ပၢင်လူင်း ပၢင်သွၼ်ငဝ်ႈၶၢမ်ႇပိုၼ်ႉၶွမ်ႇၽိဝ်ႇတိူဝ်ႇ ၸုပ်ႈ (1) ယဝ်ႉတူဝ်ႈ

ၸွမ်းၼင်ႇ ပေႃႈမႄႈၵူၼ်းမိူင်း ၼႂ်းၸိုင်ႈတႆးပွတ်းႁွင်ႇ ၶႂ်ႈႁႂ်ႈမီးလွင်ႈပူၵ်းပွင် ၼမ်ႉၵတ်ႉၵူၼ်းၼုမ်ႇၼႆသေ ယူႇတီႈ ၸုမ်းပွင်ၵၢၼ်ပၢႆးပၺ်ႇၺႃႇ ၶွင်ႇသီႇဢဝ်ၶိုၼ်းၸိုင်ႈတႆး လႆႈပိုတ်ႇပၢင်သွၼ် ငဝ်ႈၶၢမ်ႇပိုၼ်ႉ ၶွမ်ႇၽိဝ်ႇတိူဝ်ႇ ပဵၼ်ဢၼ်ယဝ်ႉတူဝ်ႈ လီငၢမ်း။

မိူဝ်ႈဝႃး ဝၼ်းထီႉ 30 June 2020 (ပ−လိူၼ်ပႅတ်ႇမႂ်ႇ 11 ၶမ်ႈ ပီႊတႆး 2114 ၼီႈ) ၶၢဝ်းယၢမ်း 09:00 မူင်း ၵၢင်ၼႂ် ထိုင် 11:30 မူင်းၵၢင်ဝၼ်းၼၼ်ႉ ယူႇတီႈ ၸုမ်းပွင်ၵၢၼ်ပၢႆးပၺ်ႇၺႃႇ ၶွင်ႇသီႇဢဝ်ၶိုၼ်းၸိုင်ႈတႆး လႆႈဢွၼ်ႁူဝ် ၸတ်းႁဵတ်း ပၢင်လူင်းၵၢၼ်သွၼ် ငဝ်ႈၶၢမ်ႇပိုၼ်ႉ ၶွမ်ႇၽိဝ်ႇတိူဝ်ႇ ၸုပ်ႈ (1) ၼႂ်းၸိုင်ႈတႆးပွတ်းႁွင်ႇ တီႈၼိုင်ႈသေ မီႈၸဝ်ႈၼႃႈတီႈ ၽၢႆႇဢုပ်ႉပိူင်ႇ၊ ၵေႃလိၵ်ႈလၢႆး လႄႈ ၾိင်ႈငႄႈတႆး၊ ၽူႈယႂ်ႇၵူၼ်းလူင်ဝၢၼ်ႈ လႄႈ ပေႃႈမႄႈ ၵူၼ်းမိူင်း ၶူးသွၼ် ဢိၵ်ႇတင်း လုၵ်ႈႁဵၼ်းၶဝ်ႈႁူမ်ႈ 115 ၵေႃႉ ဝႃႈၼႆ။

တႃႇတေပဵၼ်မႃးပၢင်သွၼ်ၼႆႉၵေႃႈ ဢိင်ၼိူဝ် ပေႃႈမႄႈၵူၼ်းမိူင်းႁဝ်းၶႃႈတုၵ်းယွၼ်းမႃး ၶႂ်ႈႁႂ်ႈမီး လွင်ႈပူၵ်းပွင်ၼမ်ႉၵတ်ႉ ပၼ်လုၵ်ႈဢွၼ်ႇႁဵၼ်းတႆးႁဝ်း ဢိၵ်ႇတင်း ၵူၼ်းၼုမ်ႇတႆးႁဝ်းၶႃႈ ၼႂ်းဝၢၼ်ႈ၊ ၼႂ်းသူၼ်ၼႆသေ ယူႇတီႈၸုမ်းပွင်ၵၢၼ်ပၢႆးပၺ်ႇၺႃႇ ၶွင်ႇသီႇဢဝ်ၶိုၼ်းၸိုင်ႈတႆး ၸင်ႇလႆႈႁပ်ႉဢဝ် တၢင်းႁူမ်ႈမိုဝ်း တီႈပေႃႈမႄႈၵူၼ်းမိူင်းသေ ပိုတ်ႇၽုၺ်ႇပၢင်သွၼ် ငဝ်ႈၶၢမ်ႇပိုၼ်ႉၶွမ်ႇၽိဝ်ႇတိူဝ်ႇ ၼႆယဝ်ႉ။

