ၶေႃႈပိုဝ်ၽၢဝ်ႇ RCSS ၵဵဝ်ႇၵပ်းလွင်ႈ ပၢင်တိုၵ်း ၼႂ်းၸႄႈဝဵင်းမိူင်းၵိုင်

ၶွင်ႇသီႇဢဝ်ၶိုၼ်းၸိုင်ႈတႆး
ၶေႃႈပိုၼ်ၽၢဝ်ႇ ၵဵဝ်ႇၵပ်းလွင်ႈ ပၢင်တိုၵ်းၼႂ်းၸႄႈဝဵင်းမိူင်းၵိုင်
ဝၼ်းထီႉ 28 February 2020

1။ မိူဝ်ႈဝၼ်းထီႉ 27 February 2020 ယၢမ်းၵၢင်ၼႂ် 07:50 မူင်း သၢႆသိုၵ်း တပ်ႉမတေႃႇ ဢၼ်ပဵၼ် တပ်ႉၵွင် 525၊ 520၊ 575၊ 574 ႁႅင်းသိုၵ်း မွၵ်ႈ 400 ၵေႃႉ ဢဝ်မၢၵ်ႇလူင်ပိုတ်းယိုဝ်းၸွႆႈၽၢႆႇလင်သေ တႄႇၶိုၼ်ႈတိုၵ်း တပ်ႉပၢင်သဝ်း ၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး (RCSS/SSA) တီႈ လွႆတွၼ်း ဢိူင်ႇႁမ်းငၢႆး ၸႄႈဝဵင်းမိူင်းၵိုင်၊ တေႃႇထိုင် မိူဝ်ႈၼႆႉဝၼ်းထီႉ 28 ယၢမ်းဝၢႆးဝၼ်းၵေႃႈ ပၢင်တိုၵ်း တိုၵ်ႉသိုပ်ႇပဵၼ်ယူႇ၊ ၵဵဝ်ႇလူၺ်ႈလွင်ႈတၢင်း ဢၼ်လႆႈပဵၼ်ပၢင်တိုၵ်းၵၼ်ၼႆႉသေ ယူႇတီႈ မုၵ်ႉၸုမ်း ၶွင်ႇသီႇဢဝ်ၶိုၼ်းၸိုင်ႈတႆး (RCSS) ပဵၼ်ဢၼ်ၸႂ်ဢမ်ႇလီၸွမ်းတႄႉတႄႉ ၼႆယဝ်ႉ။

2။ တင်ႈတႄႇလိူၼ် March 2019 ဝၢႆးသေ ၸွမ်သိုၵ်းလူင် ယွတ်ႈသိုၵ်း ဢဝ်ပုၼ်ႈၽွၼ်းပဵၼ် ႁူဝ်ၼႃႈ ၸုမ်းဢွၼ်ႁူဝ်ၼႃႈၵၢၼ်ငမ်းယဵၼ် ၸူဝ်ႈၶၢဝ်း (PPST) ယဝ်ႉ ၼင်ႇႁိုဝ် ၶၵ်ႉၵၢၼ်ငမ်းယဵၼ် ဢၼ်ၶွင်ႉ ၶမ်ယူႇၼၼ်ႉ ပေႃးတေၵႂႃႇလႆႈတၢင်းၼႃႈၼႆသေ ယူႇတီႈ ၶွင်ႇသီႇဢဝ်ၶိုၼ်းၸိုင်ႈတႆး (RCSS) ၶတ်းၸႂ်ႁဵတ်းသၢင်ႈမႃးယူႇ၊ မိူဝ်ႈပၢင်ၵုမ်လူင်ဢုပ်ႇဢူဝ်းငူပ်ႉငီႉ ၵဵဝ်ႇလူၺ်ႈၵၢၼ်ပွင်သၢင်ႈ ၼႄၼမ်ႉ ၼႄတူဝ် ၶေႃႈတူၵ်းလူင်းပၢင်ၵုမ်လူင် JICM ပွၵ်ႈၵမ်း (8) ဢၼ်ၸတ်းႁဵတ်း မိူဝ်ႈဝၼ်းထီႉ 08 January 2020 ၼၼ်ႉၵေႃႈ လႆႈဢွၼ်ႁူဝ် ဢုပ်ႇဢူဝ်း ငူပ်ႉငီႉၵႂႃႇ တွၼ်ႈတႃႇတေၸတ်းႁဵတ်းလႆႈ ပၢင်ၵုမ်လူင် ပၢင်လူင် 21 ႁူဝ်ပၢၵ်ႇပီႊ လႄႈ ၼင်ႇႁိုဝ် ပေႃးတေလႆႈ ၶေႃႈတူၵ်းလူင်း (8) ၶေႃႈ ၵဵဝ်ၵပ်းလွင်ႈ ၶၵ်ႉၵၢၼ်ငမ်းယဵၼ် ပေႃးတေၵႂႃႇလႆႈတၢင်းၼႃႈၼၼ်ႉ ၼႆယဝ်ႉ။

3။ ဢၼ်ပဵၼ်ၶၵ်ႉၵၢၼ်ငၢၼ်း တႃႇၽေႃႇၼမ်ႉၼႄတူဝ် ၶေႃႈတူၵ်းလူင်း (8) ၶေႃႈ တီႈပၢင်ၵုမ်လူင် JICM ပွၵ်ႈၵမ်း (8) ၼၼ်ႉသေ ၼင်ႇႁိုဝ် ၸုမ်းဢုပ်ႇဢူဝ်းငူပ်ႉငီႉသွင်ၽၢႆႇ ႁူပ်ႉထူပ်းဢုပ်ႇ ဢူဝ်းၵၼ် တေလႆႈၼမ်ႉတွၼ်းၽွၼ်းလီ ဢွၵ်ႇမႃးၼမ်ၼၼ်ႉ ယူႇတီႈ ၶွင်ႇသီႇဢဝ်ၶိုၼ်းၸိုင်ႈတႆး (RCSS) ႁူမ်ႈမိုဝ်းတင်း ၸုမ်းယိပ်းၵွင်ႈၵၢင်ႇၸၢဝ်းၶိူဝ်း ၸိူဝ်းလူင်းလၢႆးမိုဝ်း လိၵ်ႈႁူမ်ႈမၢႆ NCA (NCA-S EAO) သေ ၶတ်းၸႂ်သႂ်ႇႁႅင်း ႁဵတ်းသၢင်ႈယူႇ။

