ဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈၶူပ်ႇ (73) ပီႊ ငဝ်ႈၸိုင်ႈလွႆတႆးလႅင်း

ၸွမ်းၼင်ႇ ၶွင်ႇသီႇဢဝ်ၶိုၼ်းၸိုင်ႈတႆး (RCSS) လႆႈၸတ်းႁဵတ်းပွႆး ဝၼ်းၸိူဝ်ႉၸၢတ်ႈၸိုင်ႈတႆးမႃး ၵူႈပီႊပီႊၼၼ်ႉ ပီႊၼႆႉၵေႃႈ ဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈၶူပ်ႇ (73) ပီႊယဝ်ႉလႄႈ ယူႇတီႈၶွင်ႇသီႇဢဝ်ၶိုၼ်းၸိုင်ႈတႆး (RCSS) ၵေႃႈ တေၸတ်းႁဵတ်းၵႂႃႇတီႈ ပၢင်ႁူမ်ႈၸဝ်ႈသိူဝ်ၶၢၼ်ႇၾႃႉ ငဝ်ႈၸိုင်ႈလွႆတႆးလႅင်း ဝႃႈၼႆ။

ပေႃးထိုင်မႃး ဝၼ်းထီႉ 6 February 2020 ယၢမ်း 18 : 00 မူင်း ၼၼ်ႉ ပီႈၼွင်ႉၶႅၵ်ႇတၢင်ၸိုင်ႈ၊ ၽူႈယႂ်ႇၵူၼ်းလူင်၊ ပႃႇတီႇ ဢိၵ်ႇတင်း ၸုမ်းယိပ်းၵွင်ႈၵၢင်ႇၸၢဝ်းၶိူဝ်း တေမီးပၢင်ၵိၼ်ၶဝ်ႈႁူမ်ႈမူႇၵၼ် တီႈႁူင်းႁဵၼ်းၸိူဝ်ႉၸၢတ်ႈ (ႁူင်းႁဵၼ်းၸၼ်ႉသုင်) သေ ပေႃးထိုင်ယၢမ်း 19 : 00 မူင်း တေမီး ပၢင်မူၼ်ႈသိူဝ်း တၢင်းၵႃႈၼူၵ်ႉတူဝ်း၊ တၢင်းၵႃႈလုၵ်ႈဢွၼ်ႇ လႄႈ ပၢင်မူၼ်ႈသိူဝ်း ႁွင်ႉၵႂၢမ်းၾိင်ႈငႄႈပၢႆးမွၼ်း ပၢၼ်ၵဝ်ႇ/ ပၢၼ်မႂ်ႇ မူၼ်ႈၸႂ်ပၼ်ပီႈၼွင်ႉ မႃးၶဝ်ႈႁူမ်ႈပၢင်ပွႆး တီႈပၢင်ႁူမ်ႈ ၸဝ်ႈသိူဝ်ၶၢၼ်ႇၾႃႉ ဝႃႈၼႆ။

ၼႂ်းဝၼ်းထီႉ 7 February 2020 လိူၼ်သၢမ်မႂ်ႇ (14) ၶမ်ႈ တေၸတ်းႁဵတ်းပၢင်ၵႅဝ်ႈ ဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈၶူပ်ႇ (73) ပီႊ တီႈပၢင်ႁူမ်ႈၸဝ်ႈသိူဝ်ၶၢၼ်ႇၾႃႉသေ တေမီးသၢႆသိုၵ်း ၼႄၽၢင်ႁၢင်ႈသိုၵ်း၊ ႁူဝ်ပဝ်ႈလူင် ၶွင်ႇသီႇဢဝ်ၶိုၼ်းၸိုင်ႈတႆး ၸွမ်သိုၵ်းလူင် ယွတ်ႈသိုၵ်း မွၵ်ႇလၢတ်ႈၶေႃႈၵႂၢမ်း လွင်ႈလႆႈပဵၼ်မႃး ဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈၶူပ်ႇ (73) ပီႊ၊ သင်ႇၶႃႇၸဝ်ႈ ပၼ်ဢေႃးဝႃႇတ ၊ တူဝ်တႅၼ်း ၸုမ်းယိပ်းၵွင်ႈၵၢင်ႇၸၢဝ်းၶိူဝ်း ဢိၵ်ႇတင်း ၽူႈယႂ်ႇၵူၼ်းလူင် ထႅင်ႈလၢႆလၢႆၵေႃႉ မွၵ်ႇလၢတ်ႈၶေႃႈၵႂၢမ်း  ၸဵမ်ၸိူဝ်းၼႆႉ ဝႃႈၼႆ။

ၼႂ်းဝၼ်းထီႉ 7 February 2020 ဝၢႆးပၢင်ၵႅဝ်ႈယဝ်ႉတူဝ်ႈၵႂႃႇၼၼ်ႉ တေမီးမုၵ်ႉၸုမ်းၼၢင်းယိင်း ၶွင်ႇသီႇဢဝ်ၶိုၼ်းၸိုင်ႈတႆး ပိုတ်ႇဝႂ်ၸၢမ်းၵၢမ်ႇ ပုၼ်ႈငိုၼ်းၵွင်ၵၢင်သၢင်ႈႁူင်းႁဵၼ်း ႁူင်းႁဵၼ်းၸိူဝ်ႉၸၢတ်ႈ (ဝၢၼ်ႈၵွင်းမုင်ႈမိူင်း) ၽူႈမီးသုၼ်ႇလီသေ ယၢမ်း 17 : 30 ပီႈၼွင်ႉၶႅၵ်ႇ၊ ၵေႃႉသိုၵ်းၵေႃႉႁၢၼ်၊ ၵူၼ်းမိူင်း ၊ ၵူႈႁွင်ႈၵၢၼ်  တေမီးပၢင်ၵိၼ်ၶဝ်ႈႁူမ်ႈမူႇၵၼ် တီႈၼႃႈပၢင်ၵႅဝ်ႈလႄႈ ယၢမ်း 20 : 00 မူင်း တေမီး တၢင်းၵႃႈၾိင်ႈငႄႈၾိင်ႈထုင်း ပၢင်မူၼ်ႈသိူဝ်း ႁွင်ႉၵႂၢမ်းၾိင်ႈငႄႈပၢႆးမွၼ်း ပၢၼ်မႂ်ႇ/ပၢၼ်ၵဝ်ႇၵႂႃႇ တေႃႇထိုင်မိူင်းလႅင်း ၼႆယဝ်ႉ။

ၼႂ်းဝၼ်းထီႉ 28 January  2020 ဢွၼ်ၼႃႈတေထိုင် ဝၼ်းၸိူဝ်ႉၸၢတ်ႈၸိုင်ႈတႆးၼႆႉ ယူႇတီႈ သတၢပ်ႉ ၽၢႆႇလဵၼ်ႈႁႅင်း ပွႆးၸိူဝ်ႉၸၢတ်ႈ လႆႈၸတ်းႁဵတ်းပၢင်ၶႄႉၶဵင်ႇ ပၢင်လဵၼ်ႈႁႅင်းလၢႆလၢႆလွင်ႈလႄႈ ၼႂ်းဝၼ်းထီႉ 6-7 February 2020 ၼၼ်ႉ တေမီးပႃး ပၢင်တွၼ်ႈသူးၼမ်ႉၸႂ် ၽူႈၶႄႉၶဵင်ႇလဵၼ်ႈႁႅင်း ၼႆယဝ်ႉ။

တႆးလွတ်ႈလႅဝ်း