ၵူၼ်းသိုၵ်းၵူဝ်းရီးယႃးႁွင်ႇ လူႉတၢႆၼႂ်းပၢင်တိုၵ်းယူႇၶရဵၼ်း ၼပ်ႉႁူဝ်ႁဵင်

မိူဝ်ႈဝၼ်းထီႉ 26 December 2024 (လိူၼ်ၸဵင်လွင်ႈ 11 ၶမ်ႈ ပီႊတႆး 2119 ၼီႈ) ၽၢႆႇတၢင်းယူႇၶရဵၼ်း လႆႈလၢတ်ႈဝႃႈ လွင်ႈယူႇၶရဵၼ်း ပိုတ်းယိုဝ်းသႂ်ႇၼႂ်းပွတ်းတွၼ်ႈ Kursk ၼၼ်ႉ ႁဵတ်းႁႂ်ႈၵူဝ်းရီးယႃးႁွင်ႇ ဢၼ်ၵႂႃႇၸွႆႈထႅမ်ရၢတ်ႉသျႃး တီႈၼႂ်းပၢင်တိုၵ်း ၼၼ်ႉ လႆႈတူၵ်းသုမ်းၵူၼ်းသိုၵ်းၵႂႃႇတင်းၼမ် လႄႈ မီးလွင်ႈၶွင်ႉၶမ်ၵဵဝ်ႇၵပ်း ၶေႃႈမုၼ်း ၵၢၼ်တေႃႉသူင်ႇ လႄႈ ၶိူင်ႈယိပ်းတိုဝ်း ၸိူဝ်းၼႆႉ ၼႆယဝ်ႉ။

မိူဝ်ႈလၢႆဝူင်ႈပူၼ်ႉမႃးၼၼ်ႉ ၽၢႆႇယူႇၶရဵၼ်းဢွၵ်ႇလၢႆးငၢၼ်းၶၢဝ်ႇ ၵဵဝ်ႇလူၺ်ႈလွင်ႈ ၵူဝ်းရီးယႃးႁွင်ႇ သူင်ႇၵူၼ်းသိုၵ်း 10,000−12,000 ၵေႃႉ ၵႂႃႇၸွႆႈထႅမ် ရၢတ်ႉသျႃး တီႈၼႂ်းပၢင်တိုၵ်းဢၼ်ယိုတ်ႈယၢဝ်းမႃးၶၢဝ်တၢင်း ၸမ် 3ပီႊၼႆႉသေ ထိုင်မႃးဝၼ်းထိ  23 December 2024 ၼၼ်ႉ ယူႇတီႈၸွမ်ၸိုင်ႈယူႇၶရဵၼ်း သေႇလႅၼ်ႇသၵီႇ လႆႈဢွၵ်ႇမႃးလၢတ်ႈဝႃႈ ၼႂ်းပၢင်တိုၵ်း ရၢတ်ႉသျႃး−ယူႇၶရဵၼ်း ပွတ်းတွၼ်ႈ Kursk ၼၼ်ႉ  ၵူၼ်းသိုၵ်းၵူဝ်းရီးယႃးႁွင်ႇ လႆႈမၢတ်ႇၸဵပ်းလူႉသဵင်ႈတၢႆ မွၵ်ႈ3,000 ၵေႃႉ  ဝႃႈၼႆ။

ပၢင်တိုၵ်း ၵႄႈၵၢင်ရၢတ်ႉသျႃး−ယူႇၶရဵၼ်း ယင်းတိုၵ်ႉႁၢဝ်ႈႁႅင်း မိူၼ်ၼင်ႇ မိူဝ်ႈၼႂ်ဝၼ်းထီႉ 25 December 2024 ပူၼ်ႉမႃး ဢၼ်ရၢတ်ႉသျႃးပွႆႇမၢၵ်ႇလူင် 78 လုၵ်ႈ လႄႈ တရူၼ်း 106 လမ်း သႂ်ႇႁူင်းႁဵတ်းဢွၵ်ႇၾႆးၾႃႉလၢႆတီႈ လႆႈလုလႅဝ်တင်းၼမ် သေ ႁဵတ်းႁႂ်ႈၵူၼ်းမိူင်းယူႇၶရဵၼ်းပွတ်းဢွၵ်ႇ မွၵ်ႈ 1 လၢၼ်ႉလင်ႁိူၼ်းပၢႆ ဢမ်ႇမီးၾႆးၾႃႉၸႂ်ႉၸူဝ်ႈၶၢဝ်းသေ မၢင်ၸိူဝ်း လႆႈဢွၼ်ၵၼ်ပၢႆႈၵႂႃႇယူႇၸွမ်း တႃႈလူတ်ႉၾႆးၾႃႉတႂ်ႈလိၼ် လႄႈ ၽၢႆႇယူႇၶရဵၼ်းၵေႃႈ လႆႈၸႂ်ႉတရူၼ်းလႄႈ မၢၵ်ႇလူင်ပိုတ်းယိုဝ်းသႂ်ႇ ရၢတ်းသျႃးမိူၼ်ၵၼ်ယူႇၼႆယဝ်ႉ။

ၵဵဝ်ႇလူၺ်ႈပၢင်တိုၵ်းယူႇၶရဵၼ်းၼႆႉ ယူႇတီႈလူင်ပွင်ၸိုင်ႈ ၸွမ်ၸိုင်ႈဢမေႇရိၵၢၼ်ႇ ၵျူဝ်း ပၢႆႇတႅၼ်ႇ လႆႈမိပ်ႇဢီးႁႂ်ႈသူင်ႇလွင်ႈၸွႆႈထႅမ်ပၼ်ယူႇၶရဵၼ်းၼမ်တီႈသုတ်း ၼင်ႇပဵၼ်လႆႈ ၸူဝ်ႈ တူဝ်ႇၼႄႇ ထရမ်ႉ ပႆႇလႆႈၶိုၼ်ႈႁပ်ႉတၼ်းႁဵင်း ပဵၼ်ၸွမ်ၸိုင်ႈ ဢမေႇရိၵၢၼ်ႇ ပဵၼ်တၢင်းၵၢၼ်ၼၼ်ႉ ၼႆယဝ်ႉ။

တႆးလွတ်ႈလႅဝ်း