ၸၢႆးၼုမ်ႇမိူင်းထႆး ၵိၼ်လဝ်ႈၼမ်ႁႅင်းပူၼ်ႉတီႈ လူႉသဵင်ႈတၢႆ

မိူဝ်ႈၼႆႉဝၼ်းထီႉ 26 December 2024 (လိူၼ်ၸဵင်လွင်ႈ 11 ၶမ်ႈ ပီႊတႆး 2119 ၼီႈ) သိုဝ်ႇၶၢဝ်ႇထႆး ဢွၼ်ၵၼ်လၢႆးငၢၼ်း ၵဵဝ်ႇလူၺ်ႈလွင်ႈ ပႅင်းၶ် လဵတ်းသ်တိူဝ်ႉရ် (แบงค์ เลสเตอร์) ၵေႃႉဢၼ်ပဵၼ် Influencer ၸၢႆးၼုမ်ႇၵူၼ်းထႆး ၵေႃႉဢၼ် Rap ႁွင်ႉၵႂၢမ်းၶၢႆသွႆႉမွၵ်ႇလဵင်ႉမႄႈထဝ်ႈ သေ ၸိုဝ်ႈသဵင်လိုဝ်းလင်မႃးလႄႈ ဝၢႆးၼၼ်ႉမီးၵူၼ်းၵႆႉၵႆႉၸၢင်ႈ ႁႂ်ႈမၼ်းၸၢႆးၵိၼ်တၢင်းၵိၼ် မဵဝ်းဢၼ်လၢၵ်ႇလၢႆး ၸိူဝ်းၼၼ်ႉ မၼ်းၸၢႆးလႆႈလူႉသဵင်ႈတၢႆ မိူဝ်ႈၼႆႉယၢမ်းၵၢင်ၼႂ်ၸဝ်ႉမွၵ်ႈ 3:40 မူင်း (ၶၢဝ်းယၢမ်းမိူင်းထႆး) ယွၼ်ႉမီးၵူၼ်းဢဝ်ငိုၼ်း 30,000 ဝၢတ်ႇ ၸၢင်ႈႁႂ်ႈမၼ်းၸၢႆး ၵိၼ်လဝ်ႈမူတ်းပႅပ်ႉၵမ်းလဵဝ် ၼႆယဝ်ႉ။

ၸွမ်းၼင်ႇၽၢႆႇပၢႆးယူႇလီၶဝ် ၵႆႉၵႆႉဢွၵ်ႇမႃးၾၢင်ႉဝႃႈ ပေႃးဢိုၵ်ႉၵိၼ်လဝ်ႈၼမ် ဝႆးႁႅင်းပူၼ်ႉတီႈ ၼႂ်းၶၢဝ်းယၢမ်းပွတ်းပွတ်းၼၼ်ႉ ယၢမ်ႈမီးၵူၼ်းလူႉသဵင်ႈတၢႆမႃး လၢႆၵေႃႉယဝ်ႉမိူၼ်ၵၼ် ဝႃႈၼႆ။

လဝ်ႈၼႆႉ ပေႃးၵိၼ်ဝႆး ၵိၼ်ၼမ်ပူၼ်ႉတီႈၸိုင် ယွၼ်ႉတူဝ်ၶိင်းဢမ်ႇမီးၶၢဝ်းယၢမ်း လၢင်ႉ Alcohol ၼႂ်းတူဝ်ၶိင်းဢွၵ်ႇပႅတ်ႈလႆႈတင်းမူတ်းလႄႈ တေႁဵတ်းႁႂ်ႈလဝ်ႈၼၼ်ႉ ယဵၼ်းပဵၼ်ၵွင်ႉၼႂ်းလိူတ်ႈလႆႈ ယွၼ်ႉတူဝ်ၶိင်းၵူၼ်းႁဝ်းမၼ်းဢမ်ႇမိူၼ်ၵၼ် လႄႈ မၢင်ၵေႃႉဢမ်ႇပဵၼ်သင်သေတႃႉ ၵူၺ်းၵႃႈ မၢင်ၵေႃႉၸၢင်ႈလူႉသဵင်ႈတၢႆလႆႈ ၼႆယဝ်ႉ။

ၵၢၼ်ဢိုၵ်ႉၵိၼ်လဝ်ႈဝႆးၼမ်ႁႅင်းပူၼ်ႉတီႈၼၼ်ႉ တေၸၢင်ႈႁဵတ်းႁႂ်ႈ alcohol ၼႂ်းလိူတ်ႈၽိူမ်ႉသုင်ၶိုၼ်ႈၼင်ႇဝႆးၽႂ်း လႄႈ တေၸၢင်ႈႁဵတ်းႁႂ်ႈၵႅၼ်ႉ၊ ဢေႃႉႁၢၵ်ႈ၊ ထူၺ်ႈၸႂ်ဢမ်ႇလႆႈ၊ ၵိုတ်းထူၺ်ႈၸႂ် လႄႈ ပဵၼ်လူမ်းတၢႆလိုမ်းၵႂႃႇ ဝႃႈၼႆ။