ပၢင်သွၼ်ငဝ်ႈၶၢမ်ႇပိုၼ်ႉ ၶွမ်ႇၽိဝ်ႇတိူဝ်ႇ ၸုပ်ႈ (1) ၼႆႉ လႆႈတႄႇပိုတ်ႇပၢင်သွၼ် တႄႇၸဵမ်မိူဝ်ႈၼႂ်းဝၼ်းထီႉ 18 May 2020 တေႃႇပေႃးထိုင် ၼႂ်းဝၼ်းထီႉ 30 June 2020 လႆႈၽႄသွၼ်ႁဵၼ်း ပဵၼ်သွင်တွၼ်ႈ၊ တွၼ်ႈ 1 ၼၼ်ႉ ပဵၼ်ၸုမ်းလုၵ်ႈဢွၼ်ႇႁဵၼ်း ထႅင်ႈတွၼ်ႈၼိုင်ႈသမ်ႉ ပဵၼ်ၸုမ်းၵူၼ်းၼုမ်ႇၼႂ်းဝၢၼ်ႈဢိူင်ႇသေ လုၵ်ႈႁဵၼ်းတင်းမူတ်းမီး (24) ၵေႃႉ၊ ပိုတ်ႇသွၼ်ၵႂႃႇ လူၺ်ႈႁူဝ်ၶေႃႈ 1. ႁူႉၸၵ်းငဝ်ႈၶၢမ်ႇပိုၼ်ႉ ၵၢၼ်ၸႂ်ႉတိုဝ်းၶွမ်ႇၽိဝ်ႇတိူဝ်ႇ၊ 2. ၵၢၼ်ၸႂ်ႉတိုဝ်း Microsoft Office Word၊ 3. ၵၢၼ်ၸႂ်ႉတိုဝ်း Microsoft Excel၊ 4. ၵၢၼ်ၸႂ်ႉတိုဝ်း Microsoft PowerPoint၊ 5. ၵၢၼ်ၶူၼ်ႉႁႃၶေႃႈမုၼ်း တီႈၼိူဝ် Internet ၸဵမ်ၸိူဝ်းၼႆႉ ၼႆယဝ်ႉ။

ၽူႈမီးပုၼ်ႈၽွၼ်း ၸုမ်းပွင်ၵၢၼ်ပၢႆးပၺ်ႇၺႃႇ ၶွင်ႇသီႇဢဝ်ၶိုၼ်းၸိုင်ႈတႆး RCSS လၢတ်ႈဝႃႈ ဢိင်ၼိူဝ် ၸိူဝ်ႉမႅင်းတၢင်းပဵၼ် COVID-19 လႆႈၽႄႈလၢမ်း ၸွတ်ႇတူဝ်ႈၵႂႃႇ ၼႂ်းလုမ်ႈၾႃႉၼႆႉသေ ၼင်ႇႁိုဝ် လုၵ်ႈဢွၼ်ႇသႅၼ်းႁုၼ်ႈမႂ်ႇ ႁဝ်းၶႃႈ လႄႈ ၵူၼ်းၼုမ်ႇႁဝ်းၶႃႈ ပေႃးတေဢမ်ႇသုမ်းၶၢဝ်းယၢမ်း ပႅတ်ႈလၢႆလၢႆ သေဢမ်ႇၵႃး တႃႇႁႂ်ႈပေႃးၶိုတ်းတၼ်း ၵၢပ်ႈပၢၼ် IT ဢၼ်ၵူႈမိူင်းမိူင်း ဢွၼ်ၸႂ်ႉတိုဝ်း ၵၼ်ယူႇယၢမ်းလဵဝ်ၼႆႉ၊ ၶႂ်ႈႁႂ်ႈလုၵ်ႈဢွၼ်ႇတႆးႁဝ်း ၵူၼ်းၼုမ်ႇတႆးႁဝ်း ဢဝ်ပဵၼ်ငဝ်ႈၶၢမ်ႇပိုၼ်ႉၵၢၼ်ႁဵၼ်း တွၼ်ႈတႃႇတေသိုပ်ႇယၢင်ႈ ၵႂႃႇတၢင်းၼႃႈၼၼ်ႉသေ ၸင်ႇလႆႈႁူမ်ႈမိုဝ်းၵၼ် တင်းပေႃႈမႄႈၵူၼ်းမိူင်း ပိုတ်ႇပၢင်သွၼ်ၵႂႃႇ ၼႆယဝ်ႉ။

တႆးလွတ်ႈလႅဝ်း