သၽႃး ၵူဝ်းရီးယႃးၸၢၼ်း ႁၼ်လီပူတ်း ယုၼ်သွၵ်ႉယွၼ်ႈ ဢွၵ်ႇၼႂ်းတၼ်းႁဵင်း

မိူဝ်ႈဝၼ်းထီႉ 15 December 2024 (လိူၼ်ၸဵင်မူၼ်း ပီႊတႆး 2119 ၼီႈ) ၼၼ်ႉ သိုဝ်ႇၶၢဝ်ႇၼွၵ်ႈမိူင်း လၢႆးငၢၼ်း ၵဵဝ်ႇလူၺ်ႈလွင်ႈၽူႈၶဝ်ႈၸုမ်းသၽႃး ၵူဝ်းရီးယႃး ၸၢၼ်း ဢွၼ်ၵၼ်လူင်းသဵင်ၵၢင်ၸႂ် ပူတ်းထွၼ် ယုၼ်သွၵ်ႉယွၼ်ႈ ဢွၵ်ႇပႅတ်ႈ ၼႂ်းတၼ်းႁဵင်းၸွမ်ၸိုင်ႈၵူဝ်းရီးယႃးၸၢၼ်း မိူဝ်ႈၼႂ်းဝၼ်းထီႉ 14 December 2024 သေ မီးသဵင်ႁၼ်လီၵမ်ႉထႅမ် 204 သဵင် ဢမ်ႇႁၼ်လီ 85 သဵင် ၼႆယဝ်ႉ။

ဝၢႆးသေမီးသဵင်ႁၼ်လီၵမ်ႉထႅမ်ၼမ်လိူဝ်ယဝ်ႉ ၽၢႆႇတၢင်းလုမ်းတြႃးသုင်သုတ်း ၵူဝ်းရီးယႃးၸၢၼ်း တေဝူၼ်ႉသွၼ်ႇ ၸွင်ႇတေပူတ်း ယုၼ်သွၵ်ႉယွၼ်ႈ ဢွၵ်ႇၼႂ်း တၼ်းႁဵင်းၸွမ်ၸိုင်ႈၵူဝ်းရီးယႃးၸၢၼ်း ၼင်ႇပဵၼ်တၢင်းၵၢၼ်ယူႇႁိုဝ် ၼႆယဝ်ႉ။

ၼႂ်းၽွင်းယၢမ်းတိုၵ်ႉပႂ်ႉ ၶေႃႈတႅပ်းတတ်းတီႈလုမ်းတြႃးယူႇၼၼ်ႉ ယုၼ်သွၵ်ႉယွၼ်ႈ တေလႆႈၵိုတ်းလိုဝ်ႈၼႃႈတီႈပုၼ်ႈၽွၼ်းဝႆႉ လႄႈ တေပဵၼ် ၸွမ်ၽွင်းလူင် Han Dak-seo တေႁပ်ႉပုၼ်ႈၽွၼ်းပဵၼ်ၸွမ်ၸိုင်ႈဝႆႉၸူဝ်ႈၶၢဝ်း ဝႃႈၼႆ။

ၵဵဝ်ႇလူၺ်ႈလွင်ႈၼႆႉ လႆႈမီးမႃးဝၢႆးသေ မိူဝ်ႈဝၼ်းထီႉ 3 December 2024 ၼၼ်ႉ ယုၼ်သွၵ်ႉယွၼ်ႈ ၸွမ်ၸိုင်ႈၵူဝ်းရီးယႃးၸၢၼ်း လႆႈပိုၼ်ၽၢဝ်ႇၸႂ်ႉတိုဝ်းပိူင်မႃႇသျႄႇ လေႃး ၵူၺ်းမီးသဵင်ၵၢင်ၸႂ်ၼႂ်းသၽႃး 190 သဵင် ဢမ်ႇႁၼ်လီၸွမ်းလႄႈ ယုၼ်သွၵ်ႉယွၼ်ႈ ၶိုၼ်းလႆႈပိုၼ်ၽၢဝ်ႇပူတ်းထွၼ်ပႅတ်ႈ ပိူင်မႃႇသျႄႇလေႃး ၼႂ်းဝၼ်းထီႉ 4 December 2024 ယၢမ်းၵၢင်ၼႂ်ၸဝ်ႉ 4:30 မူင်း ၸွမ်းၼင်ႇၶၢဝ်းယၢမ်း ၼႂ်းပိုၼ်ႉတီႈ ၼႆယဝ်ႉ။

တႆးလွတ်ႈလႅဝ်း