လုၵ်ႈဢွၼ်ႇလဵင်ႉဝူဝ်း SSPP ၺွပ်းၵႂႃႇၼၼ်ႉလႆႈပႂ်ႉယၢမ်း

လုၵ်ႈဢွၼ်ႇဢႃႇယု 13 ၶူပ်ႇ လဵင်ႉဝူဝ်းတီႈၼွၵ်ႈဝၢၼ်ႈၵုင်းပဝ်း ဢိူင်ႇပၢင်ႇၵေႇတု ၸႄႈဝဵင်းမိူင်းၵိုင် လႆႈထုၵ်ႇၺႃးၸုမ်းသိုၵ်း SSPP တီႉၺွပ်းဢဝ်ၵႂႃႇသေ ထၢင်ႇတေဢဝ်ၵႂႃႇသွၼ်ပၼ်လိၵ်ႈလၢႆး လႄႈ ပူၵ်းပွင်ပၼ်ပၢႆးပၺ်ႇၺႃႇ တီႈတႄႉ ၺွပ်းဢဝ်ၵႂႃႇႁဵတ်းသိုၵ်းပႂ်ႉယၢမ်း ၼႆယဝ်ႉ။

ၵဵဝ်ႇၵပ်းလူၺ်ႈလွင်ႈၼႆႉ ၵူၼ်းမိူင်းၼႂ်းပိုၼ်ႉတီႈလၢတ်ႈၼႄဝႃႈ ပိူင်ပဵၼ်မၼ်းတႄႉ မိူဝ်ႈဝၼ်းထီႉ 15 December 2024 ၼၼ်ႉ ၶူဝ်းၶဵဝ်ၶဝ် ၵႂႃႇတီႉၺွပ်းဢဝ် ဢွၼ်ႇၸၢႆးသွင်ပီႈၼွင်ႉ (ဢႃႇယု 13 လႄႈ 15) ဢၼ်တိုၵ်ႉလဵင်ႉဝူဝ်း တီႈၼွၵ်ႈဝၢၼ်ႈ၊ ၵမ်းၼၼ်ႉၵေႃႉပဵၼ်ပီႈဢၢႆႈမၼ်း ၶူဝ်းၶဵဝ်ပွႆႇမႃးၶိုၼ်း မိူဝ်ႈဝၼ်းထီႉ 16 December ၶႃႈဢေႃႈ၊ ၵွပ်ႈပိူဝ်ႈလုၵ်ႈဢွၼ်ႇ တိုၵ်ႉမီးဢႃႇယု 13 ၶူပ်ႇ ဢမ်ႇပႆႇႁူႉသင်လႄႈ ပေႃႈမႄႈၶဝ်ၵႂႃႇတုၵ်းယွၼ်း ႁႂ်ႈပွႆႇပၼ်ၶိုၼ်းသေတႃႉ ၶူဝ်းၶဵဝ်ဢမ်ႇယွမ်းပွႆႇ ၶိုၼ်းဢဝ်ႁဵတ်းသိုၵ်းပႅတ်ႈယဝ်ႉၶႃႈဢေႃႈ၊ လုၵ်ႈဢွၼ်ႇမွၵ်ႈၼႆႉ ထၢင်ႇဝႃႈ တေဢဝ်ၵႂႃႇသွၼ်ပၼ်လိၵ်ႈလၢႆး သမ်ႉဢဝ်ၵႂႃႇႁဵတ်းသိုၵ်း ပၼ်ယိပ်းၵွင်ႈသေ ပႂ်ႉယၢမ်း/ပႂ်ႉလၢၼ်ႇ တီႈႁိမ်းတပ်ႉဝၢၼ်ႈၵုင်းလႅင် ဢၼ်ဢမ်ႇပေႃးၵႆၵၼ်တင်း ဝၢၼ်ႈၵုင်းပဝ်း၊ ဝူင်ႈဝၢင်ႈၼႆႉပေႃးၵူၼ်းဝၢၼ်ႈၵုင်းပဝ်း ၽႅတ်ႈၵႂႃႇၽႅတ်ႈမႃး ၸွမ်းတၢင်းၼႆ ၵႆႉလႆႈႁၼ်ၺႃး လုၵ်ႈဢွၼ်ႇၵေႃႉၼၼ်ႉ ယိပ်းၵွင်ႈပႂ်ႉယၢမ်းဝႆႉ ဝႃႈၼႆ။

ၵဵဝ်ႇၵပ်းလူၺ်ႈလွင်ႈ SSPP ၺွပ်းလုၵ်ႈဢွၼ်ႇလဵင်ႉဝူဝ်း ဢဝ်ႁဵတ်းသိုၵ်းၼႆႉသေ ၸဝ်ႈႁၢၼ် ၽူင်းႁၢၼ် ၽူႈၶၢၼ်ပၢၵ်ႇ SSPP တွပ်ႇလၢတ်ႈတီႈသိုဝ်ႇၶၢဝ်ႇဝႃႈ လွင်ႈၼႆႉဢမ်ႇပႆႇၸၢင်ႈယိုၼ်ႈယၼ် လႄႈ တေသိုပ်ႇထတ်းတူၺ်းၵွၼ်ႇ ဝႃႈၼႆ။

ၵွပ်ႈပိူဝ်ႈ SSPP ၺွပ်းဢဝ်လုၵ်ႈဢွၼ်ႇႁဵတ်းသိုၵ်း လႄႈ ၵူၼ်းဝၢၼ်ႈၵုင်းပဝ်း ဢွၼ်ၵၼ်ပၢႆႈဢွၵ်ႇဝၢၼ်ႈၵမ်ႈၽွင်ႈသေ မိူဝ်ႈလဵဝ်လႆႈႁူႉဝႃႈ ၵူၼ်းမုင်ႉႁေႃႁိူၼ်း လုၵ်ႈဢွၼ်ႇ ဢႃႇယု 13 ၶူပ်ႇၼၼ်ႉၵေႃႈ ဢွၼ်ၵၼ်ငိူင်ႉပၢႆႈမူတ်း ၵိုတ်းဝႆႉၵေႃႉပဵၼ်မႄႈ ၵူၺ်းၼႆယဝ်ႉ။

တႆးလွတ်ႈလႅဝ်း