼႆယဝ်ႉ။

တႆးလွတ်ႈလႅဝ်း