တပ်ႉသိုၵ်းၸိုင်ႈတႆး RCSS/SSA ၸွႆႈထႅမ်ၵၢၼ် လႄႈ ၵူတ်ႇထတ်းပၢႆးယူႇလီပၼ် ပေႃႈမႄႈၵူၼ်းမိူင်း

ၼင်ႇႁိုဝ်ပေႃးတေပဵၼ်လွင်ႈၸွႆႈထႅမ် ပေႃႈမႄႈၵူၼ်းမိူင်း လႄႈ ပေႃးတေမီးၽွၼ်းလီၼၼ်ႉ ယူႇတီႈ တပ်ႉသိုၵ်းၸိုင်ႈတႆး RCSS/SSA လႆႈၸွႆႈထႅမ်ၵၢၼ်၊ ၵူတ်ႇထတ်းပၼ်ပၢႆးယူႇလီ လႄႈ ပၼ်ပိုၼ်ႉႁူႉ ၵဵဝ်ႇလူၺ်ႈလၢႆးၵႅတ်ႇၶႄႁႄႉၵင်ႈ ၸိူဝ်ႉမႅင်းတၢင်းပဵၼ် COVID – 19 တီႈပေႃႈမႄႈၵူၼ်းမိူင်း ၼႂ်းၼႃႈတီႈၵုမ်းၵမ် ဝႃႈၼႆ။

မိူဝ်ႈဝၼ်းထီႉ 8 May 2020 (လိူၼ်ႁူၵ်းလွင်ႈ 2 ၶမ်ႈ ပီႊတႆး 2114 ၼီႈ) ၵေႃႉသိုၵ်း တပ်ႉသိုၵ်းၸိုင်ႈတႆး RCSS/SSA ၸွႆႈထႅမ်ပေႃႈမႄႈၵူၼ်းမိူင်း ၶုတ်းတၢင်း၊ မႄးသဵၼ်ႈတႃႈသၢႆတၢင်း လႄႈ တေႃႇလွတ်ႇၼမ်ႉ တီႈၼႂ်းၸႄႈဝဵင်းၵေးသီး ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း ဝႃႈၼႆ။

ထႅင်ႈၽၢႆႇၼိုင်ႈၵေႃႈ ယွၼ်ႉၸိူဝ်ႉမႅင်းတၢင်းပဵၼ် Coronavirus 2019 ဢမ်ႇၼၼ် COVID – 19 တိတ်းၸပ်းၽႄႈလၢမ်းၸွတ်ႇတူဝ်ႈၵႂႃႇ ၵူႈမိူင်းမိူင်း ၼႂ်းလုမ်ႈၾႃႉသေ တီႈၼႂ်းမိူင်းႁူမ်ႈတုမ်ၵေႃႈ မီးၵူၼ်းတိတ်းၸပ်းၸိူဝ်ႉမႅင်းၼႆႉ တိူဝ်းၶိုၼ်ႈယူႇတိၵ်းတိၵ်း လႄႈ မိူဝ်ႈဝၼ်းထီႉ 8 May 2020 ၼၼ်ႉၵူၺ်းၼင်ႇၵဝ်ႇ မေႃယႃၽၢႆႇ ပၢႆးယူႇလီ RCSS ဢၼ်တူင်ႉၼိုင်ဝႆႉ ၼႂ်းၼႃႈတီႈၵုမ်းၵမ် လႆႈႁူမ်ႈမိုဝ်းၵၼ်တင်း မေႃယႃၽၢႆႇပၢႆးယူႇလီ လူင်ပွင်ၸိုင်ႈ၊   ၵေႃႇမတီႇဝၢၼ်ႈ/ဢိူင်ႇ ၵူႈၽၢႆႇၽၢႆႇသေ လူင်းပိုၼ်ႉတီႈ ၵူတ်ႇထတ်းပၼ်ပၢႆးယူႇလီ လႄႈ ပၼ်ၵႂၢမ်းႁူႉ ၵဵဝ်ႇလူၺ်ႈလၢႆးၵႅတ်ႇၶႄႁႄႉၵင်ႈ ၸိူဝ်ႉမႅင်းတၢင်းပဵၼ် COVID – 19 တီႈပေႃႈမႄႈၵူၼ်းမိူင်း ၼႂ်းၸႄႈဝဵင်းလၢင်းၶိူဝ်း ၸိုင်ႈတႆးပွတ်းၸၢၼ်း မိူၼ်ၵၼ်။

သၢႆမၢႆ ဢၼ်ၽၢႆႇပၢႆးယူႇလီ RCSS လႄႈ ၽၢႆႇပၢႆးယူႇလီ လူင်ပွင်ၸိုင်ႈ ႁူမ်ႈၵၼ် ၵူတ်ႇထတ်းပၢႆးယူႇလီပၼ် ပေႃႈမႄႈၵူၼ်းမိူင်း ၼႂ်းၸႄႈဝဵင်းလၢင်းၶိူဝ်းၼႆႉ ၸၢႆး (116) ၵေႃႉ၊ ယိင်း (76) ၵေႃႉ လႄႈ သင်ႇၶၸဝ်ႈ (4) ပႃး ႁူမ်ႈ (196) ၵေႃႉ ၼႆယဝ်ႉ။

တႆးလွတ်ႈလႅဝ်း