ႁႅင်းၵၢၼ်ယၢၼ်မိူင်း ၺႃးမိတ်ႈတႅင်းၼႃႈဢူၵ်း တၢႆထင်တီႈ ၼႂ်းမိူင်းထႆး

မိူဝ်ႈဝၼ်းထီႉ 12 December 2024 (လိူၼ်ၸဵင်မႂ်ႇ 12 ၶမ်ႈ ပီႊတႆး 2119 ၼီႈ) မီးႁႅင်းၵၢၼ်ယၢၼ်မိူင်း မိူင်းႁူမ်ႈတုမ်ၵေႃႉၼိုင်ႈ ထုၵ်ႇၺႃးဢဝ်မိတ်ႈတႅင်း ပၵ်းၶမ်ၼႃႈဢူၵ်း လူႉသဵင်ႈတၢႆထင်တီႈ ယူႇၼႂ်းႁွင်ႈၶၢတ်ႈ ၼႂ်းၵိဝ်ႇ သူႇၶုမ်ဝိတ်ႉ 29 ပွၵ်ႉ 5 ဢိူင်ႇၼႃးၵိူဝ် ၸႄႈဝဵင်းပၢင်းလႃႉမုင်း ၸႄႈတွၼ်ႈသျူၼ်းပူးရီး မိူင်းထႆး ၼႆယဝ်ႉ။

ႁႅင်းၵၢၼ်ယၢၼ်မိူင်း ဢၼ်လူႉသဵင်ႈတၢႆၼၼ်ႉ ၸိုဝ်ႈႁွင်ႉ ၸေႃးဝိၼ်းၶျိတ်ႉ ဢႃႇယု 26 ပီႊ လႄႈ ဢၼ်ပဵၼ်တႆးၵေႃႉ ယူႇႁူမ်ႈႁွင်ႈလဵဝ်ၵၼ်ၼၼ်ႉ 2 ၵေႃႉ လႆႈလၢတ်ႈဝႃႈ ဢွၼ်တၢင်းၼႆႉ ၸေႃးဝိၼ်းၶျိတ်ႉ ယူႇၼႂ်းႁွင်ႈႁင်းၵူၺ်းသေ ၶႃသွင်ၵေႃႉသမ်ႉ ဢွၵ်ႇၵႂႃႇႁႃသိုဝ်ႉတၢင်းၵိၼ်တၢင်းၼွၵ်ႈ လႄႈ မိူဝ်ႈပွၵ်ႈမႃးၶိုၼ်းၼၼ်ႉ လႆႈထူပ်းႁၼ် မၼ်းၸၢႆးၼွၼ်းတၢႆဢိူၵ်ႇလိူတ်ႈဝႆႉယဝ်ႉ ဝႃႈၼႆ။

ဝၢႆးသေၼၼ်ႉ ၽၢႆႇတၢင်းၸဝ်ႈၼႃႈတီႈပလိၵ်ႈထႆး ၸင်ႇလႆႈႁွင်ႉဢဝ်ၶႃသွင်ၵေႃႉ ၵႂႃႇတွင်ႈထၢမ်တီႈႁူင်းပလိၵ်ႈၼႆသေတႃႉ ဢမ်ႇပႆႇၸၢင်ႈတႅပ်းတတ်းလႆႈဝႃႈ လွင်ႈတၢင်းမၼ်း ပဵၼ်ၸိူဝ်ႉႁိုဝ်တႄႉတႄႉ  မၼ်းၸၢႆးၶႃႈတူဝ်တၢႆႁႃႉ ဢမ်ႇၼၼ် မီးၵူၼ်းၶႃႈႁႅမ်တၢႆႁိုဝ်  လႄႈ ၽၢႆႇပလိၵ်ႈထႆးၶဝ် တေၼႅတ်ႈၵူတ်ႇထတ်း တႃႇႁႃငိူၼ်ႈငဝ်ႈလွင်ႈပဵၼ်တႄႉမၼ်းၵႂႃႇ ၼႆယဝ်ႉ။

တႆးလွတ်ႈလႅဝ်း