ၵူၼ်းမိူင်းၼမ်ႉၸၢင်ထဵင်မေႃးၵၼ်ၺႃးသိုၵ်းမၢၼ်ႈၺွပ်းသွၼ်ၵၢၼ်သိုၵ်း

တင်ႈတႄႇဝၼ်းထီႉ 19−21 December 2024 ၵူၼ်းမိူင်းၸိူဝ်းယူႇသၢင်ႈၵိၼ်သဝ်း ၼႂ်းဝဵင်းၼမ်ႉၸၢင် ၵမ်ႈၽွင်ႈထဵင်မေႃးၵႂၢမ်းၼမ်ၵၼ်ၼၼ်ႉ ထုၵ်ႇၺႃးသိုၵ်းမၢၼ်ႈ ၺွပ်းဢဝ်ၵႂႃႇသွၼ်ၵၢၼ်သိုၵ်း ဝႃႈၼႆ။

ၵူၼ်းမိူင်းၼႂ်းပိုၼ်ႉတီႈလၢတ်ႈဝႃႈ ၶၢဝ်းတၢင်း 3 ဝၼ်းၵူၺ်း ၸုမ်းသိုၵ်းမၢၼ်ႈ ၺွပ်းဢဝ်ၵူၼ်းမိူင်း ၼႂ်းပွၵ်ႉ 3 ဝဵင်းၼမ်ႉၸၢင် လႆႈၵႂႃႇ 5 ၵေႃႉ ၶိုၼ်းသူင်ႇၵႂႃႇသွၼ်ၵၢၼ်သိုၵ်း တီႈၵဵင်းတုင်ယဝ်ႉၶႃႈ၊ ၸိူဝ်းၶဝ် 5 ၵေႃႉၼႆႉ ထဵင်မေႃးၵႂၢမ်းၼမ်ၵၼ် လွင်ႈၼႃႈႁိူၼ်းတႃယေး လႄႈ ထုၵ်ႇၺႃး ၽူႈၵွၼ်းပွၵ်ႉ သိုၵ်းမၢၼ်ႈ၊ ပလိၵ်ႈမၢၼ်ႈ ၵႂႃႇတီႉၺွပ်းဢဝ်ၶႃႈဢေႃႈ၊ ပေႃႈမႄႈပီႈၼွင်ႉၶဝ်ၵေႃႈ ၵႂႃႇမွၵ်ႇလၢတ်ႈယွမ်းၼွမ်းတေႃႇ ၽူႈၵဵဝ်ႇၶွင်ႈၶဝ်ၵေႃႈဢမ်ႇလႆႈ ဝႃႈၼႆ။

ၵူၼ်းမိူင်း 5 ၵေႃႉ ၸိူဝ်းထုၵ်ႇၺႃးသိုၵ်းမၢၼ်ႈ ၺွပ်းသူင်ႇတူဝ်ၵႂႃႇသွၼ်ၵၢၼ်သိုၵ်း တီႈဝဵင်းၵဵင်းတုင်ၼၼ်ႉ ပဵၼ် ဢူးမျိၼ်ႉၼၢႆႇ၊ ၵူဝ်ႇဢွင်ႇမဵဝ်း၊ ၵူဝ်ႇၸၢၼ်းမွင်ႇဝိၼ်း၊ ၵူဝ်ႇမဵဝ်းတိၼ်ႉ၊ ၵူဝ်ႇၵျေႃႇၸဵင်ႇ ၼႆယဝ်ႉ။

ၼႂ်းပီႊ 2023−2024 ၼႆႉ ၽၢႆႇသိုၵ်းမၢၼ်ႈ ပဵၼ်ပၢင်တိုၵ်းၵၼ်တင်း ၸုမ်းယိပ်းၵွင်ႈၵၢင်ႇလုၵ်ႉၽိုၼ်ႉႁၢဝ်ႈႁႅင်းသေ  မီးလွင်ႈလူႉသုမ်းယႂ်ႇသုမ်းလူင် လႄႈ ၼင်ႇႁိုဝ်ပေႃးတေလႆႈႁႅင်းသိုၵ်းမႂ်ႇၼၼ်ႉၵေႃႈ သိုၵ်းမၢၼ်ႈႁႃၵူႈလွၵ်းလၢႆး တွၼ်ႈတႃႇတီႉၺွပ်းဢဝ်ၵူၼ်းၼုမ်ႇ တႃႇသွၼ်ၵၢၼ်သိုၵ်း ၼႆယဝ်ႉ။

တႆးလွတ်ႈလႅဝ်း