ၸၢႆးၽူင်းမွင်ႇ ၺႃး SSPP ၺွပ်းမတ်ႉႁႅမ်တၢႆပႅတ်ႈယဝ်ႉ

ၵူၼ်းမိူင်း ၵေႃႉဢမ်ႇမီးတၢင်းၽိတ်းသင် လႄႈ ဢမ်ႇၶဝ်ႈယုင်ႈၸွမ်း ၵၢၼ်ဝၢၼ်ႈ ၵၢၼ်မိူင်းသင်ၼၼ်ႉ ထုၵ်ႇၺႃးၸုမ်းယိပ်းၵွင်ႈၵၢင်ႇ ဢၼ်မီးၸိုဝ်ႈၸုမ်းဝႃႈ ပႃႇတီႇမႂ်ႇသုင်ၸိုင်ႈတႆး SSPP ၵႂႃႇၺွပ်းမတ်ႉဢဝ် တီႈဝၢၼ်ႈသူၼ်မွၼ်း ၸႄႈဝဵင်းၵေးသီး လႄႈ ပေႃႉထုပ်ႉႁႅမ်တၢႆပႅတ်ႈ တီႈတပ်ႉပၢင်သဝ်း ယူႇယဝ်ႉ။

ၵဵဝ်ႇလူၺ်ႈလွင်ႈပိူင်ပဵၼ်ၼႆႉ ၵူၼ်းမိူင်းၼႂ်းပိုၼ်ႉတီႈၵေႃႉၼိုင်ႈလၢတ်ႈၼႄဝႃႈ ၸုမ်းသိုၵ်းၶူဝ်းၶဵဝ် SSPP ႁႅမ်တၢႆၼၼ်ႉ ၸိုဝ်ႈႁွင်ႉ ၸၢႆးၽူင်းမွင်ႇ ဢႃႇယု 49 ပီႊ ၶႃႈဢေႃႈ၊ ၸၢႆးၽူင်းမွင်ႇ ယၢမ်ႈသူႇသမ်းၵိၼ်ယႃႈမဝ်းၵမ် လႄႈ မိူဝ်ႈၸုမ်းသိုၵ်းၶူဝ်းလၢႆး RCSS တိုၵ်ႉတူင်ႉၼိုင် ပၵ်းသဝ်းဝႆႉတီႈ ၼႂ်းၸႄႈဝဵင်းၵေးသီးၼၼ်ႉ ယၢမ်ႈဢဝ်တူဝ်မၼ်းၸၢႆး ၵႂႃႇမူၼ်ႉမႄးပၼ် ဢၵျၢင်ႉတၢင်းယၢမ်ႈသေ  ၶိုၼ်းပဵၼ်ၵူၼ်းလီ မီးဢၵျၢင်ႉတၢင်းယၢမ်ႈလီမႃးၶိုၼ်း၊ ဝၢႆးမႃးလႆႈႁူႉဝႃႈ ၸၢႆးၽူင်းမွင်ႇ ထုၵ်ႇၺႃးၸုမ်းသိုၵ်းၶူဝ်းၶဵဝ် ၺွပ်းမတ်ႉၵႂႃႇသႂ်ႇၶွၵ်ႈ လႄႈ  ဢဝ်လွင်ႈတၢင်း ယႃႈမဝ်းၵမ်သေ ထိုင်တီႈမတ်ႉတိၼ်မတ်ႉမိုဝ်း ပေႃႉႁႅမ်တေႃႇပေႃးသဵင်ႈသၢႆၸႂ်ၵႂႃႇ ၼႂ်းဝၼ်းထီႉ 20 December 2024 ၼႆႉၶႃႈ၊ ပေႃးထိုင်မႃးဝၼ်းထီႉ 27 December 2024 ပီႈပီႈၼွင်ႉၼွင်ႉၶဝ် ၸိူဝ်းယူႇမိူင်းၵႆၼၼ်ႉ တေဢွၼ်ၵၼ်ႁႅၼ်းလူႇႁႅၼ်းတၢၼ်းပၼ် သွမ်း 7 မၼ်းၸၢႆး ဝႃႈၼႆ။

ၸႄႈဝဵင်းၵေးသီး ၸိုင်ႈတႆးပွတ်းၸၢၼ်း ၼႆႉ မုၵ်ႉၸုမ်း RCSS/SSA ယၢမ်ႈတူင်ႉၼိုင်ပၵ်းသဝ်း လႄႈ ၵူတ်ႇထတ်းၽဵဝ်ႈမူၺ်ႉပႅတ်ႈယႃႈမဝ်းၵမ် ၸွမ်းၼႂ်းပိုၼ်ႉတီႈသေဢမ်ႇၵႃး ၵူၼ်းၸိူဝ်းတိတ်းၸပ်းယႃႈမဝ်းၵမ်ၼၼ်ႉၵေႃႈ ယူႇတီႈမုၵ်ႉၸုမ်း RCSS/SSA လႆႈမူၼ်ႉမႄးပၼ်တူဝ်ၸႂ်သေ ပွႆႇပွၵ်ႈမိူဝ်းၸူးၶိုၼ်း ၼႃႈႁိူၼ်းၽႂ်ၼႃႈႁိူၼ်းမၼ်းၵေႃႈ မီးတင်းၼမ် လႄႈ ၵူၼ်းမိူင်းပဵၼ်ဢၼ်ႁူမ်ၸူမ်း တႄႉတႄႉဝႃႈဝႃႈ ယူႇယဝ်ႉ။

တႆးလွတ်ႈလႅဝ်း