သင်ၸိူဝ်ႉတင်းၼမ် Alcohol ၼႂ်းလိူတ်ႈမီး 100 မီႇလီႇၵရမ်ႇပိူဝ်းသဵၼ်း (Milligrams Percent) ဢမ်ႇၼၼ် ၵိၼ်လဝ်ႈ 12 ၵႅဝ်ႈ၊ 1 ၵႅဝ်ႈလႂ် 2 ၽႃႁူမ်ႇၼႆ တေတႄႇပႆတၢင်းဢမ်ႇသိုဝ်ႈယဝ်ႉ၊ ပေႃးမီး 200 မီႇလီႇၵရမ်ႇပိူဝ်းသဵၼ်း ဢမ်ႇၼၼ် ၵိၼ်လဝ်ႈ 24 ၵႅဝ်ႈ၊ 1 ၵႅဝ်ႈလႂ် 2 ၽႃႁူမ်ႇၼႆ တေမီးၽၢၵႂင်ၵႂင်ၵႃးၵႃးဝႆႉ လႄႈ သင်မီး 300 မီႇလီႇၵရမ်ႇပိူဝ်းသဵၼ်းၶိုၼ်ႈသမ်ႉ တေၶႂ်ႈၼွၼ်း ၵႂင်မိုင်  ငိူဝ်ႈငဝ် ၼႆယူႇ။

ဢၼ်လီမႆႈၸႂ်ႁႅင်းၼႃႇတႄႉ သင်ၸိူဝ်ႉၸၼ်ႉထၢၼ်ႈ Alcohol ၼႂ်းလိူတ်ႈ 400 မီႇလီႇၵရမ်ႇ ပိူဝ်းသဵၼ်းၶိုၼ်ႈၼႆၸိုင် ယွၼ်ႉပဵၼ်ၸၼ်ႉဢၼ်မီးၽေးႁႅင်းၼႃႇ ၵွပ်ႈ ၸၢင်ႈတၢႆလိုမ်း လႄႈ မၢင်ၵေႃႉထိုင်တၢႆ  မိူၼ်ၼင်ႇ ပႅင်းၶ် လဵတ်းသ်တိူဝ်ႉရ် လႄႈ ၼၢင်းယိင်းထႆးၵေႃႉၼိုင်ႈ ၸိုဝ်ႈ Lalla Belle ဢၼ်ႁဵတ်းၵၢၼ်ပဵၼ် Pretty ၺႃးတိုၵ်းႁႂ်ႈၵိၼ်လဝ်ႈၼမ်ပူၼ်ႉတီႈသေၵိုင်ႉၵၢင်ႉလုသၢႆၸႂ် မိူဝ်ႈပီႊ 2019 September 17 ၼၼ်ႉ  ၼႆယဝ်ႉ။

လွင်ႈဢၼ် မီးၵူၼ်းဢဝ်ငိုၼ်း 30,000 ဝၢတ်ႇ ၸၢင်ႈႁႂ်ႈ ပႅင်းၶ် လဵတ်းသ်တိူဝ်ႉရ် ၵိၼ်လဝ်ႈမူတ်းပႅပ်ႉဝႆးဝႆးသေ ထိုင်တီႈမၼ်းၸၢႆးလုသဵင်ႈတၢႆၵႂႃႇၼႆႉ ငၢႆးၵၼ်တင်း ဢမု Lalla Belle ၼၼ်ႉသေတႃႉ ၵူၺ်းၵႃႈ  ၽၢႆႇၽူႈမီးပုၼ်ႈၽွၼ်းၶဝ် ယင်းပႆႇမၵ်းမၼ်ႈဝႃႈ ပဵၼ်ဢမုမဵဝ်းလဵဝ်ၵၼ် ယွၼ်ႉတိုၵ်ႉလူဝ်ႇၵူတ်ႇထတ်း ၶေႃႈမုၼ်းလိုၵ်ႉလိုၵ်ႉထႅင်ႈတင်းၼမ် ဢိၵ်ႇတင်း တေလႆႈထတ်းပႃးဝႃႈ ၽူႈၵဵဝ်ႇၶွင်ႈလွင်ႈၼႆႉပဵၼ်ၽႂ်ၽွင်ႈ ငဝ်ႈႁၢၵ်ႈဢၼ်ႁဵတ်းႁႂ်ႈလုတၢႆၼၼ်ႉ ပဵၼ်ယွၼ်ႉသင် သင်မီးလွင်ႈၸၢင်ႈၵၼ်ၵိၼ်လဝ်ႈတႄႉၸိုင် ၸွင်ႇမၼ်းၸၢႆးသမ်ႉ ၽွမ်ႉၸႂ်ၸွမ်းသေၵိၼ် ဢမ်ႇၼၼ် ထုၵ်ႇဢထမ်ႇမလွၵ်ႇငိူတ်ႈႁႃႉ ၵူၼ်းၸၢင်ႈမၼ်း ၸွင်ႇမီးတၢင်းၽိတ်းႁိုဝ် ၼႆၸိူဝ်းၼႆႉပႃးထႅင်ႈၵွၼ်ႇ ၼႆလႄႈ ၼႆယဝ်ႉ ။

တႆးလွတ်ႈလႅဝ်း