4။ ထႅင်ႈၽၢႆႇၼိုင်ႈၵေႃႈ ယူႇတီႈ ၶွင်ႇသီႇဢဝ်ၶိုၼ်းၸိုင်ႈတႆး (RCSS) လႆႈႁူပ်ႉထူပ်းဢုပ်ႇဢူဝ်းတင်း သႅၼ်းၽူႈၼမ်းတပ်ႉမတေႃႇသေ သွင်ၽၢႆႇလႆႈပွင်သၢင်ႈလွင်ႈယုမ်ႇယမ်ၵၼ်မႃး ၶၵ်ႉဢွၼ်ႇတွၼ်ႈ ၼိုင်ႈ ယူႇယဝ်ႉ။

5။ တွၼ်ႈတႃႇၶၵ်ႉၵၢၼ်ငမ်းယဵၼ်ၼႆႉ မိူဝ်ႈၽွင်း ၶွင်ႇသီႇဢဝ်ၶိုၼ်းၸိုင်ႈတႆး (RCSS) ႁူမ်ႈမိုဝ်းတင်း လူင်ပွင်ၸိုင်ႈ၊ တပ်ႉမတေႃႇ၊ EAO သေ တိုၵ်ႉၶတ်းၸႂ် ႁဵတ်းသၢင်ႈယူႇၼႆႉ ၽၢႆႇတပ်ႉမတေႃႇသမ်ႉ ဢမ်ႇမီးလွင်ႈ  ဢုပ်ႇဢူဝ်းငူပ်ႉငီႉလူင်ႈၼႃႈသင်သေ တင်ႈၸႂ် ဢဝ်ႁႅင်းသိုၵ်းတင်းၼမ် ၶိုၼ်ႈလေႃႇ တိုၵ်း တပ်ႉသိုၵ်းၸိုင်ႈတႆး RCSS/SSA ၼႆႉ ပဵၼ်ဢၼ်မီးလွင်ႈထၢင်ႇထိူမ်ၼိူဝ် လွင်ႈၸုၵ်းမၼ်ႈ တပ်ႉမတေႃႇ ၵဵဝ်ႇလူၺ်ႈၶေႃႈတူၵ်းလူင်း ပၢင်ၵုမ် JICM ပွၵ်ႈၵမ်း (8) ၼၼ်ႉတႄႉတႄႉယူႇ။

6။ တွၼ်ႈတႃႇ ပၢင်တိုၵ်းပေႃးတေၵိုတ်းလႆႈ လႄႈ ၶၢဝ်းၼႃႈမႃးၵေႃႈ ၼင်ႇႁိုဝ်ပေႃးတေ ဢမ်ႇသိုပ်ႇ ပဵၼ်ပၢင်တိုၵ်းထႅင်ႈၼၼ်ႉ သွင်ပႃႈသွင်ၽၢႆႇ ထုၵ်ႇလီႁူပ်ႉထူပ်းဢုပ်ႇဢူဝ်းၵၼ် ၶၼ်ၶၼ်ၽႂ်းၽႂ်း ယူႇယဝ်ႉ။

7။ ယွၼ်ႉလွင်ႈလႆႈပဵၼ်ပၢင်တိုၵ်းပွၵ်ႈၵမ်းၼႆႉသေ ဢၼ်ၶွင်ႇသီႇဢဝ်ၶိုၼ်းၸိုင်ႈတႆး (RCSS) လႆႈ ဢွၵ်ႇၶေႃႈပိုၼ်ၽၢဝ်ႇ ပၢင်ၵုမ်ၶွပ်ႈပီႊ ပွၵ်ႈၵမ်း (20) ၵဵဝ်ႇလူၺ်ႈလွင်ႈ ပၢင်ၵုမ်ၵေႃၵမ်ၵၢၼ်ႁူမ်ႈ တႃႇဢုပ်ႇဢူဝ်းပွင်သၢင်ႈ လွင်ႈငမ်းယဵၼ် (UPDJC) လႄႈ ၵေႃၵမ်ၵၢၼ်ႁူမ်ႈလူလွမ်ပႂ်ႉပႃး လွင်ႈငမ်း ယဵၼ် (JMC)  ဢၼ်လႆႈတႅပ်းတတ်းၵႂႃႇယဝ်ႉၼၼ်ႉ ၶွင်ႇသီႇဢဝ်ၶိုၼ်းၸိုင်ႈတႆး (RCSS) တေၶိုၼ်း မႄးထတ်းသၢင်ၵႂႃႇ ယူႇယဝ်ႉ။

ၵေႃၵမ်ၵၢၼ်ပွင်ၵၢၼ်လူင်
ၶွင်ႇသီႇဢဝ်ၶိုၼ်းၸိုင်ႈတႆး

ၵပ်းသိုပ်ႇတွင်ႈထၢမ်

1. ၸဝ်ႈသိုၵ်း ဢုမ်ႈၶိူဝ်း   +95 9458043131
2. ၸဝ်ႈႁၢၼ် ၶမ်းၸၢမ်ႇ  +66 653767157 (E-mail: saikhamsarm@ltlrcss.